ໃນວັນທີ 25-26 ມັງກອນ 2024 ຢູ່ທີ່ ຫ້ອງປະຊຸມ ຂອງກະຊວງຍຸຕິທໍາ ກົມກົດໝາຍ ໄດ້ຈັດກອງປະຊຸມກວດກາຄວາມສອດຄ່ອງທາງດ້ານກົດໝາຍຂອງຮ່າງກົດໝາຍວ່າດ້ວຍ ການສະກັດກັ້ນ ແລະ ຕ້ານອັກຄີໄພ ຂຶ້ນ ໂດຍການເປັນປະທານຮ່ວມຂອງ ທ່ານ ກົງຈີ ຢ່າງຈື່ ຮອງລັດຖະມົນຕີ ກະຊວງຍຸຕິທຳ ແລະ ທ່ານ ພົນຕີ ສົມວັນ ສາຍລ້ອງພາ ຮອງລັດຖະມົນຕີ ກະຊວງ ປ້ອງກັນຄວາມສະຫງົບ, ມີຫົວໜ້າ-ຮອງຫົວໜ້າກົມກົດໝາຍ, ຫົວໜ້າ-ຮອງຫົວໜ້າພະແນກ, ພາກສ່ວນທີ່ກ່ຽວຂ້ອງ ແລະ ຄະນະຮັບຜິດຊອບປັບປຸງສ້າງຮ່າງກົດໝາຍ ດັ່ງກ່າວ ເຂົ້າຮ່ວມທັງໝົດຈຳນວນ 38 ທ່ານ, ຍິງ 07 ທ່ານ.
ຊຶ່ງຮ່າງກົດໝາຍວ່າດ້ວຍ ການສະກັດ
ກັ້ນ ແລະ ຕ້ານອັກຄີໄພ ໄດ້ກໍານົດບັນດາຫຼັກການ, ລະບຽບການ ແລະ ມາດຕະການ ກ່ຽວກັບການ ຄຸ້ມຄອງ, ຕິດຕາມ ກວດກາ ວຽກງານສະກັດກັ້ນ ແລະ ຕ້ານອັກຄີໄພ ມີຄວາມໜັກແໜ້ນ, ເຂັ້ມແຂງ, ຊໍານານທາງດ້ານວິຊາສະເພາະ, ມີແບບ ແຜນວິທີເຮັດວຽກທີ່ວ່ອງໄວ, ທັນສໄໝເທື່ອລະກ້າວ, ຮັບປະກັນໃຫ້ການສະກັດກັ້ນ ແລະ ຕ້ານອັກຄີໄພມີປະສິດທິພາບ ແລະ ປະສິດທິຜົນ ແນໃສ່ປ້ອງກັນຜົນກະທົບຕໍ່ຊີວິດ, ສຸຂະພາບ, ຊັບສິນຂອງພົນລະເມືອງ, ຂອງລັດ, ທໍາມະຊາດ ແລະ ສິ່ງແວດລ້ອມ ເຮັດໃຫ້ສັງຄົມມີຄວາມສະຫງົບ ແລະ ປອດໄພ ທາງດ້ານອັກ ຄີໄພ ປະກອບສ່ວນເຂົ້າໃນປົກປັກຮັກສາ ແລະ ພັດທະນາປະເທດຊາດ. ເພື່ອເຮັດໃຫ້ຮ່າງກົດໝາຍສະບັບນີ້ມີເນື້ອໃນຄົບຖ້ວນ, ສົມບູນ ແລະ ຮັດກຸມຂຶ້ນຕື່ມ ຜູ້ເຂົ້າຮ່ວມປະຊຸມກໍໄດ້ມີການສົນທະນາ ແລະ ແລກປ່ຽນຄວາມຄິດເຫັນ ຢ່າງກົງໄປກົງມາ ແລະ ດ້ວຍຄວາມຮັບຜິດ ຊອບສູງ.
ໃນຕອນທ້າຍ ຄະນະປະທານກອງປະຊຸມ ກໍໄດ້ຜັດປ່ຽນກັນມີຄໍາເຫັນ ຊຶ່ງກ່ອນອຶ່ນກໍໄດ້ສະແດງຄວາມຂອບໃຈ ມາຍັງບັນດາທ່ານ ຜູ້ຕາງໜ້າ ຈາກພາກສ່ວນຕ່າງໆທີ່ກ່ຽວຂ້ອງທີ່ໄດ້ສະລະເວລາ ເຂົ້າຮ່ວມໃນການຄົ້ນຄວ້າ ແລະ ປະກອບຄຳເຫັນໃສ່ຮ່າງກົດໝາຍສະບັບນີ້ ໃຫ້ມີເນື້ອໃນຄົບ ຖ້ວນ, ສົມບູນ ແລະ ຮັດກຸມຂຶ້ນ.
ຂ່າວໂດຍ: ອ່ອນຄໍາ; ພາບ: ນ. ບຸນຖອມ
