ຄະນະບໍລິຫານງານ ສູນກາງສະຫະພັນແມ່ຍິງລາວ ເປັນເຈົ້າພາບຈັດກອງປະຊຸມກະກຽມດ້ານເນື້ອໃນໃຫ້ແກ່ກອງປະຊຸມສຸດຍອດການນໍາແມ່ຍິງອາຊຽນ ຄັ້ງທີ III ພາຍໃຕ້ຫົວຂໍ້: “ສົ່ງເສີມວຽກງານເສດຖະກິດການດູແລເບິ່ງແຍງ ແລະ ຄວາມເຂັ້ມແຂງ ເພື່ອກ້າວສູ່ປະຊາຄົມອາຊຽນ ຫຼັງປີ 2025” ໃນວັນທີ 21 ສິງຫາ 2024 ທີ່ໂຮງແຮມຄຣາວພລາຊາ, ນະຄອນຫຼວງວຽງຈັນ ມີຜູ້ຕາງໜ້າຄະນະກໍາມະການແມ່ຍິງອາຊຽນ ຫລື(ACW), ຄະນະກໍາມາທິການອາຊຽນເພື່ອສົ່ງເສີມ ແລະປົກປ້ອງສິດທິຂອງແມ່ຍິງ ແລະ ເດັກ (ACWC) ຈາກບັນດາປະເທດສະມາຊິກອາຊຽນ; ຜູ້ຕາງໜ້າຈາກຂະແໜງການກ່ຽວຂ້ອງປິ່ນອ້ອມຂອງອາຊຽນ, ກອງເລຂາອາຊຽນບັນດາຄູ່ຮ່ວມພັດທະນາ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມໃນຮູບແບບຊື່ງໜ້າ ແລະຜ່ານລະບົບທາງໄກ.
ທ່ານ ນາງ ທໍາມາ ເພັດວິໄຊ, ຮອງປະທານ ຄະນະບໍລິຫານງານ ສູນກາງສະຫະພັນແມ່ຍິງລາວ ມີຄໍາເຫັນວ່າ: ປະຊາຄົມອາຊຽນໄດ້ຮັບຮູ້ກ່ຽວກັບວຽກງານການດູແລເບິ່ງແຍງເພິ່ມຂຶ້ນ ສະແດງອອກໃນຂອບວຽກຮອບດ້ານຂອງອາຊຽນ ຕໍ່ກັບວຽກງານເສດຖະກິດການດູແລເບິ່ງແຍງ ແລະ ຢັ້ງຢືນເຖິງຄວາມມຸ່ງໝັ້ນຂອງປະຊາຄົມອາຊຽນໃນການແກ້ໄຂບັນຫາ, ສິ່ງທ້າທາຍຕໍ່ແມ່ຍິງ ແລະ ເດັກຍິງທີ່ຕ້ອງແບກຫາບ ວຽກດູແລເບິ່ງແຍງ ແລະເຮັດວຽກໃນຄົວເຮືອນທີ່ບໍ່ໄດ້ຮັບຄ່າຈ້າງ, ເຊິ່ງເປັນອຸປະສັກກີດຂວາງໃນການເຂົ້າເຖິງການຈ້າງງານ, ການມີວຽກເຮັດງານທໍາທີ່ໄດ້ຮັບຄ່າຈ້າງ ແລະສົ່ງຜົນກະທົບເຖິງຄວາມບໍ່ສະເໝີພາບຍິງ-ຊາຍ ໃນກໍາລັງແຮງງານ ແລະເປັນຂໍ້ຈໍາກັດດ້ານເສດຖະກິດຂອງແມ່ຍິງ ແລະເດັກຍິງໃນພາກພື້ນ.
