ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 24 ມັງກອນ 2024 ຫ້ອງວ່າການສໍານັກງານນາຍົກລັດຖະມົນຕີ (ຫສນຍ) ໄດ້ຈັດກອງປະຊຸມທົບທວນຄວາມຄືບໜ້າໃນການສ້າງນິຕິກຳ ຂັ້ນສູນກາງ ຢູ່ທີ່ໂຮງແຮມແລນມາກ, ນະຄອນຫຼວງວຽງຈັນ ພາຍໃຕ້ການເປັນປະທານຮ່ວມຂອງທ່ານ ນາງ ທິບພະກອນ ຈັນທະວົງສາ, ຮອງລັດຖະມົນຕີ, ຮອງຫົວໜ້າ ຫສນຍ; ທ່ານ ກົງຈີ ຢ່າງຈື, ຮອງລັດຖະມົນຕີ ກະຊວງຍຸຕິທຳ ແລະ ທ່ານ ພູທອນ ວໍລະເພັດ, ຮອງປະທານກຳມາທິການກົົດໝາຍ, ສະພາແຫ່ງຊາດ; ມີບັນດາທ່ານ ຫົວໜ້າຫ້ອງການກະຊວງ-ອົງການ, ຫົວໜ້າກົມ, ຮອງຫົວໜ້າກົມ, ຄະນະພະແນກ, ພະນັກງານວິຊາການ ທີ່ກ່ຽວຂ້ອງ ແລະ ແຂກທີ່ຖືກເຊີນ ເຂົ້າຮ່ວມທັງໝົດ 100 ກວ່າທ່ານ.
ຈຸດປະສົງຂອງກອງປະຊຸມ ເພື່ອເປັນການສະຫຼຸບສັງລວມຜົນສໍາເລັດ ກອງປະຊຸມສໍາມະນາ ກ່ຽວກັບການສ້າງກົດໝາຍ ແລະ ນິຕິກໍາໃຕ້ກົດໝາຍ ຂັ້ນສູນກາງ; ແລກປ່ຽນບາງບົດຮຽນທີ່ດີຂອງຊ່ຽວຊານສາກົນ ກ່ຽວກັບການຈັດ ຕັ້ງປະຕິບັດແຜນການສ້າງ, ປັບປຸງ ແລະ ການຕິດຕາມກວດກາ ການຈັດຕັ້ງປະຕິບັດບັນດານິຕິກໍາ; ນໍາເອົາຜົນສໍາເລັດຂອງກອງປະຊຸມແລກປ່ຽນ ລົງເຜີຍແຜ່ໃຫ້ທ້ອງຖິ່ນ ແລະ ກະກຽມເນື້ອໃນ ກອງປະຊຸມສໍາມະນາ ກ່ຽວກັບການສ້າງຄວາມເຂັ້ມແຂງ ໃນການສ້າງກົດໝາຍ ແລະ ນິຕິກໍາໃຕ້ກົດໝາຍ ຂັ້ນທ້ອງຖິ່ນ ເພື່ອໃຫ້ມີຄວາມຖືກຕ້ອງ ແລະ ສອດຄ່ອງ ຕາມຫຼັກການ, ລະບຽບການ ແລະ ຂັ້ນຕອນໃນການສ້າງ ແລະ ປັບປຸງນິຕິກໍາ, ແນໃສ່ເຮັດໃຫ້ການສ້າງ ແລະ ປັບປຸງນິຕິກຳ ມີປະສິດທິພາບ, ປະສິດທິຜົນ, ມີສຳເລັດຕາມແຜນທີ່ກຳນົດໄວ້ ໃນແຕ່ລະໄລຍະ, ທັງເປັນບ່ອນອີງທີ່ສໍາຄັນ ໃຫ້ແກ່ບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນ ໂດຍສະເພາະ ກະຊວງຍຸຕິທໍາ, ກຳມາທິການກົດໝາຍ ສະພາແຫ່ງຊາດ ແລະ ຫສນຍ ທີ່ມີຄວາມຮັບຜິດຊອບ ແລະ ມີສ່ວນຮ່ວມ ໃນການສ້າງ ແລະ ປັບປຸງນິຕິກຳ, ຄຽງຄູ່ກັນນັ້ນ ກໍ່ເພື່ອສືບຕໍ່ສ້າງຄວາມເຂັ້ມແຂງດ້ານວິຊາການ ໃຫ້ຂັ້ນສູນກາງ ແລະ ທ້ອງຖິ່ນ.
