ຕອນເຊົ້າ ວັນທີ 1 ກັນຍາ 2022 ນິ້ ຢູ່ທີ່ໂຮງແຮມຈໍາປາສັກແກຣນ ນະຄອນປາກເຊ ແຂວງຈໍາປາສັກ ມີກອງປະຊຸມຊຸກຍູ້ການຮ່ວມມືລົງທຶນດ້ານການຄ້າ, ການທ່ອງທ່ຽວ, ກະສີກໍາລະຫວ່າງບັນດາທ້ອງຖິ່ນຂອງ ສສ ຫວຽດ ນາມ ກັບ 4 ແຂວງພາກໃຕ້ ສ ປປ ລາວ ໃຫ້ກຽດເຂົ້າຮ່ວມ ມີທ່ານ ຫງຽນວັນຈຸງ ກົງສູນໃຫຍ່ ສສ ຫວຽດນາມ ປະຈໍາພາກໃຕ້ທີ່ປາກເຊ, ທ່ານ ວີໄລວົງ ບູດດາຄໍາ ເຈົ້າແຂວງໆຈໍາປາສັກ ມີບັນດາເຈົ້າແຂວງ, ຮອງເຈົ້າແຂວງ, ພະແນກການ ແລະ ພາກສ່ວນກ່ຽວຂ້ອງ ຂອງ 4 ແຂວງພາກໃຕ້ຂອງ ສປປ ລາວ ຄື: ແຂວງຈໍາປາສັກ, ສາລະວັນ, ເຊກອງ, ແລະແຂວງອັດຕະປຶ ພ້ອມດ້ວຍຜູ້ແທນ ແຂວງກວາງນາມ, ກວາງຈີ, ກວາງບີງ, ບີ່ງເຢືອງ, ກອນຕູມ, ເລີ່ມດົງ ຂອງ ສສ ຫວຽດນາມ .
ທ່ານ ຫງຽນວັນຈຸງ ກົງສູນໃຫຍ່ ສສ ຫວຽດນາມປະຈໍາພາກໃຕ້ທີ່ປາກເຊ ກ່າວວ່າ: ຈຸດປະສົງຂອງກອງປະຊຸູມຄັ້ງນີ້ ເພື່ອສືບຕໍ່ເພີ່ມທະວີສາຍພົວພັນມິດຕະພາບ, ຄວາມສາມັກຄີ ພີເສດ ແລະ ຮ່ວມມືຮອບດ້ານລະຫວ່າງບັນດາທ້ອງຖິ່ນຂອງ ສສ ຫວຽດນາມ ກັບ 4 ແຂວງພາກໃຕ້ຂອງ ສປປ ລາວ, ເປັນການສະເຫຼີມສະຫລອງປີສາມັກມິດຕະພາບ ກັບ ສປປ ລາວ, ເປັນການຮ່ວມມືໃນການພັດທະນາເສດຖະກິດ-ສັງຄົມໃຫ້ໜັກແໜ້ນເຊ່ັນ: ດ້ານການຄ້າ, ການທ່ອງທ່ຽວ, ກະສີກໍາ ແລະ ພັດທະນາຊົນລະບົດເພື່ອກ້າວໄປສູ່ລ່ວງເລີກ ແລະ ນໍາຜົນປະໂຫຍດຕົວຈິງມາສູ່ປະຊາຊົນທັງ ສອງຊາດ.
ທ່ານວິໄລວົງ ບູດດາຄໍາ ເຈົ້າແຂວງໆຈໍາປາສັກ ກ່າວວ່າ: ໃນນາມອໍານາດການປົກຄອງແຂວງ ແລະ ປະຊາຊົນບັນດາເຜົ່າແຂວງຈໍາປາສັກ,ມີຄວາມດີໃຈ ແລະເປັນກຽດຢ່າງສູງ ທີ່ໄດ້ຮ່ວມກັບສະຖານກົງສູນໃຫຍ່ ແຫ່ງ ສ.ສ ຫວຽວນາມ ປະຈໍາ 4 ແຂວງພາກໃຕ້ ຂອງ ສປປ ລາວ ທີ່ນະຄອນປາກເຊ ໄດ້ເປັນເຈົ້າພາບຮ່ວມຈັດກອງປະຊຸມຊຸກຍູ້ການຮ່ວມມືໃນຂົງເຂດການລົງທຶນ, ການຄ້າ, ການທ່ອງທ່ຽວ ແລະກະສິກໍາ ລະຫວ່າງ 4 ແຂວງພາກໃຕ້ ຂອງ ສປປ ລາວ ກັບ ບັນດາແຂວງ ຂອງ ສ.ສ ຫວຽດນາມ ໃນຄັ້ງນີ້. ເພື່ອເປັນການເພີ່ມພູນຄູນສ້າງສາຍພົວພັນມິດຕະພາບທີ່ຍິ່ງໃຫຍ່ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງ ສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ໃຫ້ໄດ້ຮັບການພັດທະນາເຂົ້າສູ່ລວງເລີກ. ຕະຫຼອດໄລຍະ 5 ປີ (2016-2020) ທີ່ຜ່ານມາແຂວງຈຳປາສັກ ໄດ້ເຊັນບົດບັນທຶກການຮ່ວມມື ກັບ 16 ແຂວງ, 03 ນະຄອນ ພາກກາງ-ພາກໃຕ້, ສ.ສ ຫວຽດນາມ ເຊີ່ງຕະຫຼອດໄລຍະ 5 ປີ ດັ່ງກ່າວ ໄດ້ມີການພົບປະຢ້ຽມຢາມ ແລະ ແລກປ່ຽນຄະນະຜູ້ແທນຂັ້ນສູງ, ຄະນະວິຊາການ ຮ່ວມກັນເປັນປົກກະຕິ ແລະ ຕໍ່ເນື່ອງ ລວມທັງໝົດ 158 ຄະນະ. ໃນນັ້ນຄະນະຜູ້ແທນແຂວງຈຳປາສັກ ເດີນທາງໄປເຄື່ອນໄຫວຢຽມຢາມ ບັນດາແຂວງ/ນະຄອນ ຂອງ ສ.ສ ຫວຽດນາມ ຈຳນວນ 81 ຄະນະ. ຄະນະຜູ້ແທນຂອງບັນດາແຂວງຈາກ ສ.ສ ຫວຽດນາມ ເດີນທາງມາຢຽມຢາມແຂວງຈຳປາສັກຈຳນວນ 77 ຄະນະ.
ດ້ານການລົງທຶນ: ມາຮອດປະຈຸບັນ, ການລົງທຶນພາຍໃນ ແລະຕ່າງປະເທດຢູ່ແຂວງຈໍາປາສັກ ມີທັງໝົດ 612 ໂຄງການ, ມູນຄ່າທັງໝົດ 44 ຕື້ກີບ. ໃນນັ້ນ: ການລົງທຶນພາຍໃນຈຳນວນ 303 ໂຄງການ, ມູນຄ່າ 16.041 ຕື້ກີບ, ລົງທຶນຕ່າງປະເທດ ຈຳນວນ 309 ໂຄງການ, ມູນຄ່າ 28.682 ຕື້ກີບ. ການລົງທຶນດັ່ງກ່າວໄດ້ລົງທຶນເຂົ້າໃນຂົງເຂດກະສິກຳ-ປ່າໄມ້ ກວມ 17%, ຂົງເຂດອຸດສາຫະກຳ ກວມ 36% ແລະ ຂົງເຂດການຄ້າ ແລະ ບໍລິການ ກວມ 47%.
ໂດຍ: ເກດສະໜາ
Loading...