ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

   ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຕົວຈິງ

ກອງປະຊຸມຄັ້ງປະຖົມມະລຶກ ຂອງສະພາປະຊາຊົນແຂວງຫຼວງພະບາງ ຊຸດທີ II ໄດ້ເລືອກເອົາປະທານສະພາປະຊາຊົນແຂວງຊຸດໃໝ່

ກອງປະຊຸມຄັ້ງປະຖົມມະລຶກຂອງສະພາປະຊາຊົນແຂວງຫຼວງພະບາງ ຊຸດທີ II ໄຂຂຶ້ນ ໃນວັນທີ 7 ເມສາ 2021 ນີ້, ທີ່ຫ້ອງປະຊຸມໃຫຍ່ຫ້ອງວ່າການແຂວງ, ວາລະກອງປະຊຸມ ຜູ້ແທນເຂົ້າຮ່ວມ ໄດ້ຮັບຟັງການລາຍງານຜົນສຳເລັດ ຂອງການເລືອກຕັ້ງ ສະມາຊິກສະພາແຫ່ງຊາດຊຸດທີີ່ IX ແລະສະພາປະຊາຊົນແຂວງ ຊຸດທີ່ II ພ້ອມທັງ ຢັ້ງຢືນຄຸນລັກສະນະ ຂອງສະມາຊິກສະພາປະຊາຊົນແຂວງຫຼວງພະບາງຊຸດທີ່ II, ຈາກນັ້ນ ໄດ້ລົງຄະແນນສຽງເຫັນດີເປັນສ່ວນໃຫຍ່ ຮັບຮອງເອົາ ທ່ານ ວົງສະຫວັນ ເທບພະຈັນ ຮອງເລຂາ ຄະນະບໍລິຫານງານພັກແຂວງ ເປັນປະທານສະພາປະຊາຊົນແຂວງ ຊຸດທີ II ຕາມການສະເໜີຂອງຄະນະປະຈຳສະພາປະຊາຊົນແຂວງ ຊຸດທີ່ I ແລະລົງຄະແນນສຽງຮັບຮອງເອົາ ກຳມະການ ຄະນະປະຈຳສະພາປະຊາຊົນແຂວງ ຊຸດທີ່ II ຕາມການສະເໜີຂອງ ປະທານສະພາປະຊາຊົນແຂວງ ຊຸດທີ່ II ຈຳນວນ 7 ທ່ານ ຍີ່ງ 1 ທ່ານ ໃນນັ້ນ ໄດ້ຮັບຮອງເອົາ ທ່ານ ສີງຕັນ ໄຊລືຊົງ ກຳມະການປະຈຳພັກແຂວງ ແລະທ່ານ ສົມພອນ ສີອຸດົມພັນ ກຳມະການພັກແຂວງ ເປັນຮອງປະທານສະພາປະຊາຊົນແຂວງ.
ໂອກາດຂຶ້ນກ່າວຮັບໜ້າທີ່ ທ່ານ ວົງສະຫວັນ ເທບພະຈັນ ໃຫ້ຄໍາໝັ້ນສັນຍາວ່າ: ຈະຊື່ສັດບໍລິສຸດຕໍ່ຜົນປະໂຫຍດຂອງຊາດ ແລະປະຊາຊົນ, ຈະສຸມສະຕິປັນຍາ, ເຫື່ອແຮງ, ຄວາມຮູ້, ຄວາມສາມາດທີ່ມີຮ່ວມກັບໝູ່ຄະນະ ກໍຄື ສະມາຊິກສະພາປະຊາຊົນແຂວງ ຈັດຕັ້ງຜັນຂະຫຍາຍແນວທາງນະໂຍບາຍຂອງພັກ ໂດຍສະເພາະ ມະຕິກອງປະຊຸມສະພາແຫ່ງຊາດ, ມະຕິກອງປະຊຸມໃຫຍ່ຄັ້ງທີ່ VIII ຂອງອົງຄະນະພັກແຂວງ ເຂົ້າໃນການປະຕິບັດສິດ ແລະໜ້າທີ່ຂອງສະພາປະຊາຊົນແຂວງ ຊຸດທີ II ຕາມທີ່ກໍານົດໄວ້ໃນລັດຖະທໍາມະນູນ ແລະກົດໝາຍໃຫ້ມີໝາກຜົນຕົວຈິງ, ພ້ອມນີ້ ທ່ານໄດ້ຮຽກຮ້ອງໃຫ້ສະມາຊິກສະພາສະພາປະຊາຊົນແຂວງ, ບັນດາອົງການຈັດຕັ້ງພັກ-ລັດທຸກຂັ້ນ ກໍຄື ປະຊາຊົນລາວບັນດາເຜົ່າ ໃນທົ່ວແຂວງຫຼວງພະບາງ ຈົ່ງໃຫ້ການຮ່ວມມື, ໃຫ້ການສະໜັບສະໜູນ ແລະຊ່ວຍເຫລືອສະພາສະພາປະຊາຊົນແຂວງ ເພື່ອເຮັດຫລ້ອນໜ້າທີ່ ອັນມີກຽດສະຫງ່າທີ່ພັກ ແລະປະຊາຊົນມອບໝາຍໃຫ້.
ຈາກນັ້ນ ກອງປະຊຸມໄດ້ສືບຕໍ່ ພິຈາລະນາ ແລະຮັບຮອງເອົາການແຕ່ງຕັ້ງ ທ່ານ ມອນໄຊ ລາວມົວຊົງ ກຳມະການສຳຮອງສູນກາງພັກ ກຳມະການປະຈຳພັກແຂວງ ຫົວໜ້າຄະນະໂຄສະນາອົບຮົມແຂວງ ເປັນຮອງເຈົ້າແຂວງຫຼວງພະບາງ, ພ້ອມນີ້ ຜູ້ເຂົ້າຮ່ວມໄດ້ຮັບຟັງການລາຍງານໂດຍຫຍໍ້ ຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານ 5 ປີ (2016-2020), ແຜນການ 5 ປີ (2021-2025), ຮັບຟັງການລາຍງານການຈັດຕັ້ງປະຕິບັດວຽກງານ 5 ປີ (2016-2020) ແລະທິດທາງ ແຜນການ 5 ປີ (2021-2025) ຂອງອົງການໄອຍາການປະຊາຊົນແຂວງ ແລະສານປະຊາຊົນແຂວງ, ຮັບຟັງການລາຍງານການຈັດຕັ້ງປະຕິບັດວຽກງານ 5 ປີ (2016-2020) ແລະທິດທາງ ແຜນການ 5 ປີ (2021-2025) ຂອງຄະນະປະຈຳສະພາປະຊາຊົນແຂວງ ຊຸດທີ່ II, ໃນວາລະການດຳເນີນກອງປະຊຸມ ນັບແຕ່ ວັນທີ່ 7-9 ເມສາ 2021 ນີ້ ຄະນະຮັບຜິດຊອບກອງປະຊຸມ ໄດ້ເປີດໂອກາດ ໃຫ້ປະຊາຊົນລາວບັນດາເຜົ່າ ໃນທົ່ວແຂວງຫຼວງພະບາງ ໄດ້ໃຊ້ສິດປະຊາທິປະໄຕຂອງຕົນ ເພື່ອສະເໜີຄຳຄິດເຫັນ ອັນເປັນປະໂຫຍດ ຕໍ່ກອງປະຊຸມຜ່ານໂທລະສັບສາຍດ່ວຍ ໝາຍເລກ 071 156 ໂດຍບໍ່ໄດ້ເສຍຄ່າ. ຈື່ງຂໍຮຽກຮ້ອງໃຫ້ພະນັກງານ, ທະຫານ-ຕໍ່ໍ່າຫຼວດ ແລະປະຊາຊົນບັນດາເຜົ່າ ໃນທົ່ວແຂວງ ຈົ່ງພ້ອມກັນຕິດຕາມ ແລະໃຫ້ການສະໜັບສະໜູນ ວຽກງານຮອບດ້ານ ເພື່ອເຮັດໃຫ້ ການດຳເນີນກອງປະຊຸມ ຄັ້ງປະຖົມມະລືກ ຂອງສະພາປະຊາຊົນແຂວງຫຼວງພະບາງ ຊຸດທີ່ II ໃນເທື່ອນີ້ ໄດ້ຮັບຜົນສຳເລັດຕາມຈຸດປະສົງ ແລະຄາດໝາຍທີ່ວາງໄວ້ ທຸກປະການ.
ຂ່າວ: ອາພຸດເດດ ບຸບຜາ, ພາບ: ເພັດສາຄອນ ສີມມະວົງ