ໃນວັນທີ 13 ສິງຫາ 2024 ຢູ່ທີ່ ສໍານັກງານອົງການປົກຄອງ ນະຄອນຫຼວງວຽງຈັນ, ກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ ນະຄອນຫຼວງວຽງຈັນ ໄດ້ມອບສ່ວນແບ່ງ 10% (ສິບເປີ້ເຊັນ) ລວມເປັນເງິນ 664,365,859 ກີບ ເຂົ້າກອງທຶນ ຄວບຄຸມ, ສະກັດກັ້ນ ແລະ ຕ້ານຢາເສບຕິດ ຂັ້ນສູນກາງ; ເປັນກຽດກ່າວມອບໂດຍ ພົຈວ ປອ. ບົວພັນ ຟອງມະນີ ຫົວໜ້າກອງບັນຊາການ ປກສ ນະຄອນຫຼວງວຽງຈັນ, ທັງເປັນຮອງປະທານສະພາບໍລິຫານກອງທຶນ ຄວບຄຸມ, ສະກັດກັ້ນ ແລະຕ້ານຢາເສບຕິດ ນະຄອນຫຼວງວຽງຈັນ; ຕາງໜ້າກ່າວຮັບ ພັອ ສາລີ ພຸດທະວົງ ຮອງຫົວໜ້າກົມໃຫຍ່ຕໍາຫຼວດ, ຄະນະຊີ້ນໍາສະພາບໍລິຫານກອງທຶນ ຄວບຄຸມ, ສະກັດກັ້ນ ແລະ ຕ້ານຢາເສບຕິດ ຂັ້ນສູນກາງ.
ພົຈວ ປອ. ບົວພັນ ຟອງມະນີ ກ່າວວ່າ: ກອງທຶນ ຄວບຄຸມ, ສະກັດກັ້ນ ແລະ ຕ້ານຢາເສບຕິດ ນະຄອນຫຼວງວຽງຈັນ ແມ່ນໄດ້ຮັບອະນຸມັດສ້າງຕັ້ງຂຶ້ນ ຕາມຂໍ້ຕົກລົງ ສະບັບເລກທີ0525/ຈນວ, ລົງວັນທີ 02 ມິຖຸນາ 2015 ແລະ ໄດ້ມີການລະດົມທຶນຈາກສັງຄົມ ແລະ ການຂາຍຊັບສິນຂອງລັດ ເພື່ອນໍາເຂົ້າກອງທຶນໃນການສະໜອງໃຫ້ວຽກງານຄວບຄຸມ, ສະກັດກັ້ນ ແລະ ຕ້ານຢາເສບຕິດ ຢູ່ນະຄອນຫຼວງວຽງຈັນ, ຕົ້ນປີ 2017 ໄດ້ມີການມອບໂອນວຽກກວດກາ ແລະ ຄວບຄຸມຢາເສບຕິດ ມາຂຶ້ນກັບກອງບັນຊາການປ້ອງກັນຄວາມສະຫງົບ ກໍຄືຫ້ອງຕຳຫຼວດ, ມາຮອດປີ 2020 ໄດ້ມີການປັບປຸງຄະນະກອງທຶນຕາມທິດຊີ້ນໍາຂອງທ່ານເຈົ້າຄອງນະຄອນຫຼວງວຽງຈັນ ພ້ອມທັງເຄື່ອນໄຫວປະສານສົມທົບຕາມພາລະບົດບາດ ສິດ-ໜ້າທີ່ ປີ 2021 ໄດ້ເປີດບັນຊີເງິນກອງທຶນ ຢູ່ຄັງເງິນແຫ່ງຊາດປະຈຳ ນະຄອນຫຼວງ ວຽງຈັນ ຕາມການຕົກລົງ ແລະ ໄດ້ເຄື່ອນໄຫວນັບແຕ່ 2021 ເປັນຕົ້ນມາ.
ຜ່ານການຈັດຕັ້ງປະຕິບັດເຄື່ອນໄຫວຂອງສະພາບໍລິຫານກອງທຶນຄວບຄຸມ, ສະກັດກັ້ນ ແລະ ຕ້ານຢາເສບຕິດ ນະຄອນ ຫຼວງວຽງຈັນ ນັບແຕ່ປີ 2021 ຫາ 2023 ໄດ້ມີຍອດເງິນເຂົ້າໃນບັນຊີຕົວຈິງ ທີ່ເຫຼືອຈາກການຫັກ 30% ເຂົ້າງົບປະມານຂອງ ລັດ, ແລ້ວ ຍັງເຫຼືອ 70% ທີ່ຂະແໜງຄຸ້ມຄອງຊັບສິນຂອງລັດ ໄດ້ໂອນເຂົ້າໃນບັນຊີຢູ່ຄັງເງິນແຫ່ງຊາດປະຈຳ ນະຄອນຫຼວງ ວຽງຈັນ ມີຈໍານວນ 6,643,658,590 ກີບ (ຫົກຕື້, ຫົກຮ້ອຍສີ່ສິບສາມລ້ານ, ຫົກແສນຫ້າສິບແປດພັນ ຫ້າຮ້ອຍເກົ້າສິບ ກີບ) ແລະ ແບ່ງ 10% ມອບໃຫ້ກອງທຶນ ຂັ້ນສູນກາງ ເປັນຈໍານວນ 664,365,859 ກີບ; ສ່ວນທິດທາງໃນຕໍ່ໜ້າ ຈະໄດ້ສືບຕໍ່ເຄື່ອນໄຫວຕາມພາລະບົດບາດສິດ ແລະ ໜ້າທີ ຕາມຂໍ້ຕົກລົງ 377/ຈນວ.(ປັບປຸງ)2024 ເພື່ອຈັດຕັ້ງປະຕິບັດຕາມ ດຳລັດ 267/ລບ ແລະ ລະບຽບກອງທຶນ ນະຄອນຫຼວງວຽງຈັນ ໃຫ້ມີສິທິພາບ, ປະສິດທິຜົນດີຂຶ້ນເທື່ອລະກ້າວ ແລະ ໃຫ້ມີຄວາມ ເຂັ້ມແຂງ, ຍືນຍົງດີຂຶ້ນກວ່າເກົ່າ, ໝູນໃຊ້ເຂົ້າໃນວຽກງານສະກັດກັ້ນ ແລະ ຕ້ານຢາເສບຕິດ ໃຫ້ບັນລຸຜົນສຳເລັດ.
ພາບ-ຂ່າວ: ສົມສະໄຫວ
