ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມສະຫຼຸບວຽກງານຂອງຂະແໜງຊັບພະຍາກອນທໍາມະຊາດ ແລະ ສິ່ງ ແວດລ້ອມ ປະຈຳປີ 2023 ແລະ ທິດທາງແຜນການ ປະຈຳປີ 2024 ຈັດຂຶ້ນລະຫວ່າງວັນທີ 16-17 ມັງກອນ 2024 ທີ່ ກະ​ຊວ​ງຊັບພະຍາກອນທໍາມະຊາດ ແລະ ສິ່ງແວດ ລ້ອມ (ກ​ຊ​ສ) ເປັນປະທານຂອງ ທ່ານ ນາງ ບຸນຄໍາ ວໍລະຈິດ ລັດຖະມົນຕີກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ມີບັນດາທ່ານຮອງລັດຖະມົນຕີ ຮອງເຈົ້າຄອງ ຮອງເຈົ້າແຂວງ ຫົວໜ້າກົມ ຮອງຫົວໜ້າກົມ ຫົວໜ້າພະແນກ ຮອງຫົວໜ້າພະ ແນກ ແລະ ແຂກຖືກເຊີນເຂົ້າຮ່ວມ.
ທ່ານ ນາງ ບຸນຄຳ ວໍລະຈິດ ກ່າວວ່າ: ໃນປີ 2023 ຜ່ານມາໄດ້ດຳເນີນວຽກງານໄປຕາມເງື່ອນໄຂທີ່ສະພາບການຂອງພາຍໃນ ແລະ ພາຍນອກໄດ້ມີການຜັນແປໄປຢ່າງສັບສົນ ແລະ ສິ່ງທ້າທາຍຫຼາຍດ້ານໂດຍສະເພາະຄວາມຄັດແຍ່ງທາງດ້ານການເມືອງ ແລະ ສະພາບເສດຖະກິດຂອງບາງປະເທດໃນໂລກ ໄພພິບັດທາງທຳມະຊາດ ແລະ ອື່ນໆ ຄວາມຫຍຸ້ງຍາກບາງດ້ານຢູ່ພາຍໃນປະເທດ ແຕ່ເຖີງຢ່າງໃດກໍຕາມ ຂະແໜງ ຊສ ກໍໄດ້ສູ້ຊົນ ແລະ ຕັ້ງໜ້າປະຕິບັດໜ້າທີ່ການເມືອງຂອງຕົນທີ່ພັກ-ລັດຖະບານ ແລະ ປະຊາຊົນມອບໝາຍໃຫ້ໃນການຄຸ້ມຄອງ ປົກປັກຮັກສາ ກວດກາການນຳໃຊ້ ແລະ ຟື້ນຟູພັດທະນາຊັບພະຍາກອນທຳມະຊາດ ແລະ ສິ່ງແວດລ້ອມ ຕາມທິດສີຂຽວ ແລະ ຍືນຍົງ ລວມທັງວຽກງານການຄຸ້ມຄອງອຸຕຸນິຍົມ ແລະ ອຸທົກກະສາດ ການປ່ຽນແປງດິນຟ້າອາກາດ ໂດຍໄດ້ປະຕິບັດແຜນການປະຈຳປີຕິດພັນກັບຂໍ້ແຂ່ງຂັນຮັກຊາດ-ພັດທະນາ ແລະ ການຈັດຕັ້ງຜັນຂະຫຍາຍ 2 ວາລະແຫ່ງຊາດໂດຍໄດ້ມີຜົນສໍາເລັດໃນຫຼາຍດ້ານສົມຄວນເຊັ່ນ ໃນແຜນປີ 2023 ກຊສ ໄດ້ກໍານົດໜ້າວຽກຈຸດສຸມທັງໝົດ 19 ໜ້າວຽກຈຸດສຸມ ໃນນີ້ໄດ້ສໍາເລັດ 100% ມີ 4 ໜ້າວຽກ ປະຕິບັດໄດ້ 70%-90% ມີ 11 ໜ້າວຽກ ແລະ ປະຕິບັດໄດ້ຕໍ່າກ່ວາ 50% ມີ 4 ໜ້າວຽກຄື ວຽກງານຂຶ້ນທະບຽນອອກໃບຕາດິນທີ່ດິນໃນຂອບເຂດທົ່ວປະເທດ ວຽກງານສ້າງແຜນຍຸດທະສາດ ແລະ ແຜນການນໍາໃຊ້ທີ່ດິນຂອງແຕ່ລະຂະແໜງການ ແລະ ທ້ອງຖິ່ນຕາມກົດໝາຍວ່າດ້ວຍທີ່ດິນ ວຽກງານກວດກາໂຄງການເຊົ່າ-ສໍາປະທານທີ່ດິນຂອງລັດທຸກໂຄງການ ວຽກງານຄຸ້ມຄອງສິ່ງແວດລ້ອມ ແລະ ສິ່ງເສດເຫຼືອ.
ກອງປະຊຸມຄັ້ງນີ້ໄດ້ສະຫຼຸບຕີລາຄາຄືນການຈັດຕັ້ງປະຕິບັດວຽກງານຂອງຂະແໜງຊັບພະຍາກອນທໍາມະຊາດ ແລະ ສິ່ງແວດລ້ອມ ປະຈໍາປີ 2023 ໂດຍສະເພາະດ້ານການຈັດຕັ້ງ-ພະນັກງານ ດ້ານວຽກງານວິຊາສະເພາະເປັນຕົ້ນວຽກງານທີ່ດິນ ນໍ້າ ສິ່ງແວດລ້ອມ ການປ່ຽນແປງດິນຟ້າອາກາດ ແລະ ວຽກງານອຸຕຸນິຍົມ ແລະ ອຸທົກກະສາດເພື່ອຍົກໃຫ້ເຫັນດ້ານດີ ດ້ານອ່ອນຂໍ້ຄົງຄ້າງເພື່ອເປັນກົນໄກການຈັດຕັ້ງປະຕິບັດວຽກງານໃນຊຸມປີຕໍ່ໜ້າ.