ກະຊວງການຕ່າງປະເທດ (ກຕທ) ແລະ ຄະນະພົວພັນຕ່າງປະເທດສູນກາງພັກ (ຄຕພ) ຮ່ວມກັບ ທູຕານຸທູດ ແລະ ອົງ ການຈັດຕັ້ງສາກົນ ປະຈຳລາວ ຈັດພິທີບາສີສູ່ຂວັນສະເຫຼີມສະຫຼອງບຸນປີໃໝ່ລາວ.
ພິທີ ຈັດຂຶ້ນໃນວັນທີ 7 ເມສາ 2023 ທີ່ສວນພຶກສາ, ນະຄອນຫຼວງວຽງຈັນ ເນື່ອງໃນໂອກາດສົ່ງທ້າຍປີເກົ່າ ພ.ສ 2565 ແລະ ຕ້ອນຮັບປີໃໝ່ ພ.ສ 2566 ໂດຍມີ ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນ ຕີກະ ຊວງການຕ່າງປະເທດ, ຄະນະພັກ-ຄະນະນຳກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ, ບັນດາທູຕານຸທູດ, ກົງສູນກິດຕິມະສັກ, ຜູ້ຕາງໜ້າອົງການຈັດຕັ້ງສາກົນ ປະຈຳ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ໂອກາດດັ່ງກ່າວ, ທ່ານ ສະເຫຼີມໄຊ ກົມມະສິດ ຕາງໜ້າໃຫ້ຄະນະພັກ, ຄະນະນຳກະຊວງການຕ່າງປະເທດ ແລະ ຄະນະພົວພັນຕ່າງປະເທດສູນກາງພັກ ມີຄຳເຫັນອວຍພອນປີໃໝ່ລາວ ໃຫ້ແກ່ບັນດາພະນັກງານ ແລະ ແຂກທີ່ເຂົ້່າຮ່ວມດ້ວຍຄວາມຮັກແພງ ແລະ ສະໜິດສະໜົມ ຊຶ່ງການຈັດພິທີສະເຫຼີມສະຫຼອງໃນຄັ້ງນີ້ ກໍຖື ເປັນອີກໜຶ່ງເວທີໃນການເຜີຍແຜ່ຮີດຄອງປະເພນີ ແລະ ວັດທະນະທຳອັນດີງາມຂອງລາວເຮົາ ທີ່ມີມາແຕ່ດົນນານ ອອກສູ່ສາຍຕາສາກົນ ແລະ ເຊີນຊວນບັນດານັກທ່ອງທ່ຽວຕ່າງປະເທດ ໃຫ້ເຂົ້າມາຢ້ຽມ ຢາມ ສປປ ລາວ ນັບມື້ຫຼາຍຂຶ້ນ. ທ່ານຮອງນາຍົກລັດຖະມົນຕີ ຍັງໄດ້ສະແດງຄວາມຮູ້ບຸນຄຸນ ແລະ ຂອບໃຈ ທຸກໆທ່ານ ຕໍ່ໄມຕີຈິດມິດຕະພາບອັນແໜ້ນແຟ້ນ, ການສະໜັບສະໜູນອັນລໍ້າຄ່າ ແລະ ການຮ່ວມມືຢ່າງຕໍ່ເນື່ອງ ທີ່ມີຕໍ່ກະຊວງການຕ່າງປະເທດ ກໍຄື ສປປ ລາວ ຈາກບັນດາປະເທດເພື່ອນມິດ ແລະ ອົງການຈັດຕັ້ງສາກົນ ໃນໄລຍະຜ່ານມາ, ໂດຍສະເພາະແມ່ນການຊ່ວຍ ເຫຼືອ ສປປ ລາວ ຢ່າງທັນການໃນການຮັບມືກັບການແຜ່ລະບາດຂອງພະຍາດໂຄວິດ-19 ໃນຊຸມປີຜ່ານມາ ແລະ ຫວັງຢ່າງຍິ່ງວ່າ ຈະສືບຕໍ່ໄດ້ຮັບການສະໜັບສະໜູນ ແລະ ຮ່ວມມືຈາກທຸກພາກສ່ວນ ທັງພາຍໃນ ແລະ ຕ່າງປະເທດ ເພື່ອບັນລຸໄດ້ຜົນ ສຳເລັດແຜນພັດທະນາເສດຖະ ກິດ- ສັງຄົມຂອງ ສປປ ລາວ ໃນຕໍ່ໜ້າ ໂດຍສະເພາະ ເພື່ອບັນລຸເປົ້າໝາຍຫຼຸດພົ້ນອອກຈາກບັນຊີປະເທດດ້ອຍພັດທະນາໃນປີ 2026 ແລະ ການກະກຽມໃຫ້ແກ່ການເປັນປະທານອາຊຽນ ປີ 2024 ນີ້.
ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ ໄດ້ອວຍພອນໄຊອັນປະ ເສີດໃຫ້ແຂກທີ່ເຂົ້າຮ່ວມງານ ຈົ່ງມີສຸຂະພາບເຂັ້ມແຂງ, ມີພະລະນາໄມສົມບູນ, ມີຜົນສໍາເລັດອັນໃໝ່ໃນໜ້າທີ່ວຽກງານ, ມີຄວາມຜາສຸກໃນຊີວິດ ຂອງຕົນ ແລະ ຄອບຄົວ ທຸກປະການຕະຫຼອດປີ ພ.ສ 2566 ນີ້, ຈົ່ງຮ່ວມກັນປະຕິບັດໜ້າທີ່ດ້ວຍຜົນສຳເລັດ ແລະ ນຳເອົາຜົນປະໂຫຍດສູງສຸດມາສູ່ປະເທດຊາດ ແລະ ປະຊາຊົນຂອງຕົນ. ຈາກນັ້ນ, ກໍໄດ້ມີພິທີບາສີສູ່ຂວັນ ອວຍພອນປີໃໝ່ຊຶ່ງກັນ ແລະ ກັນ ຕາມຮີດຄອງປະເພນີ ແລະ ຮ່ວມຮັບປະທານອາຫານທ່ຽງ, ຊົມການສະແດງ ສິລະປະ ແລະ ປະກອບສ່ວນມ່ວນຊື່ນຮ່ວມກັນຢ່າງຄຶກຄື້ນ, ດ້ວຍໄມຕີຈິດມິດຕະພາບອັນດີ ແລະ ມີຄວາມ ໝາຍສຳຄັນ ຊຶ່ງເຮັດໃຫ້ພິທີສະຫຼອງປີໃໝ່ ພ.ສ 2566 ຄັ້ງນີ້ ມີບັນຍາກາດຟົດຟື້ນມ່ວນຊື່ນ ແລະ ຈົບງາມ.
ພາບ: ເກດສະໜາ
