ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມຄະນະກໍາມະການລະດັບຊາດເພື່ອມໍລະດົກໂລກ ຄັ້ງທີ 9

ກອງປະຊຸມຄະນະກໍາມະການລະດັບຊາດເພື່ອມໍລະດົກໂລກ ຄັ້ງທີ 9 ຈັດຂື້ນໃນວັນທີ 20 ສິງຫານີ້, ທີ່ຫໍວັດທະນາທຳແຫ່ງຊາດ ນະຄອນຫລວງວຽງຈັນ ເພື່ອທົບທວນຄືນສະພາບການຈັດຕັ້ງປະຕິບັດວຽກງານມໍລະດົກລາວເພື່ອມໍລະດົກໂລກໃນຊຸມປີຜ່ານມາ ແລະທິດທາງການເຄື່ອນໄຫວຂອງຄະນະກຳມະການລະດັບຊາດເພື່ອມໍລະດົກໂລກ ໂດຍມີທ່ານ ກິແກ້ວ ໄຂຄຳພິທູນ ລັດຖະມົນຕີກະຊວງຖະ ແຫລງຂ່າວ, ວັດທະນາທຳ ແລະທ່ອງທ່ຽວ ທັງເປັນປະທານຄະນະກຳມະການລະດັບຊາດເພື່ອມໍລະ ດົກໂລກ ພ້ອມດ້ວຍຮອງລັດຖະມົນຕີ, ຮອງເຈົ້າແຂວງ ແລະພາກສ່ວນກ່ຽວຂ້ອງເຂົ້າຮ່ວມ.
ທ່ານ ກິແກ້ວ ໄຂຄໍາພິທູນ ຍົກໃຫ້ເຫັນວ່າ: ກອງປະຊຸມປະຈໍາປີຂອງຄະນະກໍາມະການລະດັບຊາດ ເພື່ອມໍລະດົກໂລກຄັ້ງນີ້ມີຄວາມໝາຍສຳຄັນຍີ່ງ ເນື່ອງຈາກບັນດາເນື້ອໃນທີ່ນໍາມາສະເໜີ ແລະປຶກສາຫາລືລ້ວນແຕ່ເປັນບັນຫາພື້ນຖານຂອງການຄຸ້ມຄອງ ແລະປົກປັກຮັກສາມໍລະດົກໂລກຂອງລາວ ເປັນຕົ້ນຜົນສຳເລັດ, ຂໍ້ສະດວກ, ຂໍ້ຫຍຸ້ງຍາກ ແລະບັນຫາທ້າທາຍໃນການຈັດຕັ້ງປະຕິບັດວຽກງານມໍລະດົກລາວເພື່ອມໍລະດົກໂລກຂອງກົມມໍລະດົກ ຊື່ງເປັນກອງເລຂາຂອງຄະນະກຳມະການລະດັບຊາດເພື່ອມໍລະດົກໂລກໃນຊຸມປີຜ່ານມາ ແລະທິດທາງແຜນການໃນຕໍ່ໜ້າ, ການຈັດຕັ້ງປະຕິບັດວຽກງານຄຸ້ມຄອງ ແລະປົກປັກຮັກສາມໍລະດົກໂລກທັງ 3 ແຫ່ງຄື: ຫລວງພະບາງ, ວັດພູຈຳປາສັກ ແລະທົ່ງໄຫຫີນແຂວງຊຽງຂວາງ, ການປະຕິບັດພັນທະຂອງລາວຕໍ່ສົນທິສັນຍາສາກົນຂອງອົງການສຶກສາວິທະຍາສາດ ແລະວັດທະນາທຳແຫ່ງສະຫະປະຊາຊາດ ຫລືອຸຍເນັສໂກ ລວມເຖິງການຈັດຕັ້ງປະຕິບັດໂຄງການນໍາສະເໜີອຸທິຍານແຫ່ງຊາດຫີນໜາມໜໍ່ ເມືອງບົວລະພາແຂວງຄຳມວ່ນເຂົ້າເປັນມໍລະດົກໂລກທາງທຳມະຊາດຂອງລາວ.
ຂ່າວ: ຈັນທະສອນ ສີຫານາດ
ພາບ: ບຸນມີ​ ຫນັງສືພິມ ວຽງຈັນໃຫມ່