ກອງປະຊຸມຄະນະປະຈໍາສະພາແຫ່ງຊາດ ປະຈໍາເດືອນສິງຫາ 2024 ໄດ້ດໍາເນີນໃນວັນທີ 03-04 ກັນຍາ 2024 ໂດຍການເປັນປະທານຂອງ ທ່ານ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານຄະນະປະຈໍາສະພາແຫ່ງຊາດ.
ກອງປະຊຸມໄດ້ພິຈາລະນາບັນຫາສໍາຄັນພື້ນຖານຂອງປະເທດຊາດ ຕາມຂອບເຂດສິດ ແລະ ໜ້າທີ່ ຂອງຄະນະປະຈໍາສະພາແຫ່ງຊາດ ທີ່ໄດ້ກໍານົດໄວ້ໃນລັດຖະທໍາມະນູນ ແລະ ກົດໝາຍ ເປັນຕົ້ນ: ໜັງສືສະເໜີຂອງລັດຖະບານ ກ່ຽວກັບການດັດແກ້ສັນຍາສຳປະທານໂຄງການເຂື່ອນໄຟຟ້າດອນສະໂຮງ; ໜັງສືສະເໜີຂອງລັດຖະບານ ກ່ຽວກັບການຍົກເວັ້ນການຄິດໄລ່ອາກອນລາຍໄດ້ສຳລັບການເພີ່ມເງິນອຸດໜູນຄ່າຄອງຊີບໃຫ້ແກ່ພະນັກງານ-ລັດຖະກອນ, ທະຫານ, ຕຳຫຼວດ, ພະນັກງານບຳນານ ແລະ ຜູ້ເສຍອົງຄະ; ຮ່າງແຜນຈັດສັນງົບປະມານການລົງທຶນຂອງລັດ ປະຈຳປີ 2025; ໜັງສືສະເໜີຂອງຄະນະປະຈໍາສະພາປະຊາຊົນນະຄອນຫຼວງວຽງຈັນ ກ່ຽວກັບການຂໍໃຫ້ປຶກສາຫາລືຮ່ວມກັບ ລັດຖະບານ ໃນການພິຈາລະນາທົບທວນການອະນຸມັດສຳຫຼວດ, ຊອກຄົ້ນ ແລະ ຂຸດຄົ້ນແຮ່ເກືອແຮ່ໂປຕາສ ຢູ່ນະຄອນຫຼວງວຽງຈັນ.
ນອກຈາກນີ້, ຍັງໄດ້ຮັບຟັງການລາຍງານຜົນການຮຽບຮຽງເນື້ອໃນກົດໝາຍຂົງເຂດສະພາແຫ່ງຊາດ 3 ສະບັບ ຄື: ກົດໝາຍວ່າດ້ວຍສະພາແຫ່ງຊາດ, ກົດໝາຍວ່າດ້ວຍສະພາປະຊາຊົນຂັ້ນແຂວງ ແລະ ກົດໝາຍວ່າດ້ວຍການເລືອກຕັ້ງສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ລາຍງານຄືນຜົນການປັບປຸງເນື້ອໃນຂອງຮ່າງກົດໝາຍວ່າດ້ວຍການສົ່ງເສີມການລົງທຶນ; ລາຍງານຄວາມຄືບໜ້າດ້ານຕ່າງໆໃນການກະກຽມເປັນເຈົ້າພາບຈັດກອງປະຊຸມສະມັດຊາໃຫຍ່ ລັດຖະສະພາ ລະຫວ່າງ ຊາດອາຊຽນ ຫຼື ໄອປາ (AIPA) ຄັ້ງທີ 45 ແລະ ກອງປະຊຸມພົບປະລະຫວ່າງຜູ້ນຳອາຊຽນ ແລະ ຜູ້ນຳໄອປາ ພ້ອມທັງທິດທາງແຜນການວຽກງານໃນຕໍ່ໜ້າ; ພິຈາລະນາຄຳຮ້ອງຂໍຄວາມເປັນທຳ 3 ເລື່ອງ.
ຂ່າວ: ນາງ ກຸກກິກ ບຸດດາໄຊ, ພາບ: ສອນສັກ ວັນວິໄຊ
