ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມປຶກສາຫາລືຮ່າງແຜນດຳເນີນງານແຫ່ງຊາດເພື່ອຄວາມສະ ເໝີພາບຍິງ-ຊາຍ 5 ປີຄັ້ງທີ IV (2021-2025)

ກອງ​ປະ​ຊຸ​ມ​​ປຶກ​ສາ​ຫາ​ລື​ຮ່າງ​ແຜນ​ດຳ​ເນີນ​ງານ​ແຫ່ງ​ຊາດ​ເພື່ອ​ຄວາມ​ສະ​ເໝີ​ພາບ​ຍິງ-ຊາຍ 5 ປີ​ຄັ້ງ​ທີ IV (2021-2025) ໄດ້​ໄຂຂຶ້ນໃນ​​ວັນທີ 19 ມິ​ຖຸ​ນາ 2020, ທີ່​ ໂຮງ​ແຮມ​ທະ​ວີ​ສຸກ, ເມືອງວັງ​ວຽງ ແຂວງວຽງ​ຈັນ ໂດຍ​ການ​ເປັນ​ປະ​ທານ​ຂອງ​ທ່ານ ນາງ ບັນ​ດິດ ປະ​ທຸມ​ວັນ, ຮອງ​ປະ​ທານ​ສູນ​ກາງ​ສະ​ຫະ​ພັນ​ແມ່​ຍິງ​ລາວ ທັງ​ເປັນຮອງປະ​ທານ​ຄະ​ນະ​ກຳ​ມາ​ທິ​ການ​ແຫ່ງ​ຊາດ​ເພື່ອ​ຄວາມ​ກ້າວ​ໜ້າ​ຂອງ​ແມ່​ຍິງ ແລະ ແມ່-ເດັກ ແລະ ​ທ່ານ​ ວິກ​ເຕີ ວາ​ລາ​ດີ​ເອ​ໂຊ, ຮອງ​ຜູ້​ຕາງ​ໜ້າ​ອົງ​ການ UNFPA ປະ​ຈຳ ສ​ປ​ປ ລາວ. ມີຄະ​ນະ​ກົມ, ຫົວ​ໜ້າ​ພະ​ແນກ ແລະ ວິ​ຊາ​ການ ທີ່​ຕາງ​ໜ້າໃຫ້ຄະ​ນະ​ກຳ​ມາ​ທິ​ການ​ເພື່ອ​ຄວາມ​ກ້າວ​ໜ້າ​ຂອງ​ແມ່​ຍິງ ແລະ ແມ່-ເດັກ ​ບັນ​ດາກະ​ຊວງ, ອົງ​ການ, ນະ​ຄອນຫຼວງ ແລະ ແຂວງ ​ເຂົ້າ​ຮ່ວມລວມ​ທັງ​ໝົດຈຳ​ນວນ 50 ຄົນ, ໂດຍໄດ້​ຮັບ​ການ​ສະ​ໜັບ​ສະ​ໜູນ​ໂດຍ​ອົງ​ການ​ United Nations Fund for Population Activities (UNFPA).

ທ່ານ ນາງ ບັນ​ດິດ ປະ​ທຸມ​ວັນ, ໄດ້​ກ່າ​ວ​ວ່າ ແຜນ​ດຳ​ເນີນ​ງານ​ແຫ່ງ​ຊາດ​ເພື່ອ​ຄວາມ​ສະ​ເໝີ​ພາບ​ຍິງ-ຊາຍ 5 ປີ​ຄັ້ງ​ທີ IV (2021-2025) ເປັນແຜນທີ່ຮັບປະກັນຄວາມສະເໝີພາບອັນແທ້ຈິງລະຫວ່າງຍິງ-ຊາຍທາງ​ດ້ານ​ສິດ​ທິ, ເງື່ອນໄຂ ແລະ ໂອກາດ, ຕອບສະໜອງຄວາມຕ້ອງການໃນການພັດທະນາ ແລະ ຜົນປະໂຫຍດອັນຊອບທໍາຂອງຍິງ ແລະ ຊາຍ, ລົບລ້າງທຸກການກະທຳທີ່ເປັນການຈຳແນກຕໍ່ຄວາມສະເໝີພາບຍິງ-ຊາຍ, ສາມາດເຊື່ອມໂຍງເຂົ້າກັບພາກພື້ນ ແລະ ສາກົນ ແລະ ສ້າງ​ຂຶ້ນ​ບົນ​ພື້ນ​ຖານ​ແນວ​ທາງ​ນະ​ໂຍ​ບາຍ​ຂອງ​ພັກ, ກົດ​ໝາຍ​ຂອງ​ລັດຖະ​ບານ ແຫ່ງ ສ​ປ​ປ​ ລາວ ແລະ ບັນ​ດາຂໍ້​ສະ​ເໜີ​ແນະ​ຂອງ​ຄະ​ນະ​ກຳ​ມະ​ການຊີ​ດໍສາ​ກົນ.

 

ທ່ານ​ ວິກ​ເຕີ ວາ​ລາ​ດີ​ເອ​ໂຊ, ຮອງ​ຜູ້​ຕາງ​ໜ້າ​ອົງ​ການ UNFPA ປະ​ຈຳ ສ​ປ​ປ ລາວ ໄດ້​ກ່າວ​ວ່າ ຂ້າ​ພະ​ເຈົ້າ​ຕີ​ລາ​ຄາ​ສູງ ທີ່ ສ​ປ​ປ ລາວ ໄດ້​ມີ​ຄວາມ​ກ້າວ​ໜ້າ​ໃນ​ການ​ຈັດ​ຕັ້ງ​