ກອງປະຊຸມປະເມີນຜົນການຈັດການຈັດຕັ້ງປະຕິບັດ ລັດຖະທຳມະນູນ ແຫ່ງ ສປປ ລາວ ສະບັບປີ 2015

ສະພາແຫ່ງຊາດ ຮ່ວມກັບ ສູນກາງແນວລາວສ້າງຊາດ ຈັດກອງປະຊຸມປະເມີນການຈັດຕັ້ງປະຕິບັດລັດຖະທຳມະນູນ ແຫ່ງ ສປປ ລາວ ສະບັບປີ 2015 ທີ່ ສູນກາງແນວລາວສ້າງຊາດ ໃນວັນທີ 29 ກໍລະກົດ ນີ້ ໂດຍການເປັນປະທານ ຂອງທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ ປະທານສູນກາງແນວລາວສ້າງຊາດ ເຂົ້າຮ່ວມມີ ທ່ານ ຈະເລີນ ເຢຍປາວເຮີ ຮອງປະທານສະພາແຫ່ງຊາດ ຮອງປະທານຄະນະອະນຸກຳມະການເນື້ອໃນປັບປຸງລັດຖະທຳມະນູນ, ບັນດາທ່ານຮອງປະທານສູນກາງແນວລາວສ້າງຊາດ, ມີຄະນະກຳມະການສູນກາງແນວລາວສ້າງຊາດອ້ອມຂ້າງສູນກາງ ພ້ອມດ້ວຍພະນັງານ-ລັດຖະກອນສູນກາງແນວລາວສ້າງຊາດ ແລະ ແນວລາວສ້າງຊາດນະຄອນຫຼວງວຽງຈັນ, ແນວລາວສ້າງຊາດ 9 ເມືອງ ໃນນະຄອນຫຼວງວຽງ ຈັນເຂົ້າຮ່ວມ.

ທ່ານປະທານສູນກາງແນວລາວສ້າງຊາດ ໄດ້ມີຄຳເຫັນກ່າວເປີດກອງປະຊຸມຊຶ່ງທ່ານໄດ້ຍົກໃຫ້ເຫັນຄວາມໝາຍຄວາມສຳຄັນຂອງລັດຖະທຳມະນູນ ຊຶ່ງເປັນນິຕິກຳສູງສຸດ ຂອງ ສປປ ລາວ, ເປັນນິຕິກຳທີ່ມີຄວາມສຳຄັນຕໍ່ການສ້າງກົດໝາຍແຫ່ງ ສປປ ລາວ ສະນັ້ນ, ການປະເມີນນີ້ເປັນຊອກຮູ້ຂໍ້ສະດວກຂໍ້ຫຍຸ້ງຍາກ ໃນການຈັດຕັ້ງປະຕິບັດລັດຖະທຳມະນູນເວົ້າລວມ ເວົ້າສະເພາະ ໃນຂົງເຂດແນວລາວສ້າງແນວລາວສ້າງຊາດ.

ທ່ານ ພູທອນ ວໍລະເພັດ ຮອງປະທານກຳມະທິກຳກົດໝາຍຄະນະອະນຸກຳມະການ ເນື້ອໃນປັບປຸງລັດຖະທຳມະນູນ ໄດ້ສະເໜີບົດປະເມີນການຈັດຕັ້ງປະຕິບັດ ລັດຖະທຳມະນູນ ສະບັບປີ 2015 ຊຶ່ງເປັນໄລຍະ 9 ປີຜ່ານມາ ໃນບົດລາຍງານໄດ້ຍົກໃຫ້ເຫັນບັນດາຂໍ້ສະດວກ ແລະ ຂໍ້ຫຍຸ້ງຍາກ ໃນການປະຕິບັດໃນແຕ່ລະຂົງເຂດວຽກງານ ຊຶ່ງຈະຕ້ອງໄດ້ປັບປຸງບາງມາດຕາ, ບາງຄຳສັບ ໃຫ້ແທດເໝາະກັບສະພາບປັດຈຸບັນ ຫຼັງຈາກນັ້ນ, ບັນດາທ່ານຜູ້ເຂົ້າຮ່ວມ ໄດ້ປະກອບຄຳຄິດຄຳເຫັນໃສ່ລັດຖະທຳມະນູນ ສະບັບປີ 2015 ຢ່າງກົງໄປກົງມາເພື່ອເປັນປັບປຸງສອດຄ່ອງຕົວຈິງ.

ທ່ານ ຈະເລີນ ເຢຍປາວເຮີ ໄດ້ມີຄຳຕໍ່ທີ່ປະຊຸມ ຊຶ່ງກ່ອນອື່ນທ່ານໄດ້ສະແດງຄວາມຊົມເຊີຍຕໍ່ບັນດາຄຳຄິດຄຳເຫັນ ແລະ ທ່ານເນັ້ນໃຫ້ບັນດາທ່ານຜູ້ເຂົ້າຮ່ວມຈົ່ງສືບຕໍ່ມີຄຳເຫັນ, ເຜີຍແຜ່ສູ່ແຕ່ລະຂົງເຂດ ແລ້ວສົ່ງໃຫ້ຄະນະຮັບຜິດຊອບປັບປຸງລັດຖະທຳມະນູນ ເພື່ອນຳໄປຄົ້ນຄວ້າ ແລະ ປັບປຸງໃຫ້ສອດຄ່ອງ, ຄົບຖ້ວນ, ແທດເໝາະຕາມສະພາບສັງຄົມໃນປະຈຸບັນ.

(ຂ່າວ-ພາບ:ສນຊ)