ກອງທຶນຈີນເພື່ອສັນຕິພາບ ແລະການພັດທະນາມອບທຶນສ້າງໂຮງຮຽນປະຖົມ 2 ຫຼັງຢູ່ແຂວງໄຊຍະບູລີ

ພິທີມອບ-ຮັບໂຄງການກໍ່ສ້າງໂຮງຮຽນປະຖົມ 2 ຫຼັງ ຢູ່ແຂວງໄຊຍະບູລີຄືໂຮງຮຽນປະຖົມບ້ານບຸ່ງເມືອງໄຊຍະບູລີ ແລະ ໂຮງ ຮຽນພູຟ້າມີໄຊເມືອງພຽງໄດ້ຈັດຂຶ້ນເມື່ອບໍ່ດົນມານີ້, ໂດຍການ ຮ່ວມມືລະຫວ່າງຄະນະສັນຕິພາບ ແລະ ສາມັກຄີຂອງລາວ ແລະກອງທຶນຈີນເພື່ອສັນຕິພາບ ແລະ ການພັດທະນາ ທີ່ຫ້ອງປະຊຸມພະແນກສຶກສາທິການ ແລະ ກິລາ ແຂວງໄຊຍະບູລີ, ໂດຍມີທ່ານ ເພັດພິໄຊ ສູນວິໄລ ຮອງເຈົ້າແຂວງໄຊຍະບູລີ, ທ່ານ ພວງແກ້ວ ລັງສີ ຮອງປະທານຄະນະສັນຕິພາບ ແລະ ສາມັກຄີລາວ, ທ່ານ ລິວ ເຈິງຈົ່ງ ຮອງເລຂາທິການກອງທຶນຈີນເພື່ອສັນຕິພາບ ແລະ ການພັດທະນາເຂົ້າຮວ່ມ.

ທ່ານ ເພັດພິໄຊ ສູນວິໄລ ກ່າວວ່າ: ສະແດງຄວາມຂອບໃຈມາຍັງສອງອົງການຈັດຕັ້ງສັນຕິພາບ ແລະ ການພັດທະນາລາວ ແລະ ຈີນ ທີ່ໄດ້ເລືອກເອົາແຂວງໄຊຍະບູລີໃນການໃຫ້ຄວາມຊວ່ຍເຫຼືອແລະສະໜັບສະໜູນການກໍ່ສ້າງໂຮງຮຽນ 2 ຫຼັງດັ່ງກ່າວ. ແຂວງໄຊຍະບູລີກໍ່ເປັນແຂວງໜຶ່ງທີ່ຍັງມີຄວາມຕ້ອງການ ແລະ ຈໍາເປັນໃນການພັດທະນາພື້ນຖານໂຄງລ່າງການສຶກສາ, ເຊິ່ງປັດຈຸບັນໂຮງຮຽນແຫ່ງນີ້ ແມ່ນໄດ້ກໍ່ສ້າງເປັນຫຼັງໃໝ່ສໍາເລັດ ປັດຈຸບັນພວກເຮົາໄດ້ນໍາໃຊ້ອາຄານໃໝ່ເປັນໂຮງຮຽນປະຖົມຄົບຊຸດ ແລະນໍາໃຊ້ອາຄານຫຼັງເກົ່າເປັນໂຮງຮຽນອະນຸບານທັງໝົດ. ການສະ ໜັບສະໜູນສ້າງໂຮງຮຽນ ປະຖົມບ້ານບຸ່ງ ເມືອງໄຊຍະບູລີ ແລະ ໂຮງຮຽນປະຖົມພູຟ້າມີໄຊເມືອງພຽງ ໃນເທື່ອນີ້ ຈະສ້າງເງື່ອນໄຂ ແລະ ອໍານວຍຄວາມສະດວກໃຫ້ແກ່ ຄູອາຈານ ແລະ ນັກຮຽນພາຍໃນບ້ານດັ່ງກ່າວ ແລະ ບັນດາບ້ານອ້ອມຂ້າງຈໍານວນຫຼາຍຮ້ອຍນ້ອງມີເງື່ອນໄຂໄດ້ຮັບການສຶກສາທີ່ດີຂຶ້ນ.ແຂວງໄຊຍະບູລີຍາມໃດກໍ່ຖືສຳຄັນການສຶກສາ ແລະ ພັດທະນາຊັບພະຍາກອນ ມະນຸດ ເປັນບູລິມະສິດຕົ້ນຕໍ ໃນການປະກອບສ່ວນ ສ້າງສາພັດທະນາ ແຂວງໄຊຍະບູລີ ກ່ໍຄືປະເທດຊາດ. ພາຍຫຼັງໄດ້ຮັບໂຮງຮຽນສອງຫຼັງແຫ່ງນີ້ແລ້ວ ພວກເຮົາຈະນໍາໃຊ້ ແລະ ປົກປັກຮັກສາສິ່ງທີ່ພວກທ່ານໄດ້ໃຫ້ການຊ່ວຍເຫຼືອນັ້ນ ເກີດຜົນປະໂຫຍດສູງສຸດ.

ຂ່າວ: ປະຊາຊົນ