ຜູ້ຕາງຫນ້າຈາກພາກສ່ວນຕ່າງໆ, ລວມເຖີງບັນນາທິການຈາກບັນດາສໍານັກຂ່າວຂອງລາວ ເກືອບ 100 ຄົນ ໄດ້ເຂົ້າຮ່ວມກອງປະຊຸມກ່ຽວກັບການດຳເນີນທຸລະ ກິດຂອງລັດວິສາຫະກິດໄຟຟ້າລາວ ເຊີ່ງຈັດຂຶ້ນໃນວັນທີ 16 ມັງ ກອນນີ້, ທີ່ສໍານັກງານໃຫຍ່ລັດວິສາຫະກິດໄຟຟ້າລາວ ໂດຍມີ ທ່ານ ພູທະນູເພັດ ໄຊສົມບັດ, ຮອງລັດ ຖະມົນຕີກະຊວງການເງິນ, ຫົວຫນ້າຄະນະປະຕິຮູບລັດວິສາຫະກິດໄຟຟ້າລາວ ແລະ ທ່ານ ຈັນທະບູນ ສຸກອາລຸນ, ຜູ້ອຳນວຍການໃຫຍ່ລັດວິສາຫະກິດໄຟຟ້າລາວ ຮ່ວມ ກັນເປັນປະທານ ເພື່ອພ້ອມກັນທໍາຄວາມເຂົ້າໃຈໃຫ້ເລິກເຊີ່ງຂຶ້ນຕື່ມກ່ຽວກັບສະພາບການດໍາເນີນທຸລະກິດຂອງລັດວິສາ ຫະກິດໄຟຟ້າລາວ, ພ້ອມທັງຊ່ວຍກັນປະກອບຄໍາຄິດຄໍາເຫັນກ່ຽວກັບຫລັກການ ແລະ ວິທີທາງແກ້ໄຂບັນຫາຂອງລັດວິສາຫະ ກິດດັ່ງກ່າວທີ່ພົວພັນເຖີງຄວາມຫມັ້ນຄົງທາງດ້ານພະລັງງານຂອງຊາດ.
ໃນໂອກາດນີ້ ທ່ານ ຈັນທະບູນ ສຸກອາລຸນ ໄດ້ຍົກໃຫ້ເຫັນຄວາມເປັນມາ, ສະພາບ ການຜະລິດໄຟຟ້າ, ການດໍາເນີນທຸລະກິດ, ສະພາບຄວາມຫຍຸ້ງຍາກ, ສະພາບໜີ້ສິນ, ແຜນການປະຕິຮູບ ແລະ ອື່ນໆ ຂອງລັດວິສາຫະກິດໄຟຟ້າທີ່ເປັນວິສາຫະກິດຍຸດທະ ສາດຂອງປະເທດທີ່ມີປະຫວັດອັນຍາວນານຢູ່ຄຽງຄູ່ກັບການເຕີບໃຫຍ່ຂະຫຍາຍຕົວຂອງປະເທດຊາດ ນັບແຕ່ສະໄໝກ່ອນປົດປ່ອຍ ຈົນມາເຖິງປັດຈຸບັນ ເຊີ່ງເວົ້າໄດ້ວ່າເປັນວິສາຫະກິດທີ່ມີມູນຄ່າຊັບສິນສູງທີ່ສຸດໃນປະເທດ, ມີໜ້າທີ່ຍຸດທະສາດທີ່ພັກ – ລັດ ມອບໝາຍໃຫ້ ໂດຍສະເພາະແມ່ນຮັບປະກັນການສະໜອງໄຟໃຫ້ປະຊາຊົນລາວບັນດາເຜົ່າສາມາດມີໄຟຟ້າໃຊ້ຢ່າງພຽງພໍ ແລະ ທົ່ວເຖິງ ຕາມທິດທາງນະໂຍ ບາຍທີ່ລັດຖະບານກຳນົດໄວ້ ດຳເນີນທຸລະກິດໃຫ້ມີປະສິດທິພາບ ແລະ ປະສິດທິຜົນ ໂດຍແນໃສ່ສ້າງອຸດສາຫະກຳໄຟຟ້າໃຫ້ເປັນຂະແໜງການຫຼັກໃນການພັດທະນາເສດ ຖະກິດ- ສັງຄົມ ແລະ ສ້າງລາຍຮັບໃຫ້ແກ່ປະເທດ.
ນອກຈາກໄດ້ຮັບຟັງກ່ຽວກັບສະພາບການດໍາເນີນທຸລະກິດ, ຜູ້ເຂົ້າຮ່ວມຍັງໄດ້ປະກອບຄໍາເຫັນຫລາຍບັນຫາເພື່ອແລກປ່ຽນຄໍາຄິດຄໍາເຫັນແນໃສ່ເຮັດໃຫ້ການດໍາເນີນທຸລະກິດຂອງລັດວິສາຫະກິດໄຟຟ້າລາວນັບມື້ດີຂຶ້ນ, ສາມາດແກ້ໄຂບັນຫາໜີ້ສິນທີ່ມີຢູ່ ແລະ ນັບມື້ສ້າງລາຍຮັບມາໃຫ້ແກ່ປະເທດຊາດດີຂຶ້ນກວ່າເກົ່າ.
ສໍາລັບລັດວິສາຫະກິດໄຟຟ້າລາວ ແມ່ນໜຶ່ງໃນບັນດາລັດວີສາຫະກິດຂອງລາວທີ່ລັດຖະບານສັ່ງໃຫ້ມີການປະຕິຮູບຄືນໃໝ່ ເພື່ອໃຫ້ການດໍາເນີນງານມີປະສິດທິຜົນກວ່າເກົ່າ ໂດຍໄດ້ປະກາດຄະນະປະຕິຮູບຢ່າງເປັນທາງການໃນວັນທີ 22 ເມສາ ປີ 2022 ຜ່ານມານີ້.
ຂ່າວ: ບຸນຕຽງ ຈັນທະວົງ
ພາບ: ຊໍານານ
Loading...