ກອງປະຊຸມຄະນະອະນຸກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປລາວ-ໄທ ຄັ້ງທີ I ປີ 2024 (66) ໄດ້ຈັດຂຶ້ນໃນວັນທີ 15 ກຸມພາ 2024 ນີ້, ທີ່ແຂວງຫຼວງພະບາງ, ສາທາລະນະລັດ ປະຊາທິປະໄຕ ປະຊາ ຊົນລາວ, ໂດຍການເປັນປະທານຮ່ວມ, ຝ່າຍລາວ ນໍາໂດຍ ພົນຈັດຕະວາ ສີພັນ ພຸດທະວົງ ຫົວໜ້າກົມທະຫານຊາຍແດນ ກົມໃຫຍ່ເສນາທິການກອງທັບປະຊາຊົນລາວ, ປະທານຄະນະອະນຸກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປລາວ-ໄທ, ຝ່າຍໄທນໍາໂດຍ ພົນໂທ ນັດຖະພົງ ເພຣົາແກ້ວ ເຈົ້າກົມກິດຈະການຊາຍແດນທະຫານ, ປະທານຄະນະອະນຸກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປໄທ-ລາວ, ມີບັນດາຄະນະອະນຸກຳມະການຂອງທັງສອງຝ່າຍ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ປຶກສາຫາລື ແລະ ທົບທວນຄືນຜົນຂອງການຮ່ວມມືໃນການຮັກສາຄວາມສະຫງົບຮຽບຮ້ອຍຕາມຊາຍແດນ ແລະ ສາຍພົວພັນຮ່ວມມືຂອງສອງປະເທດລາວ-ໄທ, ໄທ-ລາວ ຕາມບົດບັນທຶກກອງປະຊຸມຄະນະອະນຸກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປລາວ-ໄທ, ຄັ້ງທີ II ປີ 2023 (65) ຊຶ່ງໄດ້ຈັດຂຶ້ນທີ່ຈັງຫວັດປະທຸມທານີຣາຊະອານາຈັກໄທ. ໃນລະຫວ່າງວັນທີ 22-25 ສິງຫາ 2023 ຜ່ານມາ. ທັງສອງຝ່າຍມີຄວາມຍິນດີທີ່ສາຍພົວພັນ ແລະ ການຮ່ວມມືຂອງທັງສອງປະເທດໄດ້ມີຄວາມຄືບໜ້າຢ່າງເປັນຮູບປະທຳຫຼາຍຂຶ້ນ, ບົນພື້ນຖານແຫ່ງຄວາມສະເໝີພາບ ແລະ ມີຜົນປະໂຫຍດຮ່ວມກັນສາມາດແກ້ໄຂບັນຫາວຽກງານດ້ານຕ່າງໆ ແລະ ເສີມຂະຫຍາຍຄວາມໝັ້ນຄົງຕາມຊາຍແດນຂອງທັງສອງປະເທດ, ເຮັດໃຫ້ບໍລິເວນຊາຍແດນສ່ວນໃຫຍ່ມີຄວາມສະຫງົບຮຽບຮ້ອຍ, ກອງປະຊຸມສະແດງຄວາມຍິນດີທີ່ເຫັນວ່າສາຍພົວພັນມິດຕະພາບ ແລະ ການຮ່ວມມື ລະຫວ່າງ ລາວ-ໄທ ໄດ້ຮັບການພັດທະນານັບມື້ນັບດີຂື້ນຕາມລໍາດັບ, ເພີ່ມທະວີສາຍພົວພັນ ແລະ ການແລກປ່ຽນຢ້ຽມຢາມເຊິ່ງກັນ ແລະ ກັນ ລະຫວ່າງລັດຖະມົນຕີກະຊວງປ້ອງກັນປະເທດ, ບັນດາຄະນະຜູ້ແທນຂັ້ນຕ່າງໆຂອງສອງປະເທດຕາມເງື່ອນໄຂ ແລະ ຄວາມເໝາະສົມຂອງແຕ່ລະຝ່າຍ, ສືບຕໍ່ເພີ່ມທະວີສ້າງສາຍພົວພັນການຮ່ວມມືທີ່ດີຕໍ່ກັນຖານບ້ານໃກ້ເຮືອນຄຽງທີ່ດີ, ເພີ່ມການແລກປ່ຽນຂໍ້ມູນຂ່າວສານ, ດໍາເນີນມາດຕະການທີ່ຈໍາເປັນພາຍໃຕ້ກົດໝາຍຂອງແຕ່ລະປະເທດ, ພ້ອມທັງເພີ່ມທະວີການຮ່ວມມືຢ່າງຈິງຈັງໃນການຈັດລະບຽບຊາຍແດນເພື່ອປ້ອງກັນ, ສະກັດກັ້ນການລັກລອບເຂົ້າເມືອງ, ແຮງງານຜິດກົດໝາຍ ແລະ ການຕໍ່ຕ້ານການຄ້າມະນຸດ, ການຄ້າຢາເສບຕິດ ແລະ ກຸ່ມຄົນທີ່ບໍ່ຫວັງດີຕໍ່ສາຍພົວພັນ ລາວ-ໄທ ແລະ ການລັກລອບຄ້າຂາຍສິ່ງທີ່ຜິດກົດໝາຍອື່ນໆ, ການປ້ອງກັນຕະຝັ່ງເຈື່ອນ, ການຈັດວາງກຳລັງຕໍ່ຄວາມໝັ້ນຄົງຊາຍແດນລາວ-ໄທ. ສອງຝ່າຍເອກະພາບຮ່ວມມືກັບອຳນາດການປົກຄອງທ້ອງຖິ່ນ ແລະ ເຈົ້າໜ້າທີ່ທີ່ກ່ຽວຂ້ອງເຮັດໜ້າທີ່ສຶກສາອົບຮົມປະຊາຊົນຕາມຊາຍແດນຂອງສອງປະເທດໃຫ້ຮັບຮູ້ເຂົ້າໃຈກ່ຽວກັບລະບຽບກົດໝາຍ ແລະ ຂໍ້ກໍານົດຕ່າງໆຂອງສອງປະເທດ, ສົ່ງເສີມການຮ່ວມມືດ້ານການແພດທະຫານລະຫວ່າງກອງທັບປະຊາຊົນລາວ ກັບ ກອງທັບໄທ ໂດຍຝ່າຍໄທຍິນດີເຊີນໜ່ວຍງານດ້ານການແພດທະຫານກອງທັບປະຊາຊົນລາວ ໄປເຝິກອົບຮົມ ແລະ ທັດສະນະສຶກສາ ຢູ່ຣາຊະອານາຈັກໄທ ແລະ ແລກປ່ຽນດ້ານວັດທະນະທຳ ແລະ ກິລາ ລະຫວ່າງສອງກອງທັບລາວ-ໄທ ໃຫ້ເປັນຮູບປະທຳຢ່າງຕໍ່ເນື່ອງ.
ກອງປະຊຸມໄດ້ສໍາເລັດ ແລະ ອັດລົງດ້ວຍໝາກຜົນອັນຈົບງາມ ປະທານຮ່ວມທັງສອງຝ່າຍໄດ້ລົງນາມໃນບົດບັນທຶກກອງປະຊຸມຄະນະອະນຸກໍາມະການຮ່ວມມືຮັກສາຄວາມສະຫງົບຮຽບຮ້ອຍຕາມຊາຍແດນທົ່ວໄປລາວ-ໄທ, ໄທ-ລາວ ຄັ້ງທີ I ປີ 2024 ( 66 ) ເພື່ອຮັບຮອງເອົາຜົນຂອງກອງປະຊຸມໃນຄັ້ງນີ້ໄປຈັດຕັ້ງປະຕິບັດໃຫ້ເປັນຮູບປະທໍາຕົວຈິງ ແລະ ເພື່ອແນໃສ່ເຮັດໃຫ້ຊາຍແດນຂອງສອງປະເທດລາວ-ໄທ, ໄທ-ລາວ ກາຍເປັນຊາຍແດນແຫ່ງສັນຕິພາບ, ມິດຕະພາບ, ການພັດທະນາ ແລະ ການຮ່ວມມືກັນຢ່າງແທ້ຈິງ.
ໂດຍ: ອານຸສອນ ສິມວົງສາ.