ເປົ້າໝາຍການພັດທະນາແບບຍືນຍົງ 2030, ຖະແຫຼງການປັກກິ່ງ ແລະ ແຜນປະຕິບັດງານ, ວິໄສທັດປະຊາຄົມອາຊຽນ 2025 ໄດ້ເນັ້ນໜັກກ່ຽວກັບການສົ່ງເສີມຄວາມສະເໝີພາບຍິງ-ຊາຍ, ການປົກປ້ອງສັງຄົມ ແລະ ວຽກງານທີ່ເໝາະສົມໂດຍຮັບຮູ້ວ່າ ຄວາມສະເໝີພາບຍິງ-ຊາຍຈະບໍ່ສາມາດບັນລຸໄດ້ ຖ້າບໍ່ມີການແກ້ໄຂບັນຫາໃນເສດຖະກິດການດູແລເບິ່ງແຍງ, ສະເພາະໃນ ສປປລາວ, ແມ່ຍິງ ແລະ ເດັກຍິງ ຕ້ອງແບກຫາບພາລະໃນວຽກການດູແລເບິ່ງແຍງ ແລະວຽກໃນຄົວເຮືອນທີ່ບໍ່ໄດ້ຮັບຄ່າຈ້າງ ຫລາຍກວ່າຜູ້ຊາຍປະມານ 5 ເທື່ອ ( ອີງຕາມການສໍາຫລວດມຸມມອງດ້ານບົດບາດຍິງ-ຊາຍກ່ຽວກັບວຽກງານດູແລທີ່ບໍ່ສົມສ່ວນ ທີ່ບໍ່ໄດ້ຮັບຄ່າຈ້າງໃນລາວ ໂດຍທະນາຄານພັດທະນາອາຊີ ) ແລະ ອີງຕາມຜົນການສໍາຫລວດ ປະຊາກອນ ແລະພົນລະເຮືອນ ໃນປີ 2015 ຂອງສູນສະຖິຕິແຫ່ງຊາດຂອງລາວ, ໃຫ້ຮູ້ວ່າ 61% ຂອງແມ່ຍິງໃນໄວອອກແຮງງານ ແມ່ນເຮັດວຽກເປັນຜູ້ດູແລເບິ່ງແຍງໃນຄອບຄົວ ໂດຍບໍ່ໄດ້ຮັບຄ່າຈ້າງ, ກົງກັນຂ້າມ ເມື່ອທຽບກັບຜູ້ຊາຍ ແມ່ນກວມເອົາພຽງ 26%.
ກອງປະຊຸມຄັ້ງນີ້ເປັນເວທີເປີດໂອກາດໃຫ້ຜູ້ແທນສົນທະນາ, ປຶກສາຫາລື-ແລກປ່ຽນບົດຮຽນ ແລະແບ່ງ ປັນວິທີການປະຕິບັດທີ່ດີລະຫວ່າງກັນ ໃນຫລາຍຫົວຂໍ້ທີ່ກຽ່ວຂ້ອງກັບເສດຖະກິດການດູແລເບິ່ງແຍງ ລວມທັງ ການນໍາສະເໜີເນື້ອໃນຂອງຮ່າງ“ ຖະແຫຼງການອາຊຽນວ່າດ້ວຍການສົ່ງເສີມວຽກງານເສດຖະກິດການດູແລເບິ່ງແຍງ ແລະຄວາມເຂັ້ມແຂງ ເພື່ອກ້າວສູ່ປະຊາຄົມອາຊຽນທີ່ຍືນຍົງ ຫຼັງປີ 2025” ກ່ອນຈະນໍາສະເໜີຕໍ່ ກອງປະຊຸມສຸດຍອດການນໍາແມ່ຍິງອາຊຽນ ທີ່ຈະເປີດຂຶ້ນໃນວັນທີ 23 ສິງຫາ 2024 ເພື່ອປະກອບສ່ວນເຂົ້າໃນການສົ່ງເສີມຄວາມສະເໝີພາບຍິງ-ຊາຍ ແລະ ສ້າງຄວາມເຂັ້ມແຂງໃຫ້ແມ່ຍິງໃນທົ່ວພາກພື້ນອາຊຽນ.
