ກອງປະຊຸມຄະນະກຳມະການປະສານງານຮ່ວມ ຂອງເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ຄັ້ງທີ II

ກອງປະຊຸມຄະນະກຳມະການປະສານງານຮ່ວມ ຂອງເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ຄັ້ງທີ II ໄດ້ຈັດຂຶ້ນຢ່າງເປັນທາງການໃນຕອນເຊົ້າວັນທີ 29 ສິງຫາ 2024 ທີ່ກະຊວງແຜນການ ແລະ ການລົງທຶນ, ນະຄອນຫຼວງວຽງຈັນ ໂດຍການເປັນປະທານຮ່ວມຂອງ ທ່ານ ໄຊຊະນະ ສິດທິພອນ, ຮອງປະທານຄະນະກຳມະການຮ່ວມມືລາວ-ຈີນ, ກະຊວງແຜນການ ແລະ ການລົງທຶນ ແລະ ທ່ານ ຫລົງຈີ່ (Ling Ji), ຮອງລັດຖະມົນຕີ ກະຊວງການຄ້າ, ຮອງຜູ້ຕາງໜ້າ ເຈລະຈາການຄ້າສາກົນ ສປ ຈີນ, ທັງເປັນປະທານຄະນະກຳມະການປະສານງານຮ່ວມ ເຂດຮ່ວມມືເສດຖະກິດເຕ່ນ ສປປ ລາວ ບໍ່ຫານ ສປ ຈີນ ຝ່າຍຈີນ ໂດຍມີທ່ານຮອງເຈົ້າແຂວງໆຫຼວງນໍ້າທາ, ແຂວງຢຸນນານ ແລະ ຄະນະຜູ້ແທນຂັ້ນກົມ ຈາກຂະແໜງການທີ່ ກ່ຽວຂ້ອງຈາກ ສປປ ລາວ ແລະ ສປ ຈີນ ເຂົ້າຮ່ວມ.

ກອງປະຊຸມຄັ້ງນີ້ ມີຈຸດປະສົງເພື່ອປຶກສາຫາລືແຜນວຽກຂອງຄະນະກຳມະການປະສານງານ ພ້ອມທັງຮັບຟັງ ການລາຍງານສະພາບຄວາມຄືບໜ້າ, ສິ່ງທ້າທາຍ ກ່ຽວກັບການພັດທະນາຢູ່ເຂດຮ່ວມມື ເພື່ອພ້ອມກັນວາງທິດທາງ ແຜນການໃນຕໍ່ໜ້າໂດຍສະເພາະແມ່ນການປັບປຸງກົນໄກການອໍານວຍຄວາມສະດວກດ້ານຕ່າງໆໃນເຂດຮ່ວມມື ເຊັ່ນ ການເດີນທາງເຂົ້າ-ອອກຂອງຄົນ, ພາຫະນະ ແລະ ສິນຄ້າ ລວມເຖິງນະໂຍບາຍຕ່າງໆທີ່ຈະຕ້ອງໄດ້ພ້ອມກັນຊຸກຍູ້ ສົ່ງເສີມ ໃນການຈັດຕັ້ງປະຕິບັດຮ່ວມກັນ, ລວມເຖິງການປຶກສາຫາລືກ່ຽວກັບການປັບປຸງບາງມາດຕາຂອງ “ຂອບ ແຜນຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ” ທີ່ລັດຖະບານ ສປປ ລາວ ແລະ ສປ ຈີນ ໄດ້ລົງນາມ ຮ່ວມກັນໃນວັນທີ 31 ສິງຫາ 2015 ກໍ່ຄືແຜນແມ່ບົດຫຍໍ້ຂອງການພັດທະນາເຂດຮ່ວມມືເສດຖະກິດ ບໍ່ເຕ່ນ ສປປ ລາວ ບໍ່ຫານ ສປ ຈີນ ສະບັບລົງວັນທີ 28 ພະຈິກ 2016, ເພື່ອໃຫ້ສອດຄ່ອງຮັບສະພາບຕົວຈິງຂອງການ ພັດທະນາ ໂດຍສະເພາະແມ່ນກົນໄກການປະສານງານ 3 ລະດັບຄື:

