ກອງປະຊຸມດໍາເນີນການລົບລ້າງກຸ່ມສໍ້ໂກງທາງໂທລະຄົມ ຫລື call center ຂ້າມຊາດຢູ່ພາຍໃນເຂດເສດຖະກິດພິເສດສາມຫລ່ຽມຄໍາ ຄັ້ງທີ 9 ຈັດຂຶ້ນໃນຕອນບ່າຍວັນທີ 9.8.2024 ຢູ່ເຂດເສດຖະກິດພິເສດສາມຫລ່ຽມຄໍາ ເມືອງຕົ້ນເຜິ້ງ ເເຂວງບໍ່ເເກ້ວ ພາຍໃຕ້ການເປັນປະທານຮ່ວມຂອງ ທ່ານ ທອງຈັນ ມະນີໄຊ ເຈົ້າເເຂວງໆບໍ່ເເກ້ວ, ທ່ານ ຈ້າວເຫວີຍ ປະທານສະພາບໍລິຫານເຂດເສດຖະກີດພິເສດສາມຫລ່ຽມຄໍາ, ມີການນໍາຂອງເເຂວງ,ເມືອງ,ຜູ້ຕາງຫນ້າຈາກຫ້ອງວ່າການສໍານັກງານນາຍົກລັດຖະມົນຕີ, ຜູ້ຕາງຫນ້າກະຊວງປ້ອງກັນປະເທດ-ກະຊວງປ້ອງກັນຄວາມສະຫງົບ,ຄະນະບໍລິຫານງານເຂດເສດຖະກິດພິເສດສາມຫລ່ຽມຄໍາ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.
ທ່ານ ທອງຈັນ ມະນີໄຊ ເຈົ້າເເຂວງໆບໍ່ແກ້ວ ມີຄໍາເຫັນວ່າ: ການລົບລ້າງກຸ່ມເເກ້ງສໍ້ໂກງທາງໂທລະຄົມ ຫລື call center ຂ້າມຊາດຢູ່ພາຍໃນເຂດເສດຖະກິດພິເສດສາມຫລ່ຽມຄໍາ ໄດ້ກາຍເປັນອີກວຽກງານຫນື່ງທີ່ສອງລັດຖະບານລາວ-ຈີນ ກໍ່ຄືຄະນະຮັບຜິດຊອບເຂດເສດຖະກິດພິເສດສາມຫລ່ຽມຄໍາ ໄດ້ດໍາເນີນການເເກ້ໄຂປາບປາມຢ່າງເເຂງເເຮງ ເເລະ ສາມາດຮື້ຖອນ ບາງຫົວຫນ່ວຍທຸລະກິດທີ່ເຄື່ອນໄຫວບໍ່ຖືກຕ້ອງຕາມກົດຫມາຍໄດ້ 240 ຫົວຫນ່ວຍ ໃນຈໍານວນຫລາຍກວ່າ 400 ຫົວຫນ່ວຍ, ສາມາດກັກຕົວຜູ້ຖືກຫາໄດ້ຫລາຍສົມຄວນ, ປັດຈຸບັນມີພຽງ 15 ບໍລິສັດໃນຈໍານວນ 37 ໄດ້ຮັບການອະນຸຍາດຂຶ້ນທະບຽນດໍາເນີນກິດຈະການເກມອອນລາຍນໍາບໍລິສັດ ບໍລິຫານຈັດການໄຊເບີລາວຖືກຕ້ອງຕາມລະບຽບການ ເຊີ່ງດໍາເນີນພາຍໃຕ້ການຄວບຄຸມຂອງກະຊວງປ້ອງກັນຄວາມສະຫງົບຢ່າງເຂັ້ມງວດ,
ໃນຕໍ່ຫນ້າເພື່ອເຮັດໃຫ້ການເເກ້ໄຂບັນຫາສໍ້ໂກງທາງໂທລະຄົມ ຫລື call center ຂ້າມຊາດຢູ່ພາຍໃນເຂດເສດຖະກິດພິເສດສາມຫລ່ຽມຄໍານັບມື້ຄ່ອຍໆຫມົດໄປ ສະເຫນີໃຫ້ຜູ້ພັດທະນາກໍ່ຄືກຸ່ມບໍລິສັດດອກງີ້ວຄໍາ ໃຫ້ການຮ່ວມມືເເລະສະຫນັບສະຫນູນກັບເຈົ້າຫນ້າທີ່ກ່ຽວຂ້ອງຂອງລາວເເກ້ໄຂຫລາຍບັນຫາທີ່ຍັງເປັນປະກົດການຫຍໍ້ທໍ້ ຢູ່ພາຍໃນເຂດເສດຖະກິດພິເສດສາມຫລ່ຽມຄໍາ ໂດຍສະເພາະ ການລັກລອບເຂົ້າ-ອອກເມືອງເເບບຜິດກົດຫມາຍ, ການລີ້ຊ້ອນຂອງຜູ້ຫນີຄະດີຈາກບັນດາປະເທດໃກ້ຄຽງ, ການດໍາເນີນການສໍ້ໂກງທາງໂທລະຄົມ ການນໍາເຂົ້າ-ນໍາໃຊ້ພາຫະນະທີ່ບໍ່ຖືກຕ້ອງ ເເລະ ບັນຫາອື່ນໆອີກຈໍານວນຫນື່ງ.
