ກອງບັນຊາທະຫານແຂວງເຊກອງ ກັບ 3 ກອງບັນຊາການທະຫານຂອງ ສສ ຫວຽດນາມ ໄດ້ມີການພົວພັນຮ່ວມມືກັນຢ່າງສະໜິດແໜ້ນ ບົນຈິດໃຈປົກປັກຮັກສາເສັ້ນຊາຍ​ແດນໃຫ້ກາຍເປັນເສັ້ນຊາຍແດນສັນຕິພາບ, ມິດຕະພາບ ແລະ ການພັດທະນາ

ເນື່ອງໃນໂອກາດກະກຽມສະເຫຼີມສະຫຼອງປີສາມັກຄີມິດຕະພາບລາວ-ຫວຽດນາມປີ 2022 ເຊັ່ນ: ວັນເຊັນສົນທິສັນຍາມິດຕະພາບລາວ- ຫວຽດນາມ ຄົບ 45 ປີ (18 ກໍລະກົດ 1977 – 18 ກໍລະກົດ 2022) ແລະ ວັນສ້າງຕັ້ງສາຍພົວການທູດ ລາວ-ຫວຽດນາມ ຄົບຮອບ 60 ປີ (5 ກັນຍາ 1962 – 5 ກັນຍາ 2022).

ສະຫາຍ ພັນເອກ ທອງສີ ກູນສະນະ ຄະນະປະຈຳພັກແຂວງ ຫົວໜ້າການທະຫານ ກອງບັນຊາການທະຫານແຂວງເຊກອງ, ຕາງໜ້າຄະນະພັກ-ຄະນະບັນຊາ, ພະ​ນັກງານ-ນັກຮົບ ກຳລັງປະກອບອາວຸດທ້ອງຖິ່ນ ກອງບັນຊາ​ການທະຫານແຂວງເຊກອງ ໃຫ້ສຳພາດຕໍ່ນັກຂ່າວວິທະຍຸກະຈາຍສຽງກອງທັບປະຊາຊົນລາວ ວ່າ: ເພື່ອສ້າງຂະ​ບວນການຂ່ຳນັບຮັບຕ້ອນ 2 ວັນປະຫວັດສາດສຳຄັນດັ່ງກ່າວ ກອງບັນຊາການທະຫານ ແຂວງເຊກອງ ກໍ່ໄດ້ຈັດຕັ້ງປະຕິບັດບັນດາກິດຈະກຳຕ່າງໆ ຢ່າງເປັນຂະບວນຟົດຟື້ນ, ເປັນຕົ້ນແມ່ນ ຂະບວນການເຮັດໃຫ້ສະພາບຂອບເຂດກົມກອງຮັບຜິດຊອບມີຄວາມສະຫງົບ ໄດ້ຈັດຕັ້ງເອົາກຳລັງລົງກໍ່ສ້າງຮາກຖານການເມືອງ ພັດທະນາຊົນນະບົດຮອບດ້ານ ຕາມ 4 ເນື້ອໃນ 4 ຄາດໝາຍ ຕິດພັນກັບວຽກງານ 3 ສ້າງ, ຂະບວນການກຽມພ້ອມສູ້ຮົບ ແລະ ກອບກູ້ໄພພິບັດ, ຂະບວນການປັບປຸງກໍ່ສ້າງກຳລັງ, ກໍ່ສ້າງກົມກອງ ປົວແປງອາຄານສະຖານທີ່ຄ້າຍຄູ ໃຫ້ກ້າວເຂົ້າສູ່ລະບົບຖາວອນ ເປັນລະບຽບຮຽບຮ້ອຍ ຕິດພັນກັບຂະບວນການກໍ່ສ້າງກອງປອດໃສ ປອດໄພ ປອດຄະດີ, ສ້າງພັກໃຫ້ປອດໃສ ເຂັ້ມແຂງ ໜັກແໜ້ນ ແລະ ຂະບວນການສ້າງນັກຮົບວັດທະນະທຳ-ກອງວັດທະນະທຳ ໄດ້ດຳເນີນຈັດຕັ້ງປະຕິບັດຢ່າງຕໍ່ເນື່ອງ ແລະ ມີໝາກຜົນຕົວຈິງ, ນອກຈາກຂະບວນດັ່ງກ່າວແລ້ວ ຍັງໄດ້ຊີ້ນຳກຳລັງທະຫານຊາຍແດນ ເຄື່ອນໄຫວປະຕິບັດໜ້າທີ່ປົກປັກຮັກສາເສັ້ນຊາຍແດນ ແລະ ຫຼັກໝາຍຊາຍແດນເປັນປົກກະຕິ, ອັນໄດ້ເຮັດໃຫ້ສະພາບຊາຍແດນລະຫວ່າງແຂວງເຊກອງ ກັບ 3 ແຂວງຂອງ ສສ ຫວຽດນາມ ທີ່ມີຊາຍແດນຕິດຈອດກັນມີຄວາມສະຫົງບເປັນລະບຽບຮຽບຮ້ອຍດີ, ພ້ອມກັນນັ້ນ ກໍໄດ້ຈັດຕັ້ງກອງປະຊຸມຮອບວຽນ ເຊິ່ງພັດປ່ຽນກັນເປັນເຈົ້າພາບ ກໍ່ໄດ້ປະຕິບັດເປັນປົກກະຕິ, ຈັດຕັ້ງຄະນະຜູ້ແທນໄປທັດສະນະສຶກສາ ແລະ ຄອບຄົວໄປພັກແລ້ງ, ໃນນັ້ນ ອັນພົ້ນເດັ່ນໃນການພົວພັນຮ່ວມມືແມ່ນ: ກອງບັນຊາການທະຫານແຂວງເຊກອງ ຊ່ວຍອໍານວຍຄວາມສະດວກໃນການຂຸດຄົ້ນອັດຖິ ທະຫານອາສາສະໝັກຫວຽດນາມ ໄດ້ 28 ອັດຖິ, ຝ່າຍກອງບັນຊາການທະຫານຊາຍແດນ 3 ແຂວງ ແລະ ກອງບັນຊາການທະຫານແຂວງ 3 ແຂວງ ຂອງ ສສຫວຽດນາມ ຊ່ວຍກອງບັນຊາການທະຫານແຂວງເຊກອງ ທາງດ້ານອຸປະກອນການແພດ ເພື່ອປ້ອງກັນການແຜ່ລະບາດຂອງພະຍາດໂຄວິດ 19 ແລະ ຊ່ວຍປັບປຸງຄ້າຍທະຫານເມືອງ, ທະຫານຊາຍແດນ ແລະ ອາຫານແຫ້ງຈຳນວນໜຶ່ງ ຄິດເປັນມູນຄ່າ 18 ຕື້ 803 ລ້ານດົ້ງ (ສະກຸນເງິນຫວຽດນາມ).

