ພິທີ ມອບ-ຮັບ ງົວ ຈຳນວນ 60 ໂຕ ລວມມູນຄ່າ 480 ລ້ານກີບ ໃຫ້ແກ່ປະຊາຊົນ 30 ຄອບຄົວຂອງບ້ານມະກາ ເມືອງນາກາຍ ແຂວງຄຳມ່ວນ ຈາກກອງທຶນລັດຖະບານ ໄດ້ຈັດຂຶ້ນໃນວັນທີ 27 ເມສາ 2024 ຢູ່ບ້ານມະກາ ໂດຍການເປັນກຽດເຂົ້າຮ່ວມຂອງທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ.
ທ່ານ ພູວິໄລ ຫອມໜູຮັກ ຫົວໜ້າຫ້ອງການກະສິກຳ ແລະ ປ່າໄມ້ເມືອງນາກາຍ ໄດ້ລາຍງານວ່າ: ກອງທຶນລັດຖະບານ ແມ່ນເປັນກອງທຶນທີ່ມີຄວາມສຳຄັນໃນການແກ້ໄຂຊີວິດການເປັນຢູ່ຂອງປະຊາຊົນ ຄອບຄົວທີ່ທຸກຍາກ ເຊິ່ງໄດ້ຮັບການຈັດຕັ້ງປະຕິບັດມາແຕ່ປີ 2003 ເປັນຕົ້ນມາ.
ບ້ານມະກາ ແມ່ນ 1 ໃນ 4 ບ້ານທີ່ນອນຢູ່ໃນເປົ້າໝາຍຂອງໂຄງການ ຕັ້ງຢູ່ເຂດພູດອຍ ແລະ ນອນຢູ່ໃນຂອບເຂດປ່າ ສະຫງວນແຫ່ງຊາດ ນາກາຍນໍ້າເທີນ ຫຼື ເຂດປົກປັກຮັກສາ, ອະນຸລັກ ແລະ ພັດທະນາແຫຼ່ງນໍ້າ ນໍ້າເທີນ 2, ລວມມີທັງໝົດ 90 ຄອບຄົວ, ມີພົນລະເມືອງ 409 ຄົນ ແລະ ມີເນື້ອທີ່ທັງໝົດ 4.117 ເຮັກຕາ ເຊິ່ງກອງທຶນລັດຖະບານຈະໄດ້ປ່ອຍທຶນເປັນສັດລ້ຽງ ປະເພດ ງົວ ລວມທັງໝົດ 60 ໂຕ ໃຫ້ຈຳນວນ 30 ຄອບຄົວ, ຄອບຄົວລະ 2 ໂຕ, ໂດຍມີກຳນົດເວລາການລ້ຽງ 5 ປີ ເຊິ່ງພາຍຫຼັງລ້ຽງຄົບຕາມກຳນົດແມ່ນຈະໄດ້ເກັບຕົ້ນທຶນ ແລະ ດອກເບ້ຍ (ເຊິ່ງກອງທຶນຈະໄດ້ເກັບຄືນ ງົວ 2 ໂຕທີ່ເປັນຕົ້ນທຶນ ແລະ ອີກ 1 ທີ່ເປັນດອກເບ້ຍ ລວມເປັນ 3 ໂຕ) ເພື່ອເປັນກອງທຶນຂະຫຍາຍໃນບ້ານຕໍ່ໆໄປ ເພື່ອເຮັດໃຫ້ກອງທຶນມີຂະການຫຍາຍຕົວ ແລະ ມີຄວາມຍືນຍົງ ນອກເຫຼືອຈາກນັ້ນແມ່ນປະຊາຊົນທີ່ລ້ຽງຈະໄດ້ຮັບເປັນຕົ້ນທຶນພາຍໃນຄອບຄົວຂອງຕົນເອງ.
