ໃນຕອນເຊົ້າຂອງວັນທີ 19 ສິງຫາ 2024 ທີ່ ນະຄອນຫຼວງພະບາງ, ທ່ານ ບໍວອນທັດ ດວງຈັກ, ເອກອັກຄະລັດຖະທູດ, ຜູ້ຕາງໜ້າຖາວອນ ແຫ່ງ ສປປ ລາວ ປະຈໍາອາຊຽນ ໃນນາມປະທານຄະນະກຳມະການດ້ານການເຊື່ອມຈອດອາຊຽນ ສໍາລັບປີ 2024 ໄດ້ເປັນປະທານກອງປະຊຸມຄະນະກຳມະການດ້ານການເຊື່ອມຈອດອາຊຽນ ຄັ້ງທີ 3/2024 ແລະ ກອງປະຊຸມຄະນະກຳມະການດ້ານການເຊື່ອມຈອດອາຊຽນກັບຮ່ວມເຈລະຈາ ແລະ ຄູ່ຮ່ວມມືພາຍນອກອາຊຽນ ASEAN Connectivity Coordinating Committee (ACCC) ແລະ ACCC Consultations with Dialogue Partners and Other External Partners on Connectivity 2024. ຜູ້ແທນ ທີ່ເຂົ້າຮ່ວມກອງປະຊຸມດັ່ງກ່າວ ປະກອບມີບັນດາສະມາຊິກຄະນະກໍາມາການດ້ານການເຊື່ອມຈອດອາຊຽນ, ຕີມໍແລັດສະເຕ ໃນນາມຜູ້ສັງເກດການ ແລະ ບັນດາປະເທດຄູ່ຮ່ວມເຈລະຈາ ແລະ ບາງປະເທດຈາກຄູ່ຮ່ວມມືພາຍນອກອາຊຽນ ແລະ ກອງເລຂາອາຊຽນ.
ກອງປະຊຸມຄະນະກຳມະການດ້ານການເຊື່ອມຈອດອາຊຽນຄັ້ງທີ 3/2024 ໄດ້ປຶກສາຫາລື ແລະ ທົບທວນຄືນຄວາມຄືບໜ້າ ແລະ ສິ່ງທ້າທາຍໃນຜົນການຈັດຕັ້ງປະຕິບັດແຜນແມ່ນບົດການເຊື່ອມຈອດອາຊຽນ 2025 ເຊິ່ງມາຮອດປັດຈຸບັນແມ່ນຍັງມີພຽງ 28 ມາດຕະການ ທີ່ກຳລັງສືບຕໍ່ຈັດຕັ້ງປະຕິບັດ. ໃນນີ້, ກອງປະຊຸມໄດ້ປຶກສາຫາລືຊ່ອງທາງໃນການແກ້ໄຂສິ່ງທ້າຍທາຍ ໃນການຈັດຕັ້ງປະຕິບັດແຜນວຽກການເຊື່ອມຈອດອາຊຽນເພື່ອໃຫ້ສຳເລັດຕາມແຜນໃນປີ 2025 ທີ່ກຳນົດໄວ້. ໃນຄະນະດຽວກັນ ກອງປະຊຸມກໍ່ໄດ້ປຶກສາຫາລືການກະກຽມເຮັດບົດລາຍງານທົບທວນໄລຍະສຸດທ້າຍຂອງແຜນວຽກການເຊື່ອມຈອດອາຊຽນ 2025 ແລະ ຮ່າງເອກະສານເພື່ອກະກຽມໃສ່ແຜນຍຸດທະສາດດ້ານການເຊື່ອມຈອດອາຊຽນ ທີ່ຈະມາແທນເອກະສານແຜນວຽກດ້ານການເຊື່ອມຈອດອາຊຽນທີ່ຈະກຳນົດໃນປີ 2025.
ພາຍຫຼັງສຳເລັດກອງປະຊຸມສະເພາະພາຍໃນອາຊຽນ, ໃຕຕອນບ່າຍຂອງມື້ດຽວກັນ ຄະນະກໍາມະການດ້ານການເຊື່ອມຈອດອາຊຽນໄດ້ສືບຕໍ່ປະຊຸມຮ່ວມກັບບັນດາຄູ່ຮ່ວມເຈລະຈາທັງ 11 ປະເທດ ແລະ ປະເທດຄູ່ຮ່ວມມືພາຍນອກອາຊຽນ ເພື່ອແລກປ່ຽນຄວາມຄິດເຫັນ ກ່ຽວກັບ ຄວາມຄືບໜ້າ ແລະ ສິ່ງທ້າທາຍໃນການຈັດຕັ້ງປະຕິບັດແຜນການເຊື່ອມຈອດອາຊຽນ ແລະ ບັນດາໂຄງການຂອງບັນດາປະເທດຄູ່ເຈລະຈາ ແລະ ຄູ່ຮ່ວມມືພາຍນອກທີ່ໃຫ້ການສະໜັບສະໜູນດ້ານການເຊື່ອມຈອດອາຊຽນ. ປະເດັນສຳຄັນຂອງກອງປະຊຸມຄັ້ງນີ້ແມ່ນ ເພື່ອສືບຕໍ່ຍາດແຍ່ງການຊ່ວຍເຫຼືອສະໜັບສະ ໜູນຈາກບັນດາປະເທດຄູ່ຮ່ວມເຈລະຈາລວມທັງພາຍໃນອາຊຽນ ໃນວຽກງານດ້ານການເຊື່ອມຈອດອາຊຽນ ພາຍໃຕ້ໂຄງການໃນຂອບການເຊື່ອມຈອດອາຊຽນໃຫ້ຫຼາຍຍິ່ງຂຶ້ນ ແລະ ເປັນເວທີຊຸກຍູ້ໃຫ້ບັນດາຄູ່ຮ່ວມມີໂຄງການໃໝ່ໆໃນອານາຄົດ.
