ໃນວັນທີ 30 ພຶດສະພາ 2023 ກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຂວງອັດຕະປື ສະໄໝທີ XI ໄດ້ດໍາເນີນເປັນມື້ທີສອງ ເຊິ່ງເປັນວາລະເປີດກວ້າງ, ທີ່ສະໂມສອນໃຫຍ່ຂອງແຂວງ, ໂດຍການໃຫ້ກຽດເຂົ້າຮ່ວມເປັນປະທານ ຂອງສະຫາຍ ສອນໄຊ ສີພັນດອນ, ກຳມະການກົມການເມືອງສູນກາງພັກ, ນາຍົກລັດຖະມົນຕີ; ມີສະຫາຍ ເລັດ ໄຊຍະພອນ, ກຳມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆອັດຕະປື; ຜູ້ຕາງໜ້າຄະນະຈັດຕັ້ງສູນກາງພັກ ແລະ ຄະນະກວດກາສູນກາງພັກ; ບັນດາສະຫາຍ ຄະນະບໍລິຫານງານພັກແຂວງ, ຫົວໜ້າ-ຮອງຫົວໜ້າກອງບັນ ຊາການ ປກຊ ແລະ ປກສ ແຂວງ, ສະມາຊິກສະພາແຫ່ງຊາດ ແລະ ສະມາຊິກປະຊາຊົນແຂວງ ທີ່ປະຈຳຢູ່ແຂວງ, ສະມາຊິກພັກສົມບູນ ທີ່ມີຕຳແໜ່ງບໍລິຫານຮອງຫົວໜ້າພະແນກ-ທຽບເທົ່າ, ຄະນະບໍລິຫານງານພັກ ບັນດາເມືອງ, ຄະນະພັກຮາກຖານ-ຄະນະໜ່ວຍພັກຮາກຖານ ທີ່ຂຶ້ນກັບອົງຄະນະພັກແຂວງ ເຂົ້າຮ່ວມ.
ໃນໂອກາດນີ້, ສະຫາຍ ສອນໄຊ ສີພັນດອນ ໄດ້ມີຄຳເຫັນເຈາະຈີ້ມ ແລະ ຊີ້ນຳ ຕໍ່ການດຳເນີນກອງປະຊຸມ ເພື່ອໃຫ້ຜູ້ເຂົ້າຮ່ວມ ໄດ້ຄົ້ນຄວ້າ ແລະ ປະກອບຄຳຄິດເຫັນ ຕໍ່ເນື້ອໃນຂອງກອງປະຊຸມ ໃນວາລະເປີດກວ້າງຄົບຄະນະ ໃນແຕ່ລະຫົວຂໍ້ ເປັນຕົ້ນ ບົດສະຫຼຸບຕີລາຄາການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງອົງຄະນະພັກແຂວງອັດຕະປື ກາງສະໄໝ, ຕິດພັນກັບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ແລະ ສອງວາລະແຫ່ງຊາດ, ລວມທັງ ການກຳນົດທິດທາງນຳພາ ແລະ ຄາດໝາຍສູ້ຊົນ ໃນເຄິ່ງສະໄໝຕໍ່ໜ້າ. ຕິດພັນກັບຄຳເຫັນເຈາະຈີ້ມ, ສະຫາຍ ຍັງໄດ້ຍົກໃຫ້ເຫັນຜົນສຳເລັດອັນພົ້ນເດັ່ນ ທີ່ອົງຄະນະພັກແຂວງອັດຕະປື ສາມາດຍາດມາໄດ້ ໃນ 02 ປີກວ່າ ທີ່ຜ່ານມາ, ພ້ອມທັງ ເນັ້ນໜັກຕື່ມບາງດ້ານ ທີ່ຈະຕ້ອງໄດ້ພ້ອມກັນສືບຕໍ່ປັບປຸງແກ້ໄຂໃນຕໍ່ໜ້າ ໃຫ້ມີການຫັນປ່ຽນດີຂຶ້ນ. ນອກຈາກນັ້ນ ຍັງໄດ້ຍົກໃຫ້ເຫັນຄວາມໝາຍຄວາມສຳຄັນ, ຈຸດປະສົງ ແລະ ຄາດໝາຍ ຂອງການດຳເນີນກອງປະຊຸມ ໃນວາລະເປີດກວ້າງຄັ້ງນີ້ ໂດຍສະເພາະ ເພື່ອສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອບົດຮຽນອັນດີງາມ ຂອງອົງຄະນະພັກແຂວງ ໃນ 02 ປີກວ່າຜ່ານມາ, ພ້ອມກັນ ປັບປຸງ, ແກ້ໄຂຈຸດອ່ອນ, ຂໍ້ບົກພ່ອງ ແລະ ສິ່ງທ້າທາຍທີ່ເປັນອຸປະສັກ ຕໍ່ການຈັດຕັ້ງປະຕິບັດມະຕິກອງປະຊຸມໃຫຍ່ຂັ້ນຕົນ ກໍຄືການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ຕິດພັນກັບການຈັດຕັ້ງປະຕິບັດມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ກາງສະໄໝ, ແຜນພັດທະນາເສດຖະກິດ – ສັງຄົມແຫ່ງຊາດ 5 ປີ ຄັ້ງທີ IX ແລະ ສອງວາລະແຫ່ງຊາດ ເພື່ອສ້າງຄວາມເປັນເອກະພາບ, ການຕັດສິນໃຈ ແລະ ຄວາມຮັບຜິດຊອບການເມືອງຂອງຄະນະພັກແຕ່ລະຂັ້ນ ແກ້ໄຂບັນຫາຕົວຈິງທີ່ພວມເລັ່ງທວງ ຕາມຈິດໃຈສ້າງການຫັນປ່ຽນຢ່າງແຂງແຮງ, ເລິກເຊິ່ງ ແລະ ຮອບດ້ານ, ເຮັດໃຫ້ບັນດາຄາດໝາຍສູ້ຊົນຕ່າງໆ ທີ່ວາງອອກບັນລຸຜົນສຳເລັດ ຢ່າງເປັນຮູບປະທໍາ ຕາມຄໍາຂວັນແຂວງວາງອອກ ຄື: “ຍົກສູງບົດບາດການນໍາພາຂອງພັກທີ່ເຂັ້ມແຂງຮອບດ້ານ, ເພີ່ມທະວີຄວາມສາມັກຄີເປັນປຶກແຜ່ນແໜ້ນໝາ, ສູ້ຊົນປົກປັກຮັກສາ ແລະ ພັດທະນາແຂວງອັດຕະປື ກ້າວຂຶ້ນຢ່າງໜັກແໜ້ນ, ປະຊາຊົນ ຢູ່ດີກິນດີ ຕາມທິດສ້າງສັງຄົມນິຍົມມາແຕ່ຮາກຖານ”.
ພາບ ແລະ ຂ່າວ: ກົມປະຊາສຳພັນ ຫສນຍ
