ກະຊວງຊັບພະຍາກອນທຳ ມະຊາດ ແລະ ສິ່ງແວດລ້ອມ (ກຊສ) ໄດ້ຈັດພິທີປະກາດການ​ຈັດ​ຕັ້ງ, ໂດຍ​ພາຍ​ໃຕ້ການເປັນປະທານຂອງ ​ສະ​ຫາຍ ນາງ ບຸນຄໍາ ວໍລະຈິດ ກຳ​ມະ​ການ​ສູນ​ກາງ​ພັກ ເລ​ຂາ​ຄະ​ນະ​ພັກ ລັດ​ຖະ​ມົນ​ຕີ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ ໂດຍມີບັນ​ດາ​​ສະ​ຫາຍ ຄະ​ນະປະ​ຈຳ​ພັກ​ກະ​ຊວງ, ຄະ​ນະ​ພັກ​ກະ​ຊວງ, ​​ເລ​ຂາ​ຄະ​ນະ​ພັກ​ຮາກ​ຖານ, ເລ​ຂາ​ໜ່ວຍ​ພັກ ພ້ອມ​ດ້ວຍພະ​ນັ​ກງານ​ຫຼັກ​ແຫຼ່ງ​ຂອງ​ກະ​ຊວງ ​ເຂົ້າ​ຮ່ວມຢ່າງພ້ອມພຽງ.
ໃນ​ພິ​ທີ, ສະ​ຫາຍ ພັນ​ທະ​ລີ ມະ​ນີ​ວັນ ຮອງ​ຫົວ​ໜ້າ​ກົມ​ຈັດ​ຕັ້ງ ແລະ ພະ​ນັກ​ງານ ກ​ຊ​ສ ໄດ້ຂຶ້ນ​ອ່ານ ດຳ​ລັດ ຂອງ​ນາ​ຍົກ​ລັດ​ຖະ​ມົນ​ຕີ ວ່າ​ດ້ວຍ​ການ​ອະ​ນຸ​ມັດ​ໃຫ້​ພະ​ນັກ​ງານຂັ້ນ​ສູ​ນ​ກາງ​ຄຸ້ມ​ຄອງ ອອກ​ພັກ​ການ-​ຮັບ​ອຸດ​ໜູນ​ບຳ​ນານ ໂດຍ​ອະ​ນຸ​ມັດ​ໃຫ້ ສະ​ຫາຍ ໄຊ​ຍະ​ເວດ ວິ​ໄຊ ກຳ​ມະ​ການ​ປະ​ຈຳ​ພັກກະ​ຊວງ ປະ​ທານກວດ​ກາ​ພັກ​ກະ​ຊວງ ຫົວ​ໜ້າ​ກົມ​ສິ່ງ​ແວດ​ລ້ອມ ອອກ​ພັກ​ການ-ຮັບ​ອຸດ​ໜູນ​ບຳ​ນານ ແລະ ອ່ານມະ​ຕິ​ຕົກ​ລົງ ຂອງ​ຄະ​ນະ​ເລ​ຂາ​ທິ​ການ​ສູນ​ກາງ​ພັກ ​ວ່າ​ດ້ວຍ​ການບົ່ງ​ຕົວແຕ່ງ​ຕັ້ງ ສະ​ຫາຍ ໄຊ​ນະ​ຄອນ ອິນ​ທະ​ວົງ ​ເປັນປະ​ທານກວດ​ກາ​ພັກ​ກະ​ຊວງ, ​ແຕ່ງ​ຕັ້ງສະ​ຫາຍ ນາງ ທອງ​ຈັນ ອະ​ຄະ​ມາ​ເຂດ ​ເປັນກຳ​ມະ​ການ​ປະ​ຈຳ​ພັກກະ​ຊວງ​ ແລະ ອ່ານ​ດຳ​ລັດ ຂອງ​ນາ​ຍົກ​ລັດ​ຖະ​ມົນ​ຕີ ວ່າ​ດ້ວຍ​ການ​ແຕ່ງ​ຕັ້ງ​ ສະ​ຫາຍ​ ອຸ່ນ​ເຮືອນ ໄຊ​ຍະ​ຈັກ ເປັນຫົວ​ໜ້າ​ກົມ​ສິ່ງ​ແວດ​ລ້ອມ ​ຜູ້​ໃໝ່. ຈາກນັ້ນ,​​ ຍັງໄດ້​ມີ​ການ​ປະ​ກາດ​ການແຕ່ງ​ຕັ້ງ​​ຮອງ​ຫົວ​ໜ້າ​ກົມ ຈຳ​ນວນ​ໜຶ່ງ ແລະ ປະ​ກາດ​ການສ້າງ​ຕັ້ງ​ໜ່ວຍ​ພັກ, ແຕ່ງ​ຕັ້ງຄະ​ນະ​ໜ່ວຍ​ພັກ ຂອງ​​ຄະ​ນະ​ພັກຮາກ​ຖານ ​​ກົມ​ສິ່ງ​ແວດ​ລ້ອມ ແລະ ຄະ​ນະ​ພັກ​ຮາກ​ຖານ ​ກົມ​ກວດ​ກາຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ພ້ອມ​ທັງການ​ບົ່ງ​ຕົວແຕ່ງ​ຕັ້ງ​​ກຳ​ມະ​ການ​ຮາກ​ຖານ​ພັກ, ກຳ​ມະ​ການ​ໜ່ວຍ​ພັກ ທີ່​ມີ​ຕຳ​ແໜ່ງວ່າງ​ ຕາມ​ການ​ປັບ​ປຸງ​​ກົງ​ຈັກ​ການ​ຈັດ​ຕັ້ງ ແລະ ​ການສັບ​ຊ້ອນ​ສະ​ມາ​ຊິກ​ພັກ.
