ລະຫວ່າງວັນທີ 19 – 23 ທັນວາ 2022, ທີ່ຫ້ອງວ່າການ ເມືອງວັງວຽງ ແຂວງວຽງຈັນ ໄດ້ຈັດກອງປະຊຸມຖອດຖອນບົດຮຽນ ປະຈຳປີ 2022 ແລະ ຝຶກອົບຮົມວຽກງານໂຄສະນາໄວໜຸ່ມ ທົ່ວປະເທດຂຶ້ນ ພາຍໃຕ້ການເປັນປະທານຂອງທ່ານ ສັງຂານ ຈູມຄຳພັນ ຮອງຜູ້ອຳນວຍການໃຫຍ່ວິທະຍຸ ກະຈາຍສຽງແຫ່ງຊາດລາວ, ທ່ານ ໄຊໂກສົນ ຊານຸບານ ຜູ້ຕາງໜ້າຈາກອົງການ unicef ປະຈຳລາວ, ມີບັນດາຜູ້ປະສານງານໂຄງການສື່ໄວໜຸ່ມ ແລະ ຕົວແທນທີມງານສື່ໄວໜຸ່ມທົ່ວປະເທດເຂົ້າຮ່ວມ 60 ກວ່າຄົນ.
ກອງປະຊຸມ ແລະ ຊຸດຝຶກອົບຮົມຄັ້ງນີ້ ຜູ້ເຂົ້າຮ່ວມຈາກບັນດາແຂວງທົ່ວປະເທດໄດ້ຜັດປ່ຽນກັນຂື້ນລາຍງານ ການປະຕິບັດກິດຈະກໍາ ຂອງທີມງານ, ຄວາມຄືບໜ້າ, ບັນຫາທ້າທາຍ ແລະ ວິທີການແກ້ໄຂ ນອກນີ້ ຜູ້ເຂົ້າຮ່ວມຍັງໄດ້ຮຽນຮູ້ ກ່ຽວກັບ ວິທີການລາຍງານຂ່າວກ່ຽວກັບສິດທິເດັກ, ວິທີການຖ່າຍຮູບ, ຖ່າຍວິດີໂອ, ອອກແບບ Poster ແລະ ຕັດຕໍ່ ຄລິບວິດີໂອຜ່ານໂທລະສັບມືຖື, ການສ້າງ ເນື້ອໃນ ການກຳນົດຫົວຂໍ້ ຫຼື Content ທີ່ໜ້າສົນໃຈ ແລະ ອື່ນໆ ໂດຍໄດ້ທົດລອງປະຕິບັດຕົວຈິງກັບມວນຊົນໃນບ້ານເປົ້າໝາຍ.
ພ້ອມກັນນີ້ ທີມງານສື່ໄວໜຸ່ມທົ່ວປະເທດ ຍັງໄດ້ ຈັດກິດຈະກຳສາຍພົວພັນກ່ຽວກັບອາສາໂຄສະນາໄວໜຸ່ມ ແລະ ຮ່ວມກັນວາງແຜນຍຸດທະສາດວຽກງານໂຄສະນາໃນຕໍ່ໜ້າ ເຊິ່ງອີກບໍ່ດົນຈະໄດ້ມີການຕິດຕາມການປະເມີນຜົນດ້ວຍໄວໜຸ່ມເອງ.
ກອງປະຊຸມ ແລະ ຊຸດຝຶກອົບຮົມຄັ້ງນີ້ ເປັນການທົບທວນຄືນບັນດາກິດຈະກຳ ຊອກຮູ້ບັນຫາ, ອຸປະສັກ ແລະ ວິທີແກ້ໄຂຂອງທີມງານ ຂອງໂຄງການສື່ໄວໜຸ່ມ ທີ່ໄດ້ດຳເນີນຢູ່ທົ່ວປະເທດ ທັງເປັນການປັບປຸງ – ເສີມສ້າງທັກສະດ້ານວິຊາການຕ່າງໆໃຫ້ແກ່ສະມາຊິກ ໃນການໂຄສະນາ ຜ່ານສື່ວິທະຍຸກະຈາຍສຽງ ແລະ ສື່ໃໝ່ ເພື່ອປະກອບສ່ວນຊ່ວຍພັດທະນາທັກສະແກ່ໄວໜຸ່ມລາວ
ໂດຍສະເພາະວຽກງານອາສາໂຄສະນາໄວໜຸ່ມໃນຫົວຂໍ້ຕ່າງໆ ແລະ ທັງເປັນການເຮັດໃຫ້ຜູ້ເຂົ້າຮ່ວມໄດ້ມີໂອກາດຮຽນຮູ້ ແລກປ່ຽນປະສົບການ ຈາກເພື່ອນ ແລະ ນັກໂຄສະນາໄວໜຸ່ມອື່ນໆທີ່ມີບົດຮຽນຈາກການດຳເນີນກິດຈະກຳເພື່ອສັງຄົມມາກ່ອນ.
ພາບ ແລະ ຂ່າວ : ທີມງານໂຄງການສື່ໄວໜຸ່ມ