ໂອກາດດຽວກັນ ພົນຈັດຕະວາ ວັນທອນ ສຸລິສັກ ຮອງຫົວຫນ້າກົມໃຫຍ່ຕໍາຫລວດ ກະຊວງປ້ອງກັນຄວາມສະຫງົບ ມີຄໍາເຫັນໂດຍສັງເຂບກ່ຽວກັບການເຄື່ອນໄຫວວຽກງານວິຊາສະເພາະຂອງກໍາລັງປ້ອງກັນຄວາມສະຫງົບໃນໄລຍະຜ່ານມາກໍ່ຄືປັດຈຸບັນ ຢູ່ເຂດເສດຖະກິດສາມຫລ່ຽມຄໍາ ໂດຍປະຕິບັດຕາມການຊີ້ນໍາຢ່າງໃກ້ຊິດຂອງພັກເເລະລັດຖະບານກະຊວງປ້ອງກັນຄວາມສະຫງົບໄດ້ສົມທົບກັບພາກສ່ວນກ່ຽວຂ້ອງ ເກັບກໍາຂຶ້ນບັນຊີບັນດາຫົວຫນ່ວຍທີ່ເຄື່ອນໄຫວສໍ້ໂກງທາງໂທລະຄົມ ສ້າງບົດບັນທຶກພ້ອມທັງຮຶ້ຖອນສີ່ງກີດຂວາງຕ່າງໆອອກເປັນຈໍານວນຫລາຍຫົວຫນ່ວຍ ກັກຕົວຜູ້ຖືກຫາໄດ້ເປັນຈໍານວນຫລາຍ ພ້ອມທັງໄດ້ສຶກສາອົບຮົມໃຫ້ບັນດາຫົວຫນ່ວຍທີ່ຍັງບໍ່ມາຂຶ້ນທະບຽນ ໃຫ້ມາຂຶ້ນທະບຽນດໍາເນີນກິດຈະການນໍາບໍລິສັດບໍລິຫານຈັດການໄຊເບີລາວ ພາຍໃຕ້ການຄວບຄຸມຂອງກະຊວງປ້ອງກັນຄວາມສະຫງົບໃຫ້ຖືກຕ້ອງຕາມລະບຽບການ ເເລະ ນັບເເຕ່ວັນທີ 25 ສິງຫາ ນີ້ເປັນຕົ້ນໄປເຈົ້າຫນ້າທີ່ປ້ອງກັນຄວາມສະຫງົບຈະເພີ່ມທະວີຄວາມເປັນເຈົ້າການໃນການປະສານສົມທົບກັບພາກສ່ວນກ່ຽວຂ້ອງ ຈັດຕັ້ງຄະນະສະເພະກິດກວດກາ ເພື່ອຈັບກຸມບັນດາຫົວຫນ່ວຍທຸລະກິດທີ່ຝ່າຝືນ ພ້ອມທັງສືບຕໍ່ເຄື່ອນໄຫວສໍ້ໂກງ ທາງໂທລະຄົມມາດໍາເນີນຄະດີຕາມລະບຽບກົດຫມາຍຢ່າງເດັດຂາດ ນັບທັງຄົນລາວເອງ ເເລະ ຄົນຕ່າງປະເທດ ເເລະ ບັນຫາອື່ນໆ.
