ວັນທີ 5 ພະຈິກ 2023 ຢູ່ທີ່ໂຮງແຮມແລນມາກ ກົມຄຸ້ມຄອງ ແລະ ສົ່ງເສີມວຽກງານຍຸຕິທຳ ໄດ້ຈັດກອງປະຊຸມຖະແຫຼ່ງຂ່າວກ່ຽວກັບການປະກາດໃຊ້ກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ (ສະບັບປຸງ) ໂດຍການເປັນປະທານຂອງ ທ່ານ ກົງຈີ ຢ່າງຈື ຮອງລັດຖະມົນຕີກະຊວງຍຸຕິທຳ, ເຂົ້າ ຮ່ວມມີ ທ່ານ ນາງ ມາຣຽນ ອັບດູ ຫົວໜ້າພະແນກນະໂຍບາຍສັງຄົມ ອົງການຢູນິເຊັບ ປະຈຳ ສປປ ລາວ (Ms. Maryam Abdu, Chief of Social Policy, UNICEF Lao PDR.), ທ່ານ ປອ ຈອມຄຳ ບຸບຜາລີວັນ ຫົວໜ້າກົມຄຸ້ມຄອງ ແລະ ສົ່ງເສີມວຽກງານຍຸຕິທຳ, ຫ້ອງວາການສຳນັກງານນາຍົກລັດຖະມົນຕີ, ປກສ, ໄອຍະການປະຊາຊົນສູງສຸດ, ສານປະຊາຊົນສູງສຸດ, ສູນກາງສະຫະພັນແມ່ຍິງລາວ, ກະຊວງແຮງງານ ແລະ ສະຫັວດດິການສັງຄົມ, ກະຊວງສາທາລະນະສຸກ, ກະຊວງສຶກສາທິການແລະ ກິລາ, ສະພາແຫ່ງຊາດ, ຄກຊມດ ແລະ ອົງການຈັດຕັ້ງສາກົນ ພ້ອມດ້ວຍຄະນະຮັບຜິດຊອບເຂົ້າຮ່ວມ.
ໃນພິທີ ທ່ານ ກົງຈີ ຢ່າງຈື່ ຮອງລັດຖະມົນຕີກະຊວງຍຸຕິທໍາ ໄດ້ກ່າວວ່າ “ການປັບປຸງກົດໝາຍວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ແມ່ນໜຶ່ງໃນການຈັດຕັ້ງປະຕິບັດຕົວຈິງຂອງລັດຖະບານ ສປປ ລາວ ໃນການຈັດຕັ້ງປະຕິບັດຂໍ້ສະເໜີແນະຂອງຄະນະກໍາມະການສິດທິເດັກ ຂອງສະຫະປະຊາຊາດ ທີ່ມີຕໍ່ລັດຖະບານ ສປປ ລາວ ໃນປີ 2018 ແລະ ຍັງເປັນການຈັດຕັ້ງປະຕິບັດແຜນດໍາເນີນງານແຫ່ງຊາດເພື່ອສ້າງຄວາມເຂັ້ມແຂງໃຫ້ແກ່ລະບົບການປົກປ້ອງເດັກ (2022–2026) ຂອງ ສປປ ລາວ. ຈາກນັ້ນ, ທ່ານ ຮອງລັດຖະມົນຕີກະຊວງຍຸຕິທໍາ ຍັງໄດ້ກ່າວຕື່ມວ່າ ກົດໝາຍສະບັບປັບປຸງປີ 2023 ນີ້ ສະແດງໃຫ້ເຫັນເຖິງການໃຫ້ບູລິມະສິດຂອງລັດຖະບານ ໃນການສ້າງຄວາມເຂັ້ມແຂງໃຫ້ແກ່ລະບົບການປົກປ້ອງເດັກ ແລະ ການພັດທະນາບຸກຄະລາກອນສັງຄົມສົງເຄາະ ຄຽງຄູ່ກັບການເສີມຂະຫຍາຍຄວາມຮັບຜິດຊອບຂອງເຈົ້າໜ້າທີ່ບັງຄັບໃຊ້ກົດໝາຍ.
