ເມື່ອບໍ່ດົນມານີ້, ເຈົ້າໜ້າທີ່ຈາກຂະແໜງປູກຝັງ ພະແນກກະສິກໍາ ແລະ ປ່າໄມ້ ແຂວງຄໍາມ່ວນ ໄດ້ລົງເກັບຕົວຢ່າງ ຝຸ່ນເຄມີ (ປຸ໋ຍ) ຈາກບັນດາບໍລິສັດນໍາເຂົ້າ ແລະ ຮ້ານຈໍາໜ່າຍ ພາຍໃນ 4 ຕົວເມືອງ ຄື: ເມືອງທ່າແຂກ, ໜອງບົກ, ຫີນບູນ ແລະ ເຊບັ້ງໄຟ ເພື່ອນໍາໄປວິໄຈຫາທາດອາຫານພືດ ທີ່ບັນຈຸໃນຝຸ່ນເຄມີ ວ່າມີຄຸນະພາບຖືກຕ້ອງ ແລະ ຄົບຖ້ວນຕາມມາດຕະຖານ ຫລື ບໍ່.
ຜ່ານການຈັດຕັ້ງປະຕິບັດຕົວຈິງ ຂອງເຈົ້າໜ້າທີ່ໄດ້ເກັບຕົວຢ່າງທັງໝົດ 7 ຕົວຢ່າງ ແລ້ວສົ່ງໃຫ້ສູນວິໄຈດິນ, ພືດ ແລະ ຝຸ່ນ (ກົມຄຸ້ມຄອງ ແລະ ພັດທະນາທີ່ດິນກະສິກໍາ ກະຊວງກະສິກຳ ແລະ ປ່າໄມ້) ເພື່ອເຮັດການວິໄຈ, ເຊິ່ງວ່າຜົນຂອງການວິໄຈດັ່ງກ່າວອອກມາ ໃນ 07 ຕົວຢ່າງນັ້ນ ລວມມີ 2 ຕົວຢ່າງ ທີ່ບໍ່ໄດ້ຕາມມາດຕະຖານ.
ຕໍ່ບັນຫາດັ່ງກ່າວ ທາງເຈົ້າໜ້າທີ່ ກໍໄດ້ແຈ້ງເຕືອນໄປຫາ ບໍລິສັດ ແລະ ຮ້ານຈໍາໜ່າຍ ເພື່ອບໍ່ໃຫ້ນໍາເຂົ້າ ແລະ ຈໍາໜ່າຍຝຸ່ນເຄມີ (ປຸ໋ຍ) ທີ່ບໍ່ມີຄຸນນະພາບ ຕາມມາດຕະຖານສາກົນ ພ້ອມກັນນັ້ນ ເຈົ້າໜ້າທີ່ຍັງຈະໄດ້ສືບຕໍ່ຕິດຕາມກວດກາ ການນໍາເຂົ້າ ແລະ ຈໍາໜ່າຍຝຸ່ນເຄມີ (ປຸ໋ຍ) ຢ່າງເຄັ່ງຄັດໃນຕໍ່ໜ້າ ເພື່ອຜົນປະໂຫຍດ ຂອງພໍ່ແມ່ປະຊາຊົນ ກໍຄືກະສິກອນລາວ.