ສ່ວນທ່ານຈ້າວເຫວີຍ ປະທານສະພາບໍລິຫານເຂດເສດຖະກີດພິເສດສາມຫລ່ຽມຄໍາ ໄດ້ສະເເດງຄວາມຊົມເຊີຍທີ່ພັກ ເເລະ ລັດຖະບານກໍ່ຄືເຈົ້າຫນ້າທີ່ກ່ຽວຂ້ອງຂອງລາວ ໄດ້ເອົາໃຈໃສ່ຢ່າງໃກ້ຊິດໃນການປາບປາມກຸ່ມເເກ້ງທີ່ເຄື່ອນໄຫວເເບບບໍ່ຖືກຕ້ອງຕາມລະບຽບການ ຢູ່ເຂດເສດຖະກິດສາມຫລ່ຽມຄໍາໃນເເຕ່ລະໄລຍະ, ພ້ອມທັງໄດ້ລາຍງານສະພາບການພັດທະນາ ແລະ ຄຸ້ມຄອງເຂດເສດຖະກິດພິເສດສາມຫຼ່ຽມຄຳໂດຍຫຍໍ້ ຂອງເຂດດັ່ງກ່າວ ເຊິ່ງຕັ້ງຢູ່ພາຍໃນຂອບເຂດຂອງເມືອງຕົ້ນເຜິ້ງ ແຂວງບໍ່ແກ້ວ, ຈຸດເຂດແດນລະຫວ່າງລາວ-ໄທ-ມຽນມາ ໄດ້ຮັບການສ້າງຕັ້ງຂຶ້ນນັບແຕ່ປີ 2007 ຊຶ່ງໃນເບື້ອງຕົ້ນແມ່ນການພັດທະນາເຂດເສດຖະກິດ ແລະ ທ່ອງທ່ຽວຄົບວົງຈອນອາຊຽນສາມຫຼ່ຽມຄຳ ແລະ ໄດ້ຍົກລະດັບຂຶ້ນເປັນເຂດເສດຖະກິດພິເສດໃນປີ 2010 ອີງຕາມສັນຍາການພັດທະນາເຂດໄດ້ກຳນົດມີ 18 ກິດຈະການຫຼັກທີ່ຕິດພັນກັບການພັດທະນາພື້ນຖານໂຄງລ່າງ, ເສດຖະກິດ, ການຄ້າ, ການລົງທຶນ, ກະສິກຳ, ການສຶກສາ, ສາທາລະນະສຸກ, ການທ່ອງທ່ຽວ, ການບໍລິການ-ການບັນເທີງ ແລະ ກິດຈະກໍາອື່ນໆ ຈຸດປະສົງການພັດທະນາເຂດເສດຖະກິດພິເສດສາມຫຼ່ຽມຄຳ ເພື່ອແນໃສ່ສ້າງເຂດຊົນນະບົດ, ທຸກຍາກ ແລະ ຫ່າງໄກສອກຫຼີກໃຫ້ມີການພັດທະນາ ແລະ ກາຍເປັນຕົວເມືອງໃໝ່ທີ່ທັນສະໄໝກ້າວໄປສູ່ການຍົກລະດັບເປັນນະຄອນ. ນັບແຕ່ປີ 2007 ເປັນຕົ້ນມາຜູ້ພັດທະນາກໍຄືກຸ່ມບໍລິສັດດອກງິ້ວຄຳ ຈຳກັດ ໄດ້ເອົາໃຈໃສ່ລົງທຶນໃນບັນດາກິດຈະການຕ່າງໆ ພ້ອມນັ້ນ, ກໍມີນັກລົງທຶນທັງພາຍໃນ ແລະ ຕ່າງປະເທດເຂົ້າມາລົງທຶນດ້ານຕ່າງໆເປັນຈໍານວນຫຼາຍ ເຮັດໃຫ້ເຂດເສດຖະກິດພິເສດສາມຫຼ່ຽມຄຳ ໄດ້ມີການພັດທະນາຢ່າງໄວວາ, ມີການກໍ່ສ້າງພື້ນຖານໂຄງລ່າງທີ່ສົມບູນ ແລະ ກາຍເປັນຕົວເມືອງທີ່ມີລັກສະນະທັນສະໄໝ ແລະ ສີວິໄລ ,ພ້ອມດຽວກັນນີ້ໄດ້ຄະນະພັດທະນາເຂດເສດຖະກີດພິເສດສາມຫລ່ຽມຄໍາ ເອົາໃຈໃສ່ປະສານສົມທົບກັບເຈົ້າຫນ້າທີ່ກ່ຽວຂ້ອງຂອງລາວກໍ່ຄືຂອງເເຂວງເຄື່ອນໄຫວຕິດຕາມກວດກາ ການລັກລອບເຂົ້າເມືອງເເບບຜິດກົດຫມາຍ, ເເກ້ໄຂບັນຫາກຸ່ມເເກ້ງທີ່ເຄື່ອນໄຫວບໍ່ຖືກຕ້ອງຕາມລະບຽບກົດຫມາຍຂອງລາວ ໂດຍສະເພາະກຸ່ມສໍ້ໂກງທາງໂທລະຄົມ ຫລື call center ໄດ້ຫລາຍສົມຄວນ ເເລະ ໃນຕໍ່ຫນ້າຄະນະຄຸ້ມຄອງເຂດເສດຖະກິດພິເສດ ຈະເຮັດວຽກຮ່ວມກັບເຈົ້າຫນ້າທີ່ກ່ຽວຂ້ອງຂອງລາວຢ່າງເເຂງເເຮງໃນການປາບປາມກຸ່ມດັ່ງກ້່າວ, ລວມເຖິງບັນຫາຫຍໍ້ທໍ້ອື່ນໆຢ່າງຕໍ່ເນື່ອງເພື່ອຮັບປະກັບເຮັດໃຫ້ເຂດເສດຖະກິດພິເສດສາມຫລ່ຽມຄໍາ ກາຍເປັນເຂດເສດຖະກິດທີ່ຫນ້າຢູ່, ມີຄວາມສະຫງົບປອດໄພ ປາສະຈາກບັນຫາການກໍ່ອາດສະຍາກໍາຕ່າງໆ ເເລະ ດໍາເນີນການຖືກຕ້ອງຕາມລະບຽບກົດຫມາຍຂອງລາວວາງອອກ.
ຂ່າວ: ເດດອາລຸນ ແກ້ວວິໄລ