ແຜນການໃນປີຕໍ່ໜ້າ ຈະສືບຕໍ່ປະຕິບັດຕາມບົດທຶກຊ່ວຍຈໍາທີ່ໄດ້ລົງນາມໃນປີ 2022 ໃຫ້ບັນລຸຕາມແຜນ, ສືບຕໍ່ຊີ້ນຳກຳລັງທະຫານຊາຍແດນຂອງ 2 ຝ່າຍ ຈັດຕັ້ງກຳລັງເຄື່ອນໄຫວຮ່ວມ 2 ຝ່າຍ ແລະ ຝ່າຍດຽວ ແນ່ໃສ່ເພື່ອປົກປັກຮັກສາເສັ້ນຊາຍແດນ ແລະ ຫຼັກໝາຍຊາຍແດນ ລະຫວ່າງ ແຂວງເຊກອງ ກັບ 3 ກອງບັນຊາການທະຫານຊາຍແດນຂອງ ສສ ຫວຽດນາມ ໃຫ້ມີຄວາມສະຫງົບ ບົນຈິດໃຈ ເຮັດໃຫ້ເສັ້ນຊາຍແດນດັ່ງກ່າວ ເປັນເສັ້ນຊາຍແດນສັນຕິພາບ, ມິດຕະພາບ ແລະ ການພັດທະນາ, ສືບຕໍ່ຈັດກອງປະຊຸມຮອບວຽນຕາມການລົງນາມ ໃນປີ 2022, ນອກນັ້ນ ກໍ່ສືບຕໍ່ຈັດຕັ້ງເອົາພະນັກງານໄປທັດສະນະສຶກສາ ແລະ ຄອບຄົວພະນັກງານ 2 ຝ່າຍ ໄປພັກແລ້ງ ຕາມລົງນາມ ໃນບົດບັນທຶກຊ່ວຍຈຳ.

ໂອກາດກະກຽມສະເຫລີມສະຫລອງປີສາມັກຄີມິດ​ຕະພາບລາວ-ຫວຽດນາມ ປີ 2022, ສະຫາຍ ພັນເອກ ທອງສີ ກູນສະນະ ຄະນະປະຈຳພັກແຂວງ ຫົວໜ້າການທະຫານ ກອງບັນຊາການທະຫານແຂວງເຊກອງ ໄດ້ກ່າວອວຍພອນໄຊແກ່ການນຳພັກ – ລັດ, ປະຊາຊົນ 02 ຊາດ ລາວ- ຫວຽດນາມ ຈົ່ງມີສຸຂະພາບເຂັ້ມແຂງ ມີຄວາມຜາສຸກ, ສືບຕໍ່ຊີ້ນຳ-ນໍາພາ 02 ຊາດພວກເຮົາ ໃຫ້ມີການພັດທະນາຢ່າງບໍ່ ຢຸດຢັ້ງ, ອວຍພອນສາຍພົວພັນມິດ​ຕະພາບ ຄວາມສາມັກຄີ ແບບພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ, ສອງກອງທັບ ເວົ້າສະເພາະ ແມ່ນກອງບັນຊາການທະຫານແຂວງເຊກອງ ກັບ ບັນດາແຂວງເພື່ອນມິດຫວຽດນາມອ້າຍນ້ອງ ຈົ່ງໝັ້ນຄົງທະນົງແກ່ນ ແລະ ສວຍສົດງົດງາມ ຕະຫຼອດໄປ ແລະ ພ້ອມກັນສະເຫຼີມສະຫຼອງ 02 ວັນປະຫວັດສາດສຳຄັນ ໃນປີ 2022 ນີ້ ໃຫ້ມີຄວາມໝາຍສໍາຄັນເລິກເຊິ່ງ ແລະ ມີບັນຍາກາດເບີກບານມ່ວນຊື່ນ.

ໂດຍ: ເຄນໄຊ