ໃນ​ໂອ​ກາດ​ດ່ງ​ກ່າວ ສະ​ຫາຍ ນາງ ບຸນ​ຄຳ ​ວໍ​ລະ​ຈິດ ກໍ​ໄດ້ໃຫ້ກຽດ​ໂອ້​ລົມ​ ຊຶ່ງ​ສະ​ຫາຍໄດ້​ສະ​ແດງ​ ຄ​ວາມ​ຊົມ​ເຊີຍຕໍ່ສະ​ຫາຍ ​ທີ່​ໄດ້​ສຳ​ເລັດ​ການ​ເຮັດ​ໜ້າ​ທີ່​ການ​ເມືອງ​ຂອງ​ຕົນ ປະ​ກອບ​ສ່ວນ​ເຂົ້າ​ໃນ​ການ​ສ້າງ​ສາ ແລະ ພັດ​ທະ​ນາ​ປະ​ເທດ​ຊາດ ແລະ ກ່າວສະ​ແດງ​ຄວາມ​ຊົມ​ເຊີຍຕໍ່​ບັນ​ດາສະ​ຫາຍທີ່ໄດ້​ຮັບການ​ແຕ່ງ​ຕັ້ງ​ດຳ​ລົງ​ຕຳແໜ່ງ​​ໃໝ່ ຊຶ່ງໄດ້​ເນັ້ນ​ໜັກໃຫ້​ເອົາ​ໃຈ​ໃສ່​ຢ່າງ​ຕັ້ງ​ໜ້າດ້ວຍ​ການ​ເສີມ​ຂະ​ຫຍາຍ​ໃນ​ການ​ຊີ້​ນຳ-ນຳ​ພາ ວຽກ​ງານຂອງຂະ​ແໜງ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ​ກໍ​ຄືການ​ປະ​ຕິ​ບັດ​ໜ້າ​ທີ່​ການ​ເມືອງ​ຂອງ​ຕົນ​ໃຫ້​ສຳ​ເລັດ​ ສຸມ​ໃສ່​ການ​ຈັດ​ຕັ້ງ​ປະ​ຕິ​ບັດ 2 ວາ​ລະ​ແຫ່ງ​ຊາດ ແລະ ວຽກ​ງານ​ຈຸດ​ສຸມ ຂອງ​ຂະ​ແໜງ ຊ​ສ ແຕ່ນີ້​ຮອດ​ປີ 2025 ກໍຄື​ການ​ຜັນ​ຂະ​ຫຍາຍ​ ມະ​ຕິກອງ​ປະ​ຊຸມໃຫຍ່​ຜູ້​ແທນ​ອົງ​ຄະ​ນະ​ພັກ​ກະ​ຊວງ ຄັ້ງ​ທີ II ເພື່ອ​ເຮັດ​ໃຫ້ການ​ຄຸ້ມ​ຄອງ​ປົກ​ປັກ​ຮັກ​ສາ ແລະ ຟື້ນ​ຟູ​ຄືນ-ພັດ​ທະ​ນາ​ຊັບ​ພະ​ຍາ​ກອນ​ທຳ​ມະ​ຊາດ ແລະ ສິ່ງ​ແວດ​ລ້ອມ ໄປ​ຕາມ​ທິດ​ຍືນ​ຍົງ ແລະ ສີ​ຂຽວ.
(ຂ່າວ: ກຊສ, ພາບ: ສຸກສະຫວັນ)
Loading...