ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກວດພົບຜູ້ຕິດເຊື້ອໂຄວິດ19 ທີ່ເດີນທາງມາຈາກ ສ. ເກົາຫລີ 1 ກໍລະນີ ເປັນເພດຊາຍ ອາຍຸ 32 ປີ

ຂະນະທີ່ ສປປ ລາວ ສາມາດຄວບຄຸມ ແລະປ້ອງກັນໂຄວິດ19 ບໍ່ພົບຜູ້ຕິດເຊື້ອ ມາໄດ້ 102ມື້ ມາຮອດວັນທີ 23 ກໍລະກົດ ໄດ້ກວດພົບຜູ້ຕິດເຊື້ອ 1ຄົນ ທີ່ພວມກັກຕົວເພື່ອຕິດຕາມ.

ຮສ. ດຣ. ພູທອນ ເມືອງປາກ ຮອງລັດຖະມົນຕີ, ກະຊວງສາທາລະນະສຸກ, ຜູ້ປະຈຳການຄະນະສະເພາະກິດ ຖະແຫລງໃຫ້ຮູ້ຕອນແລງວັນທີ 24 ກໍລະກົດ 2020ນີ້ ເຖິງວຽກງານເຝົ້າລະວັງ COVID-19 ຢູ່ ສປປ ລາວວ່າ:  ຮອດເວລາ 17 ໂມງ ວັນທີ 23 ກໍລະກົດ 2020 ທົ່ວປະເທດມີຜູ້ເດີນທາງເຂົ້າມລາວທັງໝົດ 1,994 ຄົນ ໃນນັ້ນຈຸດຜ່ານດ່ານລາວ-ໄທ 1,327 ຄົນ ມີແຮງງານລາວກັບມາແຕ່ໄທ 154 ຄົນ, ຈຸດຜ່ານດ່ານລາວ – ຈີນ 66 ຄົນ ໃນນີ້ມີ ແຮງງານຈີນ 40 ຄົນ, ແຮງງານລາວ 2 ຄົນ, ເຫຼືອນັ້ນ ແມ່ນຄົນຂັບລົດຂົນສົ່ງສິນຄ້າ, ຈຸດຜ່ານດ່ານລາວ – ຫວຽດນາມ 601 ຄົນ, ໃນນີ້ ມີນັກສຶກສາລາວ 28 ຄົນ , ເຫຼືອນັ້ນ ແມ່ນຄົນຂັບລົດສົ່ງສິນຄ້າ, ທຸກຄົນແມ່ນໄດ້ແທກອຸນຫະພູມຮ່າງກາຍ,  ແລະ ເກັບຕົວຢ່າງມາກວດ ແລ້ວນຳສົ່ງໄປ​ຫາສະຖານທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ຮອງລັດຖະມົນຕີກະຊວງສາທາລະນະສຸກ ໃຫ້ຮູ້ເຖິງວຽກງານເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດວ່າ: ວັນທີ 23 ກໍລະກົດ 2020, ໄດ້ເກັບຕົວຢ່າງມາກວດວິເຄາະທັງໝົດ 425 ຄົນ, ໃນນັ້ນແຮງງານລາວມາແຕ່ໄທ 143 ຄົນ, ແຮງງານຈີນ 225 ຄົນ ແລະ ບຸກຄົນທົ່ວໄປທີ່ບໍ່ມີອາການ 57 ຄົນ; ຜົນກວດວິເຄາະທັງໝົດ ມີ  1 ກໍລະນີ ພົບເຊື້ອ COVID-19 ຄື: ເພດຊາຍ ອາຍຸ 32 ປີ, ສັນຊາດ ສ. ເກົາຫຼີ, ອາຊີບ: ວິຊາການໄຟຟ້າ, ເຮັດວຽກຢູ່ເຂື່ອນໄຟຟ້ານໍ້າງຽບ ຜູ້ກ່ຽວຍັງຢູ່ໃນໄລຍະການຈໍາກັດບໍລິເວນ ທີ່ໂຮງແຮມຂອງຄະນະສະເພາະກິດໄດ້ກຳນົດໄວ້ໃນນະຄອນຫຼວງວຽງຈັນ.

