ທ່ານພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ຜູ້ປະຈໍາການຄະນະສະເພາະກິດຄວບຄຸມພະຍາດໂຄວິດ19 ຖະແຫລງຕໍ່ສື່ມວນຊົນ ຕອນບ່າຍວັນທີ 21 ຕຸລາ 2020 ເຖິງສະພາບການຄວບຄຸມພະຍາດໂຄວິດ19 ຢູ່ລາວວ່າ: ໃນວັນທີ 20 ຕຸລາ2020, ໄດ້ເກັບຕົວຢ່າງມາກວດວິເຄາະທັງໝົດ 303 ຄົນ, ໃນນັ້ນມີແຮງງານລາວມາແຕ່ໄທ 117 ຕົວຢ່າງ, ແຮງງານຈີນ 13 ຕົວຢ່າງ, ແຮງງານຫວຽດນາມ 55 ຕົວຢ່າງ, ແຮງງານໄທ 18 ຕົວຢ່າງ ແລະບຸກຄົນທົ່ວໄປທີ່ບໍ່ມີອາການ 100 ຕົວຢ່າງ; ຜົນກວດວິເຄາະທັງໝົດແມ່ນ ພົບຜູ້ຕິດເຊື້ອຈຳນວນ 1 ຕົວຢ່າງລາຍລະອຽດດັ່ງນີ້:
– ເພດຊາຍ, ອາຍຸ 23 ປີ, ສັນຊາດ: ລາວ, ອາໄສຢູ່ເມືອງຈັນທະບູລີ, ນະຄອນຫຼວງວຽງຈັນ, ອາຊີບ:ນັກສຶກສາລາວຮຽນຢູ່ ສ ຣັດເຊຍ, ຜູ້ກ່ຽວຈຳກັດບໍລິເວນຢູ່ສູນທີ່ຄະນະສະ
ເພາະກິດກຳນົດໄວ້ ແລະຢູ່ໃນຫ້ອງຄົນດຽວ.
ຕາມການບອກເລົ່າຂອງຜູ້ກ່ຽວ:
– ວັນທີ 2-3 ກັນຍາ 2020
ຜູ້ກ່ຽວມີອາການໄຂ້, ໄອ, ເມື່ອຍ ແລະ ດັງບໍ່ໄດ້ກິ່ນ, ຜູ້ກ່ຽວໄດ້ຈຳກັດບໍລິເວນຕົນເອງຢູ່ຫ້ອງ ໃນຫໍພັກ ແລະ ບໍ່ໄດ້ໄປພົບແພດ. ປະມານ 1 ອາທິດ ຜູ້ກ່ຽວມີອາການດີຂຶ້ນ ແຕ່ຍັງສືບຕໍ່ມີ ອາການດັງບໍ່ໄດ້ກິ່ນ.
– ວັນທີ 6 ຕຸລາ 2020
ຜູ້ກ່ຽວມີຈຸດປະສົງຢາກເດີນທາງກັບ ສປປ ລາວ, ຈຶ່ງໄດ້ເດີນທາງໄປກວດຢູ່ໂຮງໝໍ.
– ວັນທີ 9 ຕຸລາ 2020
ຜົນກວດພົບເຊື້ອພະຍາດ COVID-19, ຈຶ່ງໄດ້ເດີນທາງໄປຈໍາກັດບໍລິເວນຕົນເອງຢູ່ສູນ, ທາງ ໂຮງຮຽນຈຶ່ງໄດ້ແຈ້ງສະຖານທູດລາວປະຈໍາຣັດເຊຍ.
– ວັນທີ 12 ຕຸລາ 2020 ຜົນກວດບໍ່ພົບເຊື້ອພະຍາດ COVID-19, ຜູ້ກ່ຽວຈຶ່ງໄດ້ເດີນທາງກັບມາຫໍພັກ ເພື່ອກຽມ ໂຕຂຶ້ນຍົນບິນກັບ ສປປ ລາວ.
– ວັນທີ 14 ຕຸລາ 2020 ເດີນທາງອອກຈາກຫໍພັກ ໄປເມືອງ Moscow, ສ ຣັດເຊຍ.
– ວັນທີ 15 ຕຸລາ 2020 ເດີນທາງອອກຈາກເມືອງ Moscow, ສ ຣັດເຊຍມາຫາ Paris, ປະເທດຝຣັ່ງ.
– ວັນທີ 16 ຕຸລາ 2020 ເດີນທາງອອກຈາກ Parisປະເທດຝຣັ່ງມາຮອດ Incheon ສ ເກົາຫຼີ
– ວັນທີ 17 ຕຸລາ 2020 ເດີນທາງອອກຈາກ ສະໜາມບິນ Incheon ສ ເກົາຫຼີ ມາສະໜາມບິນວັດໄຕ.
– ວັນທີ 18 ຕຸລາ 2020 ມາຮອດ ສປປ ລາວ ໄດ້ຖືກເກັບຕົວຢ່າງເພື່ອກວດຫາເຊື້ອພະຍາດໂຄວິດ-19.
– ວັນທີ 20 ຕຸລາ 2020 ຜົນກວດ ແມ່ນພົບເຊື້ອພະຍາດ COVID-19.
ຜູ້ໂດຍສານທີ່ເດີນທາງຮ່ວມກັບຜູ້ກ່ຽວມີທັງໜົດ 122 ຄົນ, ລວມທັງຜູ້ກ່ຽວນຳເຊິ່ງທັງໝົດ ແມ່ນໄດ້ເກັບຕົວຢ່າງ ໄປວິເຄາະຫາເຊື້ອ ແຕ່ບໍ່ພົບເຊື້ອ, ຍົກເວັ້ນຜົນກວດຂອງຜູ້ກ່ຽວແມ່ນກວດພົບເຊື້ອCOVID-19.
ສຳລັບຜູ້ສຳຜັດໃກ້ຊິດກັບຜູ້ກ່ຽວມີທັງໝົດ 27 ຄົນ (ໃນນັ້ນມີ 14 ຄົນ ນັ່ງຕັ່ງນ້ຳເບີໃກ້ກັບ
ຜູ້ກ່ຽວໃນໄລຍະຢູ່ໃນຍົນແລະອີກ13 ຄົນແມ່ນຂີ່ລົດເມຄັນດຽວກັນເພື່ອເດີນທາງໄປຍັງສະຖານທີ່ຈຳກັດບໍລິເວນທີ່ຖືກກຳນົດໄວ້.
ຜູ້ສຳຜັດໃກ້ຊິດທັງໝົດແມ່ນໄດ້ຖືກເກັບຕົວຢ່າງ, ໄປວິເຄາະຫາເຊື້ອ ແຕ່ຜົນກວດແມ່ນບໍ່ພົບເຊື້ອ ແລະໄດ້ຖືກຈຳກັດບໍລິເວນຢູ່ສະຖານທີ່ ທີ່ຄະນະສະເພາະກິດກຳນົດໄວ້ຈົນຄົບກຳນົດ 14 ວັນ.
ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 20 ຕຸລາ 2020 ໄດ້ເກັບຕົວຢ່າງມາກວດທັງໝົດ 61,699ຕົວຢ່າງ, ກວດພົບເຊື້ອສະສົມ 24ຄົນ. ປະຈຸບັນ, ຄົນເຈັບຕິດເຊື້ອພະຍາດ COVID-19 ກໍລະນີ ທີ 23 ແລະ 24 (ຜູ້ຕິດເຊື້ອໃໝ່) ແມ່ນປີ່ນປົວຢູ່ໂຮງໝໍມິດຕະພາບ.

Loading...