ກອງປະຊຸມພົບປະຄະນະຜູ້ແທນນະຄອນຫຼວງວຽງຈັນ (ນວ) ນໍາໂດຍ ທ່ານ ວິລະສັກ ນາມມຸນຕີ ປະທານຄະນະກວດກາພັກ ປະທານອົງການກວດກາລັດ ແລະ ຄະນະຜູ້ແທນແຂວງກວາງຕຸ້ງ ສປ ຈີນ ນໍາໂດຍທ່ານ ສົ່ງຟູ້ຫຼົງ ເລຂາກວດກາພັກ ຫົວໜ້າກວດກາວິໄນແຂວງກວາງຕຸ້ງ ແລະ ພິທີມອບ-ຮັບການຊ່ວຍເຫຼືອຊຸດເຄື່ອງອຸປະກອນຈາກອົງການປົກຄອງແຂວງກວາງຕຸ້ງ ໃຫ້ອົງການປົກຄອງ ນວ ມູນຄ່າ 1 ລ້ານຢວນ ຫຼື ປະມານ 3,36 ຕື້ກີບ ຈັດຂຶ້ນວັນທີ 30 ພຶດສະພາ 2024 ທີ່ຫ້ອງວ່າການ ນວ.
ການພົບປະຄັ້ງນີ້, ສອງຝ່າຍໄດ້ລາຍງານສະພາບກ່ຽວກັບການພົວພັນຮ່ວມມືສອງຝ່າຍໃນຜ່ານມາ ແລະ ແຜນການຮ່ວມມືໃນຕໍ່ໜ້າ ແຈ້ງສະພາບການພັດທະນາເສດຖະກິດ-ສັງຄົມຂອງຕົນ ແລກປ່ຽນບົດຮຽນກ່ຽວກັບວຽກງານກວດກາເສດຖະກິດ ການກວດກາອົງການຈັດຕັ້ງລັດ ທີ່ມີການເກັບລາຍຮັບເຂົ້າງົບປະມານຂອງລັດ ແລະ ບົດຮຽນກ່ຽວກັບວຽກງານກວດກາເສດຖະກິດ ໂດຍລວມແລ້ວວຽກງານດັ່ງກ່າວທີ່ສອງຝ່າຍໄດ້ນໍາມາແລກ ປ່ຽນເຊິ່ງກັນ ແລະ ກັນຄັ້ງນີ້ເຫັນວ່າມີບາງອັນກໍຄືກັນ ແລະ ມີບາງອັນກໍບໍ່ຄືກັນນັບແຕ່ຂັ້ນສູນກາງລົງຮອດຂັ້ນທ້ອງຖິ່ນ.
ໃນໂອກາດນີ້, ທ່ານ ວິລະສັກ ນາມມຸນຕີ ໄດ້ຕີລາຄາສູງຕໍ່ການເດີນທາງມາຢ້ຽມຢາມ ແລະ ເຮັດວຽກຂອງຄະນະຜູ້ແທນແຂວງກວາງຕຸ້ງຢູ່ນະຄອນຫລວງວຽງຈັນ ຄັ້ງນີ້ຈະເປັນການປະກອບສ່ວນເສີມສ້າງຄວາມຮັບຮູ້ເຂົ້າໃຈ ໃຫ້ບົດຮຽນ-ປະສົບການເຊິ່ງກັນ ແລະ ກັນໃນຂົງເຂດການຮ່ວມມືດ້ານວິຊາການ ແລະ ການຄຸ້ມຄອງເສດຖະກິດ-ສັງຄົມ ແລະ ບັນຫາອື່ນໆ ພ້ອມນີ້ ທ່ານໄດ້ ສະແດງຄວາມຂອບໃຈມາຍັງຄະນະນຳແຂວງ ແລະ ປະຊາຊົນແຂວງກວາງຕຸ້ງທີ່ໄດ້ບິແບ່ງຊັບສິນທຶນຮອນ ນຳເອົາເຄື່ອງມາຊ່ວຍເຫຼືອນະຄອນຫລວງວຽງຈັນ ຄັ້ງນີ້ ຖືວ່າເປັນຄຸນຄ່າທາງຈິດໃຈ ແລະ ເປັນອຸປະກອນເຄື່ອງໃຊ້ທີ່ຈຳເປັນມີປະໂຫຍດ ເໝາະກັບຄວາມຕ້ອງການຂອງນະຄອນຫລວງວຽງຈັນ ໃນປັດຈຸບັນ ເພື່ອນໍາໃຊ້ເຂົ້າໃນວຽກງານການກະກຽມການເປັນເຈົ້າພາບ ກອງປະຊຸມບັນດາເຈົ້າຄອງນະຄອນອາຊຽນ ກອງປະຊຸມເວທີປາໄສເຈົ້າຄອງນະຄອນຫຼວງອາຊຽນ ໃນປີ 2024 ແລະ ນໍາໃຊ້ເຂົ້າໃນກອງປະຊຸມໃຫຍ່ຂອງນະຄອນຫລວງວຽງຈັນ ທີ່ຈະເປີດຂຶ້ນໃນຕໍ່ໜ້າ.
ທີ່ມາ: ວຽງຈັນທຸລະກິດສັງຄົມ