ເນື້ອໃນຂອງກອງປະຊຸມຄັ້ງນີ້, ຜູ້ເຂົ້າຮ່ວມໄດ້ຮັບຟັງການລາຍງານ 7 ເອກະສານສໍາຄັນ ຄື:
1). ບົດລາຍງານກ່ຽວກັບຄວາມຄືບໜ້າ ໃນການຈັດຕັ້ງປະຕິບັດ ແຈ້ງການສະບັບເລກທີ 447/ຫສນຍ, ລົງວັນທີ 04 ພຶດສະພາ 2021 ກໍ່ຄື ຜົນສໍາເລັດກອງປະຊຸມສໍາມະນາ ກ່ຽວກັບການສ້າງກົດໝາຍ ແລະ ນິຕິກໍາໃຕ້ກົດໝາຍ ຂັ້ນສູນກາງ ຄັ້ງວັນທີ 16-17 ມີນາ 2021;
2). ການສ້າງ ແລະ ປັບປຸງນິຕິກໍາ;
3). ຂັ້ນຕອນການພິຈາລະນາຮ່າງກົດໝາຍ ຢູ່ສະພາແຫ່ງຊາດ;
4). ການໂຄສະນາເຜີຍແຜ່ນິຕິກຳ;
5). ການຕິດຕາມກວດກາ ການຈັດຕັ້ງປະຕິບັດກົດໝາຍ ຂອງສະພາແຫ່ງຊາດ; 6). ການແລກປ່ຽນບາງບົດຮຽນທີ່ດີຂອງສາກົນ ກ່ຽວກັບຂະບວນການພັດທະນາກົດໝາຍ.
7). ການແລກປ່ຽນບາງບົດຮຽນທີ່ດີຂອງສາກົນ ໃນການປະເມີນຜົນການຈັດຕັ້ງປະຕິບັດກົດໝາຍ.
ນອກນັ້ນ, ຜູ້ເຂົ້າຮ່ວມກອງປະຊຸມ ຍັງໄດ້ແລກປ່ຽນຄຳຄິດເຫັນ ກ່ຽວກັບຜົນສຳເລັດ, ຂໍ້ຈຳກັດ, ສິ່ງທ້າທ້າຍ ແລະ ໂອກາດ ໃນຂະບວນການສ້າງນິຕິກຳ.
ຕອນທ້າຍ, ກອງປະຊຸມ ໄດ້ຮຽກຮ້ອງມາຍັງຜູ້ເຂົ້າຮ່ວມ ຈົ່ງນໍາເອົາບົດຮຽນ ແລະ ຜົນກອງປະຊຸມຄັ້ງນີ້ ລາຍງານຕໍ່ຂັ້ນເທິງຂອງຕົນເພື່ອຊາບ ໂດຍສະເພາະ ບັນດາຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ ຈາກກອງປະຊຸມຄັ້ງນີ້ ກໍ່ຄືການຈັດຕັ້ງປະຕິບັດວຽກງານ ໃນໄລຍະຜ່ານມາ ເພື່ອນຳໄປຈັດຕັ້ງຜັນຂະຫຍາຍ ເຂົ້າສູ່ວຽກງານທີ່ກ່ຽວຂ້ອງຂອງຕົນ ໃຫ້ມີການຫັນປ່ຽນ ແລະ ເກີດໝາກຜົນຕົວຈິງ.
ພາບ ແລະ ຂ່າວ: ກົມປະຊາສຳພັນ ຫສນຍ
May be an image of 5 people and text