ກອງທຶນພັດທະນາໄຊສົມບູນ ນັບມື້ເຕີບໃຫຍ່ຂະຫຍາຍຕົວ

ກອງປະຊຸມສະພາບໍລິຫານ ກອງທຶນພັດທະນາໄຊສົມບູນ ຄັ້ງທີ IX ຈັດຂຶ້ນໃນວັນທີ 28 ສິງຫາ 2024 ທີ່ຫ້ອງວ່າການແຂວງໄຊສົມບູນ ຈຸດປະສົງເພື່ອເປັນການທົບທວນຄືນ ໂດຍສະເພາະ ການຈັດຕັ້ງປະຕິບັດວຽກງານຂອງຄະນະບໍລິຫານກອງທຶນພັດທະນາໄຊສົມບູນ ເພື່ອໃຫ້ເຫັນໄດ້ຈຸດດີ, ຈຸດອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ໂດຍການເປັນປະທານຂອງທ່ານ ສີສຸພັນ ໂພໄຊສີ ຫົວໜ້າກອງທຶນພັດທະນາໄຊສົມບູນ, ທັງເປັນຮອງປະທານສະພາບໍລິຫານ ກອງທຶນພັດທະນາໄຊສົມບູນ.

ກອງປະຊຸມ, ຜູ້ເຂົ້າຮ່ວມໄດ້ຮັບຟັງການລາຍງານ ການຈັດຕັ້ງປະຕິບັດວຽກງານປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2024, ຊຶ່ງໄລຍະຜ່ານມາ ກອງທຶນດັ່ງກ່າວ ໄດ້ເອົາໃຈໃສ່ໃນການປະຕິບັດ ພາລະບົດບາດຂອງຕົນ ແລະ ມີຜົນສຳເລັດຫລາຍດ້ານ ເປັນຕົ້ນ ວຽກງານປຸກລະດົມທຶນ ສາມາດປຸກລະດົມທຶນໄດ້ທັງໝົດ 12,58 ຕື້ກີບ ປະຕິບັດໄດ້ 17,96% ຂອງແຜນການ, ວຽກງານການເງິນ ສາມາດສ້າງລາຍຮັບໄດ້ 1,44 ຕື້ກີບ, ລາຍຈ່າຍ 1,33 ຕື້ກີບ, ຜົນໄດ້ຮັບສຸດທິ 101,10 ລ້ານກີບ ປະຕິບັດໄດ້ 6,74% ຂອງແຜນການ. ນອກນີ້, ຍັງໄດ້ຊຸກຍູ້ສົ່ງເສີມ ແລະ ສ້າງກອງທຶນພັດທະນາບ້ານ ຊຶ່ງມີສະມາຊິກເງິນຝາກທັງໝົດ 2.224 ບັນຊີ ຍອດເງິນຝາກ 11,46 ຕື້ກີບ ຍອດເງິນກູ້ 10,09 ຕື້ກີບ ແລະ ວຽກງານອື່ນໆອີກຫລາຍດ້ານ.

ກອງປະຊຸມ, ບັນດາສະມາຊິກສະພາບໍລິຫານ ໄດ້ພ້ອມກັນປະກອບຄໍາຄິດຄໍາເຫັນ ດ້ວຍຄວາມຮັບຜິດຊອບສູງ ເພື່ອພ້ອມກັນຄົ້ນຄວ້າພິຈາລະນາ, ຕົກລົງບັນຫາຕ່າງໆ ບົນພື້ນຖານຕາມຫລັກການປະຊາທິປະໄຕ ແລະ ພາວະວິໄສ ເພື່ອເປັນການປັບປຸງແບບແຜນດຳເນີນງານໃນຕໍ່ໜ້າ ໃຫ້ດຳເນີນໄປຕາມກົນໄກ ແລະ ສາມາດປະຕິບັດສຳເລັດຕາມຄາດໝາຍທີ່ວາງໄວ້.

ຂ່າວ-ພາບ: ແກ່ນຈັນ ທໍາມະນີ