ກອງປະຊຸມຄັ້ງປະຖົມມະລຶກຂອງສະພາແຫ່ງຊາດຊຸດທີ 9 ໃນຕອນເຊົ້າວັນທີ 26 ມີນາ 2021 ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ, ປະທານສະພາແຫ່ງຊາດ ສະມາຊິກສະພາແຫ່ງຊາດໄດ້ສືບຕໍ່ພິຈາລະນາ ແລະ ປະກອບຄຳເຫັນຕໍ່ບົດລາຍງານກ່ຽວກັບການທິດທາງແຜນການເຄື່ອນໄຫວວຽກງານ 5 ປີ 2021 ຫາ 2025 ຂອງສະພາແຫ່ງຊາດຊຸດທີ 9 ແລະ ບົດລາຍງານກ່ຽວກັບແຜນການສ້າງ ແລະ ປັບປຸງກົດໝາຍ 5 ປີ 2021 ຫາ 2025 ດ້ວຍບັນຍາກາດຟົດຟື້ນ ແລະ ກົງໄປກົງມາ ແນໃສ່ເຮັດໃຫ້ວຽກງານຂອງສະພາແຫ່ງຊາດກໍ່ຄືແຜນການສ້າງ ແລະປັບປຸງກົດໝາຍສາມາດຮັບປະກັນໄດ້ທັງດ້ານປະລິມານ ແລະ ຄຸນນະພາບ.
ທ່ານ ນາງ ອໍາໄພວອນ ລ້ອມບຸນແພງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 8 ແຂວງຫົວພັນ ໄດ້ເນັ້ນໜັກຕໍ່ວຽກງານການສ້າງ ແລະປັບປຸງກົດໝາຍໃນຕໍ່ໜ້າຄວນກະກຽມຢ່າງລະອຽດ ໂດຍສະເພາກົນໄກປະສານງານລະຫວ່າງກຳມາທິການກົດໝາຍຂອງສະພາແຫ່ງຊາດ ແລະພາກສ່ວນກ່ຽວຂ້ອງ ລວມເຖິງຂັ້ນຕອນການທາມຮ່າງກົດໝາຍກ່ອນຈະນໍາມາຜ່ານໃນກອງປະຊຸມສະໄໝສາມັນຂອງສະພາແຫ່ງຊາດແຕ່ລະຄັ້ງ ໃຫ້ລົງເລິກລະອຽດ ແລະຈະແຈ້ງຕື່ມ ເພື່ອຮັບປະກັນໃຫ້ບັນດາກົດໝາຍທີ່ຜ່ານການຮັບຮອງສາມາດນໍາໃຊ້ໄດ້ຢ່າງຍາວນານ.
ທ່ານ ໄຊນະຄອນ ອິນທະວົງ, ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 12 ແຂວງຄຳມ່ວນປະກອບຄຳເຫັນຕໍ່ການປັບປຸງແບບແຜນວິທີເຮັດວຽກຂອງສະພາແຫ່ງຊາດໃນຕໍ່ໜ້າ ຄວນຫັນເປັນທັນສະໄໝໃຫ້ຫລາຍຂື້ນ ເພື່ອໃຫ້ສອດຄ່ອງກັບສະພາບການຕົວຈິງໃນຍຸກເຕັກໂນໂລຊີປະຈຸບັນ ຊື່ງເຫັນວ່າຈະຊ່ວຍຫລຸດ ຜ່ອນງົບປະມານຕ່າງໆໃຫ້ໜ້ອຍລົງ.
ພາຍຫລັງສະມາຊິກສະພາແຫ່ງຊາດຊຸດທີ 9 ສຳເລັດການປະກອບຄຳເຫັນຕໍ່ບົດລາຍງານກ່ຽວກັບການທິດທາງແຜນການເຄື່ອນໄຫວວຽກງານ 5 ປີ 2021 ຫາ 2025 ຂອງສະພາແຫ່ງຊາດຊຸດທີ 9 ແລະບົດລາຍງານກ່ຽວກັບແຜນການສ້າງ ແລະປັບປຸງກົດໝາຍ 5 ປີ 2021 ຫາ 2025 ແລ້ວ ທ່ານ ສຸບັນ ສະວະບຸດ ປະທານກຳມາທິການວຽກງານເຂດເລືອກຕັ້ງ ຕາງໜ້າໃຫ້ຄະນະປະຈໍາສະພາແຫ່ງຊາດ ຊີ້ແຈງ ແລະໃຫ້ຄວາມກະຈ່າງແຈ້ງຕໍ່ຄຳຄິດເຫັນຂອງສະມາຊິກສະພາແຫ່ງຊາດ ໂດຍຊີ້ໃຫ້ເຫັນຫລາຍບັນຫາສຳຄັນ ເປັນຕົ້ນກົງຈັກການຈັດ ຕັ້ງຂອງສະພາແຫ່ງຊາດ, ວຽກງານການຕິດຕາມກວດກາ ລວມເຖິງການປະເມີນບຸກຄະລາກອນທີ່ສະພາແຫ່ງຊາດເລືອກຕັ້ງ ແລະແຕ່ງຕັ້ງ.
ຈາກນັ້ນກອງເລຂານຸການກອງປະຊຸມໄດ້ຜ່ານຮ່າງມະຕິວ່າດ້ວຍການຮັບຮອງເອົາບົດລາຍງານກ່ຽວກັບການທິດທາງແຜນການເຄື່ອນໄຫວວຽກງານ 5 ປີ 2021 ຫາ 2025 ຂອງສະພາແຫ່ງຊາດຊຸດທີ 9 ແລະ ບົດລາຍງານກ່ຽວກັບແຜນການສ້າງ ແລະ ປັບປຸງກົດໝາຍ 5 ປີ 2021 ຫາ 2025 ແລ້ວປະທານກອງປະຊຸມໄດ້ສະເໜີໃຫ້ສະມາຊິກສະພາແຫ່ງຊາດລົງຄະແນນສຽງຮັບຮອງເອົາຢ່າງເປັນທາງການ.
May be an image of 11 people, people standing, people sitting and indoor
Loading...