ທ່ານ ພົນໂທ ວັນທອງ ກອງມະນີ ເຈົ້າແຂວງອັດຕະປື ລາຍງານຕໍ່ກອງປະຊຸມສະໄໝສາມັນ ເທື່ອທີ 7 ຂອງສະພາປະຊາຊົນແຂວງ ອັດຕະປື ຊຸດທີ II ໃນວັນທີ 30 ກໍລະກົດຜ່ານມານີ້ ໃຫ້ຮູ້ວ່າ: ໄລຍະຜ່ານມາ ແຂວງອັດຕະປື ໄດ້ຖືເອົາການແກ້ໄຂບັນຫາການບຸກລຸກທີ່ດິນປ່າໄມ້ ຢູ່ເມືອງສະໜາມໄຊ ເປັນບູລິມະສິດທີໜຶ່ງ, ຜ່ານການຈັດຕັ້ງປະຕິບັດຂອງເຈົ້າໜ້າທີ່ທີ່ກ່ຽວຂ້ອງຂອງແຂວງ ໄດ້ກວດເຫັນການບຸກລຸກເນື້ອທີ່ດິນຂອງລັດ, ໂດຍສະ ເພາະເນື້ອ ທີ່ດິນໃນເຂດປ່າຜະລິດ ແລະ ປ່າປ້ອງກັນ ມີຈໍານວນ 8 ບໍລິສັດ ແລະ ບຸກຄົນອີກຈໍານວນ 2 ຄົນ, ໂດຍການເຂົ້າໄປບຸກເບີກທີ່ບໍ່ຖືກຕ້ອງຕາມລະບຽບກົດໝາຍ ລວມເນື້ອທີ່ຫຼາຍກວ່າ 5.860 ເຮັກຕາ. ປັດຈຸບັນ ອົງການປົກຄອງແຂວງ ໄດ້ແຕ່ງຕັ້ງຄະນະສະເພາະກິດລົງແກ້ໄຂ ແລະ ຜົນການແກ້ໄຂແມ່ນມີຄວາມຄືບໜ້າຫຼາຍສົມຄວນ ເປັນຕົ້ນ: ໄດ້ໃຫ້ປະຊາຊົນອອກຈາກພື້ນທີ່, ລົງກວດກາ ແລະ ປັກຫຼັກໝາຍເຂດພື້ນທີ່, ຄຸ້ມຄອງພື້ນທີ່ ທີ່ປະ ຊາຊົນອອກໄປ ເພື່ອບໍ່ໃຫ້ເຂົາເຈົ້າກັບມາບຸກລຸກຄືນ ແລະ ອື່ນໆ.
ທ່ານ ພົນໂທ ວັນທອງ ກອງມະນີ ເຈົ້າແຂວງ ອັດຕະປື ໃຫ້ຮູ້ຕື່ມວ່າ: ໃນໄລຍະຜ່ານມາອົງການປົກຄອງ ແຂວງອັດຕະປື ໄດ້ອອກຄຳສັ່ງຕ່າງໆ ເພື່ອເປັນການປົກປັກຮັກສາ ແລະ ຄຸ້ມຄອງຊັບພະຍາກອນທໍາມະຊາດ, ກ້າວໄປເຖິງເຮັດໃຫ້ການຄຸ້ມຄອງເສດຖະກິດ-ສັງຄົມຂອງແຂວງ ໃຫ້ເປັນລະບົບ, ສອດຄ່ອງຕາມລະບຽບກົດໝາຍ, ມີຄວາມສະຫງົບ ເປັນລະບຽບຮຽບຮ້ອຍ ແລະ ຂະຫຍາຍຕົວຕາມແຜນການທີ່ວ່າງໄວ້, ໃນນີ້ ໄດ້ອອກຄໍາສັ່ງວ່າດ້ວຍການຫ້າມຈັບຈ່ອງ ແລະ ບຸກລຸກທີ່ດິນ ໂດຍບໍ່ໄດ້ຮັບການອະນຸຍາດ, ຄໍາສັ່ງ ວ່າດ້ວຍການຢຸດຕິການຂຸດຄົ້ນແຮ່ຄໍາຕົກຂ້ອນ, ຄໍາສັ່ງ ວ່າດ້ວຍການຢຸດຕິການສໍາຫຼວດ, ຂຸດຄົ້ນໄມ້ ແລະ ທ້ອນໂຮມໄມ້, ຄໍາສັ່ງ ວ່າດ້ວຍການຄຸ້ມຄອງ ແລະ ເກັບກູ້ນໍາໃຊ້ເຄື່ອງປ່າຂອງດົງ, ຄໍາສັ່ງ ວ່າດ້ວຍການຕິດຕາມ, ກວດກາ ແລະ ໃຊ້ມາດຕະການຕໍ່ຜູ້ລະເມີດຈຳໜ່າຍ, ຊື້-ຂາຍ ສິນຄ້າເກືອດຫ້າມປະເພດຕ່າງໆ ແລະ ຄໍາສັ່ງ ວ່າດ້ວຍການເພີ່ມທະວີຄຸ້ມຄອງກິດຈະການແຮ່ທາດຢູ່ພາຍໃນ ແຂວງອັດຕະປື.
ທ່ານ ເຈົ້າແຂວງອັດຕະປື ຍັງໄດ້ໃຫ້ຮູ້ຕື່ມວ່າ: ໃນຕໍ່ໜ້ານີ້ ທາງອົງການປົກຄອງແຂວງ ຈະສືບຕໍ່ແກ້ໄຂບັນຫາການບຸກລຸກທີ່ດິນປ່າໄມ້ ເຂດເມືອງສະໜາມໄຊ ຢ່າງແຂງແຮງ, ເດັດຂາດ ເຂັ້ມງວດຕາມລະບຽບກົດໝາຍ ພ້ອມນັ້ນ ຈະສຸມໃສ່ຈັດສັນທີ່ດິນທຳການຜະລິດໃຫ້ປະຊາຊົນຄືນໃໝ່, ກຳນົດເຂດດິນສະຫງວນຂອງລັດເພື່ອຟື້ນຟູປ່າໄມ້, ເຂດເຊົ່າ-ສໍາປະທານໃຫ້ນັກລົງທຶນເພື່ອການພັດທະນາ ແລະ ຈັດສັນອາຊີບທີ່ໝັ້ນຄົງຍາວນານໃຫ້ແກ່ປະຊາຊົນ ເພື່ອແກ້ໄຂບັນຫາການເຄື່ອນຍ້າຍແຮງງານເລື່ອນລອຍ.
ຂ່າວ: ພອນປະເສີດ