ຕາມການລາຍງານຂອງຜູ້ກ່ຽວ ກ່ອນເດີນທາງມາ ສປປ ລາວ ຜູ້ກ່ຽວບໍ່ມີອາການຫຍັງ ແລະ ໄດ້ກວດຊອກຫາເຊື້ອ COVID-19 ດ້ວຍ RT-PCR ໃຫ້ຜົນລົບ; ກ່ອນເດີນທາງມາປະເທດລາວ, ຜູ້ກ່ຽວອາໄສຢູ່ນຳຄອບຄົວ ບໍ່ມີພີ່ນ້ອງເປັນພະຍາດ COVID-19;

ປະຫວັດການເດີນທາງ:  ວັນທີ 18 ກໍລະກົດ 2020  ເດີນທາງຈາກປະເທດຍີ່ປຸ່ນ (ໂອສະກາ ຫາ ໂຕກຽວ) ມາຜ່ານ ສ. ເກົາຫຼີ (ອິນຊອນ) ມາ ສປປ ລາວ ຜ່ານດ່ານສະໜາມບິນວັດໄຕ, ໂດຍຖ້ຽວບິນ QV922A, ນ້ຳເບີຕັ່ງ: 015E;

  • ເດີນທາງມາກັບກຸ່ມໝູ່ 4 ຄົນ, ໃນຖ້ຽວບິນ ມີຜູ້ໂດຍສານທັງໝົດ 109 ຄົນ; ເດີນທາງຈາກສະໜາມບິນມາໂຮງແຮມ ດ້ວຍລົດຕູ້ ມີທັງໝົດ 6 ຄົນ ລວມທັງຜູ້ກ່ຽວ; ມີຜູ້ສຳຜັດໃກ້ຊິດ ໃນເບື້ອງຕົນມີ 17 ຄົນ;
  • ນັບແຕ່ວັນທີ 18 ຫາ 23 ກໍລະກົດ 2020, ຜູ້ກ່ຽວບໍ່ໄດ້ເດີນທາງອອກຈາກຫ້ອງ, ກິນອາຫານຢູ່ໃນຫ້ອງ ໂດຍມີພະນັກງານນຳອາຫານ, ນ້ຳດື່ມມາປະໄວ້ໜ້າຫ້ອງໃຫ້ ແລະ ບໍ່ມີໃຜເຂົ້າໄປໃນຫ້ອງ. ພະນັກງານໂຮງແຮມໄດ້ແທກອຸນຫະພູມໃຫ້ຜູ້ກ່ຽວທຸກໆມື້ ເຊົ້າ-ແລງ ທີ່ໜ້າຫ້ອງ ໂດຍຮັກສາໄລຍະຫ່າງ 1 ແມັດ (ອຸນຫະພູມສະເລ່ຍ 36,3 – 36,6 ອົງສາເຊ);
  • ຕາມກົດລະບຽບຂອງໂຮງແຮມ ບໍ່ອະນຸຍາດໃຫ້ພະນັກງານອະນາໄມ ເຂົ້າໄປທຳຄວາມສະອາດ ໃນຫ້ອງນອນ, ຜູ້ກ່ຽວຕ້ອງຮັບຜິດຊອບເອງ ແລະ ໂຮງແຮມໄດ້ຈັດກຽມອຸປະກອນທີ່ຈຳເປັນໄວ້ໃນຫ້ອງພັກຈົນຄົບກຳນົດ 14 ວັນ;
  • ວັນທີ 22 ກໍລະກົດ 2020 ທີມງານສູນວິເຄາະ ແລະ ລະບາດວິທະຍາ ຮ່ວມກັບ ພະແນກສາທານະຄອນຫຼວງ, ຫ້ອງການສາທາເມືອງສີໂຄດຕະບອງ ໄດ້ໄປເກັບຕົວຢ່າງຢູ່ໂຮງແຮມດັ່ງກ່າວ;
  • ວັນທີ 23 ກໍລະກົດ 2020 ເວລາປະມານ 21:00 ໂມງ ຜົນກວດວິເຄາະ ແມ່ນພົບເຊື້ອ COVID-19. ຫຼັງຈາກນັ້ນ ຄະນະສະເພາະກິດໄດ້ນໍາສົ່ງຄົນເຈັບດັງກ່າວໄປປິ່ນປົວທີ່ໂຮງໝໍມິດຕະພາບ;

ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 23 ກໍລະກົດ 2020 ໄດ້ເກັບຕົວຢ່າງມາກວດທັງໝົດ 24,479 ຕົວຢ່າງ, ກວດພົບເຊື້ອສະສົມ 20 ຄົນ.