ໃນຕອນບ່າຍຂອງວັນທີ 23 ກໍລະກົດ 2024 ທີ່ຫ້ອງປະຊຸມຂອງຫ້ອງການອຸດສາຫະກໍາ ແລະ ການຄ້າເມືອງນາກາຍ ໄດ້ຈັດກອງປະຊຸມປຶກສາຫາລື ປັບປຸງກຸ່ມຜະລິດຕະພັນປາຄືນໃໝ່ ແລະ ຄັດເລືອກຜະລິດຕະພັນຂອງກຸ່ມປຸງແຕ່ງປາ ເພື່ອຂໍກາໝາຍໂອດ໋ອບ ໂດຍພາຍໃຕ້ການເປັນປະທານ ຂອງທ່ານ ແສງແກ້ວ ພະຄຸນທອງ ຮອງເຈົ້າເມືອງໆນາກາຍ ແລະ ມີຮອງຫົວໜ້າຫ້ອງການອຸດສາຫະກຳ ແລະ ການຄ້າເມືອງ, ຄະນະກໍາມະການຕະຫລອດຮອດກຸ່ມຜະລິດຕະພັນປາເຂົ້າຮ່ວມ 23 ທ່ານ,ຍິງ 13 ທ່ານ, ໃນກອງປະຊຸມ ທ່ານ ແກ້ວອຸດອນ ແກ້ວວິສິດ ໄດ້ຜ່ານຮ່າງຂໍ້ຕົກລົງ ເພື່ອປັບປຸງຂໍ້ຕົກລົງການແຕ່ງຕັ້ງກຸ່ມຜະລິດຕະພັນປາຄືນ ເພື່ອໃຫ້ມີຄວາມເໝາະສົມ, ນອກຈາກນັ້ນກໍ່ໄດ້ຜ່ານຂໍ້ຕົກລົງ ສະບັບເລກທີ 1225/ອຄ.ກສຄ, ລົງວັນທີ 1/8/2017 ວ່າດ້ວຍສິນຄ້າໜຶ່ງເມືອງໜຶ່ງຜະລິດຕະພັນແຫ່ງຊາດ. ຫຼັງຈາກນັ້ນກອງປະຊຸມກໍ່ໄດ້ມີການປຶກສາຫາລື ຄັດເລືອກເອົາຜະລິດຕະພັນປາແຫ້ງເພື່ອສະເໜີຂໍກາໝາຍໂອດ໋ອບ ຈາກກະຊວງອຸດສາຫະກຳ ແລະ ການຄ້າ.
ຕອນທ້າຍທ່ານປະທານ ໄດ້ມີຄຳເຫັນໂອ້ລົມຕໍ່ກອງປະຊຸມເຊິ່ງທ່ານກໍ່ໄດ້ຍ້ອງຍໍຊົມເຊີຍ ຕໍ່ກຸ່ມປຸງແຕ່ງຜະລິດຕະພັນປາ ແລະ ທ່ານໄດ້ຊີ້ນຳບາງບັນຫາດັ່ງນີ້: ຕ້ອງໄດ້ຕິດປ້າຍຊີ້ບອກທາງເຂົ້າສະຖານທີ່ກຸ່ມຜະລິດຕະພັນປາ, ສະມາຊິກພາຍໃນກຸ່ມຕ້ອງໄດ້ຮັກສາຄວາມສາມັກຄີຊ່ວຍເຫຼືອເຊິ່ງກັນ ແລະ ກັນ, ມອບໃຫ້ຫ້ອງການອຸດສາຫະກຳ ແລະ ການຄ້າ ແລະ ຫ້ອງການສາທາລະນະສຸກເມືອງ ສົມທົບກັນເພື່ອປະກອບເອກະສານຢັ້ງຢືນ ກຸ່ມຜະລິດຕະພັນປາກິນໄດ້, ຖືກຫລັກອານະໄມ, ໂຄສະນາອອກສື່ສັງຄົມອອນລາຍເປັນຕົ້ນເຟດບຸກ, ຢູທູບ ແລະ ທາງສະຖານີວິທະຍຸ.
ພາບ-ຂ່າວ ຄຳໄໝ ວົງສາຄອນ
