ກອງປະຊຸມຖອດຖອນບົດຮຽນການຈັດຕັ້ງປະຕິບັດວຽກງານຄຸ້ມຄອງໄພພິບັດທົ່ວປະເທດປະຈໍາປີ 2020 ຈັດຂື້ນໃນຕອນເຊົ້າວັນທີ 11 ມີນາ 2021 ຢູ່ຫ້ອງປະຊຸມເຮືອນຮັບແຂກກະຊວງແຮງງານ ແລະ ສະຫວັດດີການສັງຄົມ ພາຍໃຕ້ການເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທືນ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງ, ມີລັດຖະມົນຕີກະຊວງແຮງງານ ແລະ ສະຫວັດດີການສັງຄົມ, ພ້ອມດ້ວຍບັນດາຮອງລັດຖະມົນຕີ, ຮອງເຈົ້າແຂວງ ຜູ້ຕາງຫນ້າຄະນະກໍາມະການຄຸ້ມຄອງໄພພິບັດທີ່ມາຈາກ 18 ແຂວງໃນທົ່ວປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ສອນໄຊ ສີພັນດອນ ຮອງນາຍົກລັດຖະມົນຕີລັດຖະມົນຕີກະຊວງແຜນ ການ ແລະ ການລົງທືນ ປະທານຄະນະກໍາມະການຄຸ້ມຄອງໄພພິບັດຂັ້ນສູນກາງມີຄໍາ ຫັນວ່າ: ກອງປະຊຸມຖອດຖອນບົດຮຽນການຈັດຕັ້ງປະຕິບັດວຽກງານຄຸ້ມຄອງໄພພິບັດທົ່ວປະເທດ ປະຈໍາປີ 2020 ເປັນກອງປະຊຸມທີ່ມີຄວາມໝາຍສໍາຄັນ ຜູ້ແທນກອງປະຊຸມໄດ້ພ້ອມກັນສະຫຼຸບຕີລາຄາຄືນການຈັດຕັ້ງປະຕິບັດວຽກງານຄຸ້ມຄອງໄພພິບັດໄລຍະ 5 ປີ ຜ່ານມາ 2016 ຫາ 2020 ແລະ ວາງທິດທາງແຜນການ 5 ປີ 2021 ຫາ 2025 ລວມທັງແຜນວຽກຈຸດສຸມ ແລະ ການກຽມພ້ອມ ຕອບໂຕ້ໄພພິບັດປະຈໍາປີນີ້ໃຫ້ມີປະສິດທິພາບ ແລະ ປະສິດທິຜົນຫລາຍຂື້ນກວ່າເກົ່າ ກອງປະຊຸມຄັ້ງ ນີ້ຍັງເປັນການຊົມເຊີຍຜົນສໍາເລັດກອງປະຊຸມໃຫ່ຍຜູ້ແທນທົ່ວປະເທດຄັ້ງທີ XI ຂອງພັກ, ຊົມເຊີຍຜົນສໍາເລັດໃນການເລືອກຕັ້ງສະມາຊິກສະພາແຫ່ງຊາດຊຸດທີ IX ແລະ ສະມາຊິກສະພາປະຊາຊົນຂັ້ນແຂວງ ຊຸດທີ II ຕື່ມອີກ.
ທ່ານສອນໄຊ ສີພັນດອນ ມີຄໍາເຫັນຕື່ມວ່າ: 5ປິຜ່ານມາວຽກງານການແກ້ໄຂຕອບໂຕ້ສຸກເສີນ ແລະ ຟື້ນຟູຫຼັງຈາກໄພພິບັດໄດ້ຮັບການຈັດຕັ້ງປະຕິບັດຢ່າງມີຜົນສໍາເລັດໃນແຕ່ລະໄລຍະ ເຮັດໃຫ້ປະຊາຊົນຜູ້ປະສົບໄພພິບັດໄດ້ຮັບການຊ່ວຍເຫຼືອບັນເທົາທຸກສຸກເສີນ ແລະ ຟື້ນຟູຊີວິດການເປັນຢູ່ຫຼັງຈາກໄພພິບັດກັບເຂົ້າສູ່ສະພາບປົກກະຕິ, ບັນດາພື້ນຖານໂຄງລ່າງດ້ານໂຍທາທິການ ແລະ ຂົນສົ່ງ, ດ້ານການຜະລິດກະສິກໍາ, ສິ່ງແວດລ້ອມໄດ້ຮັບການສ້ອມແປງ ແລະ ກໍ່ສ້າງຄືນໃໝ່ຕາມເງື່ອນໄຂທາງດ້ານງົບປະມານລວມທັງການຊ່ວຍເຫຼືອຂອງສາກົນ, ກອງປະຊຸມຖອດຖອນບົດຮຽນການຈັດຕັ້ງປະຕິບັດວຽກງານຄຸ້ມຄອງໄພພິບັດທົ່ວປະເທດປະຈໍາ ປີ 2020 ທີ່ຈັດຂື້ນໃນຄັ້ງນີ້ຜູ້ເຂົ້າຮ່ວມຍັງໄດ້ພ້ອມກັນຮັບຟັງການສະຫລຸບຄືນຜົນການດໍາເນີນກອງປະຊຸມວຽກງານວິຊາການດ້ານການຄຸ້ມຄອງໄພພິບັດ ປີ2020, ຮັບຟັງການຄາດຄະເນລ່ວງຫນ້າຂອງທ່າອ່ຽງສະພາບດີນຟ້າອາກາດຂອງລາວ, ຮັບຟັງການປະກອບຄໍາເຫັນຂອງຄະນະກໍາມະການຄຸ້ມຄອງໄພພິບັດທີ່ມາຈາກກະຊວງ, ຫ້ອງການ, ພະແນກການອ້ອມຂ້າງສູນກາງ ແລະ ຄະນະກໍາມະການຄຸ້ມຄອງໄພພິບັດທີ່ມາຈາກ 18 ແຂວງທົ່ວປະເທດ ຕື່ມອີກ.
ຂ່າວ: ເດດອາລຸນ ແກ້ວວິໄລ
Loading...