ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ (ກຊສ) ໄດ້ຈັດພິທີ ປະກາດແຕ່ງຕັ້ງຮອງລັດຖະມົນຕີ ແລະ ປະກາດພະນັກງານອອກພັກການ-ອຸດໜູນບໍານານໃນວັນທີ 30 ມິຖຸນານີ້ ທີ່ສະໂມສອນຂອງກະຊວງດັ່ງກ່າວ, ພາຍ ໃຕ້ການເປັນປະທານຂອງ ທ່ານ ນາງ ບຸນຄໍາ ວໍລະຈິດ ກໍາມະການສູນກາງພັກ ເລຂາຄະນະພັກ ລັດຖະມົນຕີ ກຊສ ມີພາກ​ສ່ວນ​ກ່ຽວ​ຂ້ອງ​ເຂົ້າຮ່ວມ.
ໃນພິທີ ທ່ານ ທົງສັກ ກົມມະເມືອງ ຮອງຫົວໜ້າກົມຄຸ້ມຄອງພະນັກງານ ຄະນະຈັດຕັ້ງສູນກາງພັກ ໄດ້ຂຶ້ນ ຜ່ານດໍາລັດ ຂອງນາຍົກລັດຖະມົນຕີ ວ່າດ້ວຍການແຕ່ງຕັ້ງຮອງລັດຖະມົນຕີ ກະຊວງຊັບພະຍາກອນທໍາມະຊາດ ແລະ ສິ່ງ ແວດ ລ້ອມຄົນໃໝ່ ໃນຈໍານວນ 2 ທ່ານ ຄື: 1) ທ່ານ ຈັນທະເນດ ບົວລະພາ, 2) ທ່ານ ພູວົງ ຫຼວງໄຊຊະນະ ແລະ ​ຜ່ານດໍາລັດ ຂອງນາຍົກລັດຖະມົນຕີ ວ່າດ້ວຍການອະນຸມັດໃຫ້ພະນັກງານ ອອກພັກການ-ຮັບອຸດໜູນບໍານານ ຈໍານວນ 1 ທ່ານ ຄື: ທ່ານ ຄໍາພາ ພົມມະໄກສອນ ກໍາມະການພັກກະຊວງ ຫົວໜາກົມກວດກາ ກະຊວງຊັບພະຍາກອນທໍາມະຊາດ ແລະ ສິ່ງແວດລ້ອມ.
ໃນພິທີ, ຍັງໄດ້ຮັບຟັງຄໍາໂອ້ລົມ ຂອງທ່ານ ນາງ ບຸນຄໍາ ວໍລະຈິດ ຊຶ່ງໄດ້ສະແດງຄວາມຊົມເຊີຍຕໍ່ 2 ທ່ານ ທີ່ໄດ້ຮັບການແຕ່ງຕັ້ງດໍາລົງຕໍາແໜ່ງເປັນຮອງລັດຖະ ມົນຕີ ກະຊວງ ກ​ຊ​ສ ໂດຍໄດ້ເນັ້ນໜັກໃຫ້ເອົາໃຈໃສ່ຢ່າງຕັ້ງໜ້າດ້ວຍການເສີມຂະ ຫຍາຍໃນການຊີ້ນໍາ-ນໍາພາ ວຽກງານຂອງ ກຊສ ກໍຄືການປະຕິບັດໜ້າທີ່ການເມືອງຂອງຕົນໃຫ້ສໍາເລັດເປັນກ້າວໆ ແລະ ເຮັດໃຫ້ຂະແໜງຊັບ ພະຍາກອນທໍາມະຊາດ ແລະ ສິ່ງແວດລ້ອມ ມີຜົນສໍາເລັດຕາມ​ຈຸດ​ປະ​ສົງໃນຕໍ່ໜ້າ, ພ້ອມດຽວກັນນັ້ນ ທ່ານໄດ້ສະແດງ ຄວາມຍ້ອງຍໍຊົມເຊີຍຕໍ່ຜົນງານຂອງ ທ່ານ ຄໍາພາ ພົມມະໄກສອນ ທີ່ໄດ້ເຂົ້າຮັບອຸດໜູນບໍານານ ຕາມນະ ໂຍບາຍຂອງພັກ-ລັດ ຊຶ່ງ​ໄລ​ຍະ​ຜ່ານ​ມາໄດ້ປະສ່ວນອຸທິດກໍາລັງແຮງ, ສະ​ຕິ​ປັນ​ຍາ ແລະ ມັນ​ສະ​ໝອງເຂົ້າໃນການ​ປະ​ຕິ​ບັດ​ໜ້າທີ່ວຽກງານ ຮັບໃຊ້ຊາດ ກໍຄືການເຮັດໜ້າທີ່ການປະຕິວັດ ຢ່າງສໍາເລັດຜົນ.
ນອກຈາກນັ້ນ, ໃນພິທີຄັ້ງນີ້ ຍັງໄດ້ມີການມອບ-ຮັບ ຮູບ​ແຕ້ມສີນໍ້າມັນໃສ່ຂອບສີຄໍາ ຂອງປະທານປະເທດແຫ່ງ ສປປ ລາວ ແຕ່ອະດີດຈົນເຖິງປັດຈຸບັນ ຊຶ່ງແມ່ນທ່ານ ປຣະເສີດ ບັນຈົງພັກດີ ປະທານບໍລິສັດຫຍ້າສີຟ້າ ມອບເປັນຂອງຂວັນແກ່ ກຊສ ແລະ ເປັນກຽດກ່າວຮັບແມ່ນ ທ່ານ ນາງ ບຸນຄໍາ ວໍລະຈິດ, ພ້ອມ​ທັງສະແດງຄວາມຊົມເຊີຍຕໍ່ ບໍລິສັດ​ ຫຍ້າສີຟ້າ ທີ່ໄດ້ນໍາຮູບ​ພາບ ຈໍານວນ 8 ຮູບມາ​ມອບ ໃຫ້ ກຊສ.
Loading...