ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກວດວິເຄາະຫາເຊື້ອ 408ຄົນ ພົບຜູ້ຕິດເຊື້ອພະຍາດໂຄວິດ19 ເພີ່ມອີກ 1ຄົນ.

ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ.ຄະນະສະເພາະກິດ ຄວບຄຸມໂຄວິດ19 ຖະແຫລງຕໍ່ສື່ມວນຊົນ ຕອນເຊົ້າວັນທີ 11 ກັນຍານີ້ ທີ່ກະຊວງສາທາລະນະສຸກ ເຖິງວຽກງານເຝົ້າລະວັງ COVID-19 ຢູ່ ສປປ ລາວ ວ່າ: ຮອດເວລາ 17 ໂມງແລງ ວັນທີ 10 ກັນຍາ 2020 ການຕິດຕາມຜູ້ເດີນທາງຈາກຈຸດຜ່ານແດນຕ່າງໆ ທົ່ວປະເທດມີຜູ້ເດີນທາງເຂົ້າມາລາວມີທັງໝົດ 3,296 ຄົນ: ໃນນັ້ນຈຸດຜ່ານດ່ານ ລາວ-ໄທ 1,496 ຄົນ ມີແຮງງານລາວກັບມາແຕ່ໄທ 172 ຄົນ, ຈຸດຜ່ານດ່ານ ລາວ – ຈີນ 9 ຄົນ, ໃນນີ້ ມີຄົນລາວກັບມາຢ້ຽມຢາມຄອບຄົວ 1 ຄົນ, ເຫຼືອນັ້ນ ແມ່ນຄົນຂັບລົດສົ່ງສິນຄ້າ; ຈຸດຜ່ານດ່ານ ລາວ – ຫວຽດນາມ 1,619 ຄົນ, ໃນນີ້ ມີນັກສຶກສາລາວ 52 ຄົນ, ລັດຖະການ 4 ຄົນ ຜ່ານດ່ານນໍ້າພາວ, ແຂວງບໍລິຄໍາໄຊ; ຄົນລາວກັບມາແຕ່ປິ່ນນປົວ 1 ຄົນ ຜ່ານດ່ານປາງຫົກ, ແຂວງຜົ້ງສາລີ; ເຫຼືອນັ້ນ ແມ່ນຄົນຂັບລົດສົ່ງສິນຄ້າ, ສ່ວນຫຼາຍ ແມ່ນເຂົ້າມາປ່ຽນຖ່າຍສິນຄ້າ ແລະ ປ່ຽນຜູ້ຂັບລົດຢູ່ດ່ານ; ຜ່ານດ່ານ ລາວ-ມຽນມ້າ 12 ຄົນ, ທັງໝົດ ເປັນຄົນລາວ, ໃນນັ້ນ 9 ຄົນ ແມ່ນຄົນຂັບເຮືອ, ຜ່ານດ່ານບ້ານມອມ, ແຂວງ ບໍ່ແກ້ວ; ເດີນທາງຜ່ານ ສະໜາມບິນສາກົນວັດໄຕ 160 ຄົນ ມີຄົນຈີນ 159 ຄົນ ແລະ ຄົນລາວ 1 ຄົນ, ທຸກຄົນແມ່ນໄດ້ແທກອຸນຫະພູມຮ່າງກາຍ, ແລະໄດ້ເກັບຕົວຢ່າງມາກວດ ແລ້ວນຳສົ່ງໄປຫາສະຖານທີ່ ຈຳກັດບໍລິເວນ ທີ່ກຳນົດໄວ້ຈົນກວ່າຈະຄົບກຳນົດ 14 ວັນ.
ປະຈຸບັນ ທົ່ວປະເທດ ມີສູນຈໍາກັດບໍລິເວນ ທັງໝົດ 48 ສູນ, ມີຜູ້ຖືກຈຳກັດບໍລິເວນ 2,870 ຄົນ, ໄດ້ເກັບຕົວຢ່າງມາກວດວິເຄາະຫາເຊື້ອ ສະເພາະວັນທີ 10 ກັນຍາ 2020, ໄດ້ເກັບຕົວຢ່າງມາກວດວິເຄາະທັງໝົດ 418 ຄົນ, ໃນນັ້ນມີ ແຮງງານລາວມາແຕ່ໄທ 394 ຕົວຢ່າງ, ແຮງງານລາວມາແຕ່ຫວຽດນາມ 6 ຕົວຢ່າງ, ແຮງງານລາວມາແຕ່ຈີນ 3 ຕົວຢ່າງ, ບຸກຄົນທົ່ວໄປທີ່ມີອາການ 7 ຕົວຢ່າງ ແລະ ບຸກຄົນທົ່ວໄປທີ່ບໍ່ມີອາການ 8 ຕົວຢ່າງ;
ຜົນກວດວິເຄາະທັງໝົດ ແມ່ນພົບຜູ້ຕິດເຊື້ອ 1 ຕົວຢ່າງ :ເປັນເພດຊາຍ ອາຍຸ 29 ປີ, ສັນຊາດ: ລາວ, ອາຊີບ: ນັກກິລາກອງທັບ, ບັນຊາລົດຖັງ ກ່ອນໜ້າເດີນທາງໄປ ສ ຣັດເຊຍ ພັກຢູ່ຫໍພັກທະຫານ ຢູ່ບ້ານ ດົງສະຫວາດ, ເມືອງໄຊທານີ, ກັກໂຕຢູ່ສູນຫຼັກ 27.
– ອອກຈາກ ສປປ ລາວ ເວລາ 13:50 ໂມງ ໄປປະເທດຣັດເຊຍ ໂດຍຜ່ານ ປະເທດຫວຽດນາມ, ໂດຍສາຍການບິນເໝົາລຳຫວຽດນາມໄປ ສ ຣັດເຊຍ; ກ່ອນໜ້າເດີນທາງອອກ ສປປ ລາວ, ຜູ້ກ່ຽວໄດ້ກວດຫາເຊື້ອ COVID-19 ຄັ້ງທີ 1 ເວລາ 9:00 ໂມງ;
ເດີນທາງເຖິງ ສ. ຣັດເຊຍ ວັນທີ 9 ສິງຫາ 2020 , ທີມແພດໄດ້ເກັບຕົວຢ່າງ ກວດຫາເຊື້ອ COVID-19ໃນມື້ທຳອິດ ແລະ ກັກໂຕຢູ່ໂຮງແຮມແຕ່ວັນທີ 09 ຫາ ວັນທ 11 ສິງຫາ 2020; ຜົນກວດບໍ່ພົບເຊື້ອ COVID-19 ຄັ້ງທີ 2;
ແຕ່ວັນທີ 12 ສິງຫາ ຫາວັນທີ 7 ກັນຍາ 2020 ຢູ່ຄ້າຍທະຫານ, ເວລາໄປຮອດຄ້າຍທະຫານ ໄດ້ເກັບຕົວຢ່າງ ເພື່ອກວດຫາເຊື້ອ COVID-19 ເປັນຄັ້ງທີ 3 ແລະ ຜົນກວດແມ່ນບໍ່ພົບເຊື້ອ. ທີມງານນັກກິລາ ໄດ້ອາໄສຢູ່ຄ້າຍທະຫານ ຈົນຮອດມື້ເດີນທາງກັບ ສປປ ລາວ. ເວລາກິນອາຫານແມ່ນກິນແບບບຸບເຟ່; ໃນໄລຍະທີ່ຢູ່ ສ ຣັດເຊຍ ບໍ່ໄດ້ໄປຮວ່ມກຸ່ມກັບທີມງານຊາດອື່ນ;
ວັນທີ 26 ສິງຫາ ມີອາການໄຂ້, ຄີງຮ້ອນ ໄປພົບແພດ ກິນຢາດີຫວັດ ແລະຢາຕ້ານເຊື້ອ ຈໍານວນ 2 ແຜງ ຫລັງຈາກນັ້ນອາການດີຂຶ້ນ.