1. ຄະນະກຳມະການປະສານງານຮ່ວມ ຊຶ່ງຮ່ວມເປັນປະທານໂດຍ ຮອງລັດຖະມົນຕີກະຊວງແຜນການ ແລະການລົງທຶນ ສປປ ລາວ ແລະ ຮອງລັດຖະມົນຕີກະຊວງການຄ້າ ສປ ຈີນ ມີຮອງເຈົ້າແຂວງແຂວງຫລວງນໍ້າທາ ແລະ ຮອງເຈົ້າແຂວງຢຸນໜານ ເປັນຮອງປະທານ. ສະມະຊິກແມ່ນມາຈາກທຸກຂະແໜງການທີ່ກ່ຽວຂ້ອງ;

2. ໜ່ວຍປະຕິບັດງານເຂດຮ່ວມມື ຝ່າຍຈີນ ສະເໜີປັບປຸງກົນໄກພາຍໃນຂອງຕົນໂດຍປ່ຽນ ຈາກກົມການຄຸ້ມຄອງການລົງທຶນຕ່າງປະເທດ, ກະຊວງການຄ້າ ມາເປັນອໍານາດການປົກຄອງທ້ອງຖິ່ນນະຄອນຄຸນໝິງ;ພະແນກການຄ້າ ນະຄອນຄຸນໝິງ ສປ ຈີນ, ສ່ວນຝ່າຍລາວແມ່ນຍັງຮັກສາໂຄງປະກອບເດີມຄື ຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ, ກະຊວງແຜນການ ແລະ ການລົງທຶນ ເປັນຫົວໜ້າໜ່ວຍປະຕິບັດງານ ທີ່ປະກອບດ້ວຍຂະແໜງການທີ່ກ່ຽວຂ້ອງຂັ້ນສູນກາງ ແລະ ແຂວງຫຼວງນໍ້າທາ ຊຶ່ງມີໜ້າທີ່ຮັບຜິດຊອບ ຜັນຂະຫຍາຍເນື້ອໃນບັນດາຂໍ້ກໍານົດຂອງຂອບແຜນຮ່ວມມື ແລະ ຊຸກຍູ້ວຽກງານປະຕິບັດການກໍ່ສ້າງເຂດການຮ່ວມມື, ຮັບການຊີ້ນໍາຈາກ ຄະນະກຳມະການປະສານງານຮ່ວມ ແລະ ລາຍງານຕໍ່ຄະນະກຳມະການດັ່ງກ່າວ;

3. ອົງການບໍລິຫານງານປະຈໍາວັນຂອງເຂດຮ່ວມມື ຊຶ່ງແຕ່ລະຝ່າຍມີອົງການບໍລິຫານປະຈໍາວັນຂອງຕົນ ໂດຍຝ່າຍຈີນ ແມ່ນ ຄະນະກຳມະການຄຸ້ມຄອງເຂດຮ່ວມມືລາວ-ຈີນ ເປັນຫຼັກ ແລະ ຝ່າຍລາວ ແມ່ນ ຄະນະຄຸ້ມຄອງເຂດເສດຖະກິດພິເສດ ແຂວງຫຼວງນໍ້າທາ ເປັນຫຼັກ, ຊຶ່ງຈະມີພາກສ່ວນທີ່ກ່ຽວຂ້ອງປະກອບຢູ່ໃນຄະ

ນະດັ່ງກ່າວ ແລະ ເຫັນດີດ້ານຫຼັກການ ໃນກຳນົດຢ່າງໜ້ອຍຕ້ອງຈັດກອງປະຊຸມຮ່ວມກັນທຸກໆ 06 ເດືອນ (2ຄັ້ງ/ປີ) ຫຼື ອາດຫຼາຍກວ່ານັ້ນໂດຍອີງຕາມຄວາມຈຳເປັນ ແລະ ສະພາບຕົວຈິງຂອງວຽກງານຂອງສອງຝ່າຍ.