ກົດໝາຍສະບັບປັບປຸງນີ້ຍັງໄດ້ກຳນົດບົດບາດ ແລະ ຄວາມຮັບຜິດຊອບຂອງບັນດາ ກະຊວງ, ອົງການທີ່ກ່ຽວຂ້ອງຢ່າງຈະແຈ້ງຄື: ທ່ານຮອງນາຍົກລັດຖະມົນຕີ ເປັນປະທານຄະນະກຳມະການປົກປ້ອງສິດ ແລະ ຜົນປະໂຫຍດຂອງເດັກ ປ່ຽນແທນຄະນະກຳມະການປົກປ້ອງ ແລະ ຊ່ວຍເຫຼືອເດັກໃນປະຈຸບັນ ໂດຍມີທ່ານຮອງລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ເປັນປະທານ, ນອກນັ້ນຍັງໄດ້ມອບໝາຍໃຫ້ ກະຊວງແຮງງານ ແລະ ສະຫວັດດີການສັງຄົມ ຮັບໜ້າທີ່ເປັນເຈົ້າການໃນການນຳພາການສ້າງ, ປັບປຸງ, ຄຸ້ມຄອງ ແລະ ນຳໃຊ້ ລະບົບຂໍ້ມູນຂ່າວສານ ການປົກປ້ອງສິດ ແລະ ຜົນປະໂຫຍດຂອງເດັກ, ເປັນເຈົ້າການໃນການລະດົມ, ຄຸ້ມຄອງກອງທຶນປົກປ້ອງສິດ ແລະ ຜົນປະໂຫຍດຂອງເດັກ. ໃນໂອກາດນີ້ ທ່ານ ນາງ ມາຣຽນ ອັບດູ ຫົວໜ້າພະແນກນະໂຍບາຍສັງຄົມ ອົງການຢູນິເຊັບ ປະຈຳ ສປປ ລາວ ໃນນາມຕາງໜ້າອົງການຢູນີເຊັບ ໄດ້ກ່າວວ່າ ການປັບປຸງກົດໝາຍ ວ່າດ້ວຍການປົກປ້ອງສິດ ແລະ ຜົນປະໂຫຍດຂອງເດັກ ເປັນການບຸກທະລຸເພື່ອປົກປ້ອງສິດທິຂອງເດັກຢ່າງເຂັ້ມແຂງໃນ ສປປ ລາວ ແລະ ພວກເຮົາຂໍຊົມເຊີຍຕໍ່ຄວາມພະຍາຍາມຂອງລັດຖະບານ ສປປ ລາວ. ອົງການຢູນິເຊັບ ຖືໂອກາດນີ້ສະແດງຄຳໝັ້ນສັນຍາ ຈະສືບຕໍ່ສະໜັບສະໜູນ ສປປ ລາວ ໃນການສ້າງສະພາບແວດລ້ອມທາງດ້ານນະໂຍບາຍ ທີ່ຮັບປະກັນໃຫ້ເດັກທຸກຄົນໄດ້ຮັບການປົກປ້ອງຈາກໄພອັນຕະລາຍ. ຈາກນັ້ນ, ຜູ້ເຂົ້າຮ່ວມກໍໄດ້ມີການຕັ້ງຄຳຖາມເຈາະຈີ້ມ ແລະ ປະກອບຄຳຄິດຄຳເຫັນໃສ່ກົດໝາຍສະບັບດັ່ງກ່າວດ້ວຍເຫດ ແລະ ຜົນ ຢ່າງກົງໄປກົງມາດ້ວຍບັນຍາກາດຟົດຟື້ນ.
ຂ່າວ-ພາບ: ນ. ບຸນຖອມ ພະສະແຫວງ