ວັນທີ 7 ກັນຍາ 2020 ເດີນທາງຈາກ ສ ຣັດເຊຍ ມາ ສສ ຫວຽດນາມ, ໃນຖ້ຽວບິນມີຜູ້ໂດຍສານ ທັງໝົດ 200 ກວ່າຄົນ, ໃນນັ້ນມີຄົນສັນຊາດຫວຽດນາມ 100 ກວ່າຄົນ, ຍົນໄດ້ລົງສະໜາມບິນຫວຽດນາມ ເພື່ອໃຫ້ຜູ້ໂດຍສານຫວຽດນາມລົງ ແຕ່ຜູ້ໂດຍສານຄົນລາວນັ່ງຖ້າໃນຍົນ;
ມາຮອດ ສສ ຫວຽດນາມວັນທີ 08 ກັນຍາ 2020; ຜູ້ໂດຍສານເທິງເຮືອບິນທັງໝົດ ໄດ້ໃສ່ຊຸດປ້ອງກັນໂຕ (PPE), ຜູ້ກ່ຽວນັ່ງຕັ່ງເລກທີ 51 E;
ວັນທີ 8 ກັນຍາ 2020 ໃນຖ້ຽວບິນຈາກ ຫວຽດນາມ ມາ ລາວມີຜູ້ໂດຍສານທັງໝົດ 101 ຄົນ ມີນັກກິລາທະຫານ 42ຄົນ, ນັກຮຽນທະຫານ 43ຄົນ, ຈຸບິນ 7 ຄົນ, ແພດ 4 ຄົນ,
– ເດີນທາງມາຮອດ ສປປ ລາວ ເວລາ 9 ໂມງ ແລະ ເດີນທາງໄປສູນກັກກັນຫຼັກ 27 ດວ້ຍລົດເມ;
– ຜູ້ໂດຍສານທັງໝົດໄດ້ແກ້ຊຸດປ້ອງກັນໂຕ (PPE) ຢູ່ລົດເມ ກ່ອນລົງສູນກັກກັນຫຼັກ 27;
– ໄດ້ເກັບຕົວຢ່າງກວດຫາເຊື້ອ COVID-19 ຢູ່ ສູນກັກກັນຫຼັກ 27 ຄັ້ງທີ 1 ຫຼັງຈາກມາຮອດ ສປປ ລາວ. ໃນເວລາຢູ່ສູນກັກກັນລາວອາໄສຢູ່ກັບໝູ່ 2 ຄົນ;
– ວັນທີ 9 ກັນຍາ 2020 ຜົນກວດຫາເຊື້ອ COVID-19 ບໍ່ຊັດເຈນ
– ວັນ 10 ກັນຍາ 2020 ໄດ້ເກັບຕົວຢ່າງຄືນຄັ້ງທີ 2 ເວລາ 09:30 ໂມງ, ຕົວຢ່າງມາຮອດ ສູນວິເຄາະລະບາດວິທະຍາເວລາ 11:00 ໂມງ; ຜົນກວດອອກມາພົບເຊື້ອພະຍາດ COVID-19
ການລະບຸຜູ້ສຳຜັດໃກ້ຊິດ: ໃນຈຳນວນຜູ້ໂດຍສານ 101 ຄົນແມ່ນມີຄວາມສ່ຽງທັງໝົດ ເພາະເດີນທາງມາຈາກປະເທດທີ່ມາການລະບາດ; ຄົນຂັບລົດໄປຮັບ 3 ຄົນ;
ອີງຕາມຂໍ້ມູນທີ່ໄດ້ຮັບເບື້ອງຕົ້ນ ມີ 4 ຄົນທີ່ໄດ້ສໍາຜັດໃກ້ຊິດ ກັບກໍລະນີຢັ້ງຢືນ: 2 ທ່ານ ແມ່ນນອນຮວ່ມຫ້ອງຢູ່ຫຼັກ 21 ແລະ ອີກ 2 ທ່ານ ທີ່ນັ່ງໃກ້ຊິດເທິງເຮືອບິນ (1 ທ່ານ ແມ່ນມີຂໍ້ມູນແຕ່ອີກ 1 ທ່ານ ແມ່ນຜູ້ກ່ຽວບໍ່ຮູ້ຊື່); ແຕ່ໄດ້ເກັບຕົວຢ່າງທັງໝົດກວດແລ້ວ , ໃນນັ້ນ 103ຄົນ ແມ່ນກວດບໍ່ພົບເຊື້ອ