ໃນໂອກາດນີ້ທ່ານ ສອນປະເສີດ ດາລາວົງ, ຫົວໜ້າຫ້ອງການສົ່ງເສີມ ແລະ ຄຸ້ມຄອງເຂດເສດຖະກິດພິເສດ (ຫຂສພ), ກະຊວງແຜນການ ແລະ ການລົງທຶນ ໃນນາມຫົວໜ້າໜ່ວຍປະຕິບັດງານ ຝ່າຍລາວ ຂອງເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ໄດ້ລາຍງານ ຕໍ່ກອງປະຊຸມໃຫ້ຊາບໂດຍສັງເຂບວ່າ ໄລຍະ ຜ່ານມາ ໜ່ວຍປະຕິບັດງານຝ່າຍລາວ ໄດ້ສົມທົບແໜ້ນກັບຝ່າຍຈີນ ຢ່າງເປັນປົກກະຕິ ໃນການຈັດຕັ້ງຜັນຂະຫຍາຍ ວຽກງານຕ່າງໆ ເຖິງວ່າໄລຍະຂອງການລະບາດຂອງພະຍາດໂຄວິດ-19 ວຽກງານເຂດຮ່ວມມືເສດຖະກິດບໍ່ເຕ່ນ ສປປ ລາວ ບໍ່ຫານ ສປ ຈີນ ກໍ່ໄດ້ຖືກຍົກຂຶ້ນເພື່ອປຶກສາຫາລືຮ່ວມກັນ ໃນຮູບແບບ Online ຜ່ານວິດີໂອທາງໄກ ກໍ່ຄືກອງປະຊຸມພົບປະຕ່າງໆໃນຂົງເຂດການພົວພັນລາວ-ຈີນ ຊຶ່ງມັນໄດ້ສະແດງອອກໃຫ້ເຫັນເຖິງຄວາມເອົາໃຈໃສ່ ແລະ ເອກະພາບຮ່ວມກັນໃນການຜັນຂະຫຍາຍ ບັນດາເນື້ອໃນທີ່ກໍານົດໃນຂອບແຜນຮ່ວມຂອງເຂດຮ່ວມມື ກໍ່ຄືແຜນແມ່ບົດຫຍໍ້ຂອງການພັດທະນາເຂດຮ່ວມມືເສດຖະກິດ ບໍ່ເຕ່ນ ສປປ ລາວ ບໍ່ຫານ ສປ ຈີນ. ແລະ ຜ່ານການຈັດຕັ້ງ ປະຕິບັດຕົວຈິງ ເຂດຮ່ວມມືຂອງພວກເຮົາແມ່ນມີຄວາມຄືບໜ້າໃນການພັດທະນາໃນຫຼາຍດ້ານ ໂດຍສະເພາະແມ່ນ ພື້ນຖານໂຄງລາງ ເບື້ອງລາວ ຊຶ່ງແມ່ນເຂດເສດຖະກິດພິເສດ ບໍ່ເຕ່ນແດນງາມ. (ຂສບ) ມີເນື້ອທີ່ສໍາປະທານ 1.640 ເຮັກຕາ, ມີຄວາມຄືບໜ້າໃນການພັດທະນາພື້ນຖານໂຄງລ່າງເພື່ອຮອງຮັບການລົງທຶນ ໃນຂະແໜງການຄ້າ, ການ ບໍລິການ ແລະ ການທ່ອງທ່ຽວ; ມີບໍລິສັດເຂົ້າມາລົງທຶນທັງໝົດ 144 ບໍລິສັດ ໃນນັ້ນ, ພາຍໃນ 1 ບໍລິສັດ, ຕ່າງ ປະເທດ 143 ບໍລິສັດ ຊຶ່ງກວມເອົາຂະແໜງອຸດສາຫະກຳ 8%, ການຄ້າ 56% ແລະ ບໍລິການ 36%, ໂດຍມີທຶນທັງ ໝົດ 512,75 ລ້ານໂດລາສະຫະລັດ ແລະ ທຶນຈົດທະບຽນ 374,83 ລ້ານໂດລາສະຫະລັດ; ມີມູນຄ່າການລົງທຶນຕົວ ຈິງ 957,82 ລ້ານໂດລາສະຫະລັດ. ມອບພັນທະເຂົ້າງົບປະມານຂອງລັດ 1,48 ລ້ານໂດລາສະຫະລັດ; ສາມາດສ້າງ ວຽກເຮັດງານທໍາໄດ້ທັງໝົດ 4.640 ຄົນ, ໃນນັ້ນເປັນແຮງງານລາວ 818 ຄົນ.

ຄຽງຄູ່ກັບຜົນສໍາເລັດ ພວກເຮົາຍັງມີສິ່ງທ້າທາຍ ແລະ ບາງຂໍ້ຄົງຄ້າງທີ່ຈະຕ້ອງໄດ້ ສືບຕໍ່ຮ່ວມກັນແກ້ໄຂເພື່ອຊຸກຍູ້ເຂດຮ່ວມມືບໍ່ເຕ່ນ-ບໍ່ຫານ ໃຫ້ກາຍເປັນເຂດຮ່ວມມືທີ່ດີເດັ່ນໃນອານາຄົດ ເປັນຕົ້ນແມ່ນ ເຖິງວ່າຈະໄດ້ກຳນົດບັນດາກົນໄກການຈັດຕັ້ງປະຕິບັດຢູ່ໃນແຜນແມ່ບົດຫຍໍ້ຂອງເຂດຮ່ວມເສດຖະກິດໃນປີ 2016, ແຕ່ເນື່ອງຈາກວ່າວຽກງານການສ້າງເຂດຮ່ວມມືເປັນວຽກງານໃໝ່ ຊຶ່ງໃນລະຍະຜ່ານມາການພັດທະນາແມ່ນ ອີງໃສ່ນິຕິກຳຂອງໃຜລາວໃນການຈັດຕັ້ງປະຕິບັດ ໄປຄຽງຄູ່ກັບການແລກປ່ຽນຄົ້ນຄວ້າຖອດຖອນບົດຮຽນລະຫວ່າງກັນໃນການສ້າງເຂດຮ່ວມມື, ຊຶ່ງສ່ວນໃຫຍ່ການພັດທະນາໄລຍະຜ່ານມາຂອງເຂດຮ່ວມມືແມ່ນຈະສຸມໃສ່ພັດທະນາ ພື້ນຖານໂຄງລ່າງຂອງໃຜມັນ ເພື່ອຮອງຮັບໃຫ້ແກ່ການພັດທະນາ ແລະ ເຊື່ອມຈອດເຂດຮ່ວມມືເຂົ້າຫາກັນ. ສ່ວນການຜັນຂະຫຍາຍບັນດາແຜນວຽກອື່ນໆ ແລະ ກົນໄກຂອງການຮ່ວມມືທີ່ລະບຸໄວ້ໃນຂອບແຜນກໍ່ຄືແຜນແມ່ບົດຫຍໍ້ແມ່ນຍັງບໍ່ທັນສາມາດຈັດຕັ້ງປະຕິບັດໄດ້ຢ່າງຮອບດ້ານ ໂດຍສະເພາະນະໂຍບາຍການຄຸ້ມຄອງການເຂົ້າ-ອອກ ດ່ານຂອງບຸກຄົນ, ສິນຄ້າ ແລະ ພາຫະນະຢ່າງເສລີພາຍໃນເຂດຮ່ວມມືເສດຖະກິດບໍ່ເຕ່ນ ສປປ ລາວ-ບໍ່ຫານ ສປ ຈີນ; ອີງໃສ່ຜົນຂອງກອງປະຊຸມຄະນະກຳມະການປະສານງານຮ່ວມ ຂອງເຂດຮ່ວມມືເສດຖະກິດ ບໍ່ເຕ່ນ ສປປລາວ – ບໍ່ຫານ ສປ ຈີນ ຄັ້ງທີ II ນີ້ ສອງຝ່າຍຈະໄດ້ສືບຕໍ່ເຮັດວຽກຮ່ວມກັນເພື່ອຜັນຂະຫຍາຍເປັນອັນລະອຽດຕື່ມ ໂດຍສະເພາະຝ່າຍລາວແມ່ນຈະໄດ້ສືບຕໍ່ສົມທົບແໜ້ນກັບຂະແໜງການທີ່ກ່ຽວຂ້ອງຂອງສູນກາງ ແລະ ອໍານາດການປົກຄອງຂອງແຂວງຫຼວງນໍ້າທາ ກໍ່ຄືຜູ້ພັດທະນາເຂດເສດຖະກິດພິເສດບໍ່ເຕ່ນແດນງາມ ເພື່ອທົບທວນຄືນການຈັດຕັ້ງປະຕິບັດ ຂອບແຜນຮ່ວມມື ກໍ່ຄືແຜນແມ່ບົດຫຍໍ້ຂອງການພັດທະນາເຂດຮ່ວມມືເສດຖະກິດ ບໍ່ເຕ່ນ ສປປ ລາວ – ບໍ່ຫານ ສປ ຈີນ ສະບັບປະຈຸບັນ ກ່ອນຈະສັງລວມລາຍງານ ເພື່ອສະເໜີຂັ້ນເທິງຂອງຕົນພິຈາລະນາ ແລະ ຮັບຮອງແຜນແມ່ບົດຫຍໍ້ສະບັບປັບປຸງ ເພື່ອເປັນບ່ອນອີງໃນການວຽກງານການພັດທະນາເຂດຮ່ວມມືໃນຕໍ່ໜ້າ.

#ຂ່າວອອນລາຍວສລ.