ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກວດພົບຜູ້ຕິດເຊື້ອພະຍາດ ໂຄວິດ-19 ເພີ່ມອີກ 1 ຄົນ ເປັນຊາວຕ່າງປະເທດທີ່ເຮັດວຽກຢູ່ບໍລິສັດພູເບ້ຍມາຍນິ່ງ:

ສປປ ລາວ ໄດ້ພົບກໍລະນີຜູ້ຕິດເຊື້ອພະຍາດໂຄວິດ-19 ເພີ່ມອີກ 1 ຄົນ ຈາກການກວດ ຕົວຢ່າງທັງໝົດ 31 ຄົນ ໃນວັນທີ 4 ເມສາ 2020 ຜ່ານມາ, ຊຶ່ງຜົນກວດແມ່ນພົບຜູ້ຕິດເຊື້ອ 01 ຄົນ ຊຶ່ງແມ່ນກໍລະນີນໍາເຂົ້າຄືເປັນພະນັກງານບໍລິສັດພູເບ້ຍ ເພດຊາຍ ອາຍຸ 55 ປີ, ສັນຊາດ ປາປົວນິວກີເນຍ; ຜູ້ກ່ຽວໄດ້ເດີນທາງຈາກ ປາປົວນິວກີເນຍ ໂດຍມີປະຫວັດການເດີນທາງຜ່ານ: ສິງກະໂປ ວັນທີ 21/3/20; ວັນທີ 22/3/20 ຢູ່ສິງກະໂປ; ວັນທີ 23/3/20 ເດີນທາງເຂົ້າມາລາວ ຜ່ານສະໜາມບິນປະເທດໄທ; ວັນທີ 23-24/03/2020 ພັກຢູ່ໂຮງແຮມຄຣາວພາຊາ, ນະຄອນຫຼວງວຽງຈັນ; ວັນທີ 25 /03/2020 ເດີນທາງໂດຍທາງລົດໄປບໍລິສັດໄປພູເບ້ຍມາຍນິງ, ມີ 11 ຄົນ ໃກ້ຊິດ; ພົວພັນຢູ່ບ່ອນເຮັດວຽກກັບປະມານ 100 ຄົນ; ວັນທີ 3/4/20 ຜູ້ກ່ຽວເລີ່ມມີອາການໄຂ້, ໄອ, ເຈັບຄໍ, ເຈັບຫົວ ແລະ ວັນທີ 4/4/2020 ເວລາ 10:00 ໂມງ ຜູ້ກ່ຽວເຂົ້າມາກວດຢູ່ ໂຮງໝໍມິດຕະພາບ ແລະ ໄດ້ເກັບຕົວຢ່າງມາກວດ ແລະ ພົບວ່າຕິດເຊື້ອ ໂຄວິດ-19.

ປະຈຸບັນ, ຜູ້ກ່ຽວແມ່ນນອນປິ່ນປົວຢູ່ຫ້ອງແຍກປ່ຽວ ຢູ່ໂຮງໝໍມິດຕະພາບ. ໃນໂອກາດຖະແຫລງຂ່າວກ່ຽວກັບສະພາບການແຜ່ລະບາດຂອງພະຍາດໂຄວິດ-19 ປະຈຳວັນ, ທີ່ກະຊວງສາທາລະນະສຸກ, ນະຄອນຫຼວງວຽງຈັນ, ທ່ານຮສຈ ປອ ພູທອນ ເມືອງປາກ, ຮອງລັດຖະມົນຕີກະຊວງສາທາລະນະສຸກ ທັງເປັນຜູ້ປະຈຳການຄະນະສະເພາະກິດເພື່ອປ້ອງກັນຄວບຄຸມ ແລະ ແກ້ໄຂພະຍາດໂຄວິດ-19 ແຈ້ງໃຫ້ຮູ້ວ່າ: ຜູ້ຕິດເຊື້ອກໍລະນີ ຫລ້າສຸດນີ້ ແມ່ນມີປະຫວັດສຳຜັດ ແລະ ພົວພັນກັບຄົນທີ່ບ່ອນເຮັດວຽກ ປະມານ 100 ຄົນ, ຊຶ່ງກໍ່ໄດ້ແນະນຳໃຫ້ຈຳກັດບໍລິເວນຜູ້ກ່ຽວເພື່ອເຝົ້າລະວັງຕິດຕາມອາການ.

ທ່ານຮອງລັດຖະມົນຕີກະຊວງສາທາລະນະສຸກ ຍັງເນັ້ນໜັກໃຫ້ທຸກພາກສ່ວນທີ່ເຮັດວຽກ ຮ່ວມກັບຜູ້ຕິດເຊື້ອທີ່ 11 ນີ້ ຈົ່ງຕື່ນຕົວ ແລະກັກກັນຕົນເອງ ບໍ່ໃຫ້ມີການພົວພັນກັບບຸກຄົນອື່ນ ພ້ອມເອົາໃຈໃສ່ຈັດຕັ້ງປະຕິບັດຄຳສັ່ງເລກທີ 06 ຂອງນາຍົກລັດຖະມົນຕີທີ່ເລີ່ມມີຜົນບັງຄັບໃຊ້ນັບແຕ່ວັນທີ 1 ເມສານີ້ເປັນຕົ້ນມານັ້ນ ໃຫ້ເກີດປະສິດທິຜົນ, ໂດຍແນະນໍາໃຫ້ພະນັກງານລັດຖະກອນຜູ້ທີ່ພັກວຽກ, ພັກການແລະ ປະຊາຊົນທົ່ວໄປ ໃຫ້ຈຳກັດຕົນເອງຢູ່ເຮືອນຢ່າງຈິງຈັງດ້ວຍວິທີການທີ່ເໝາະສົມ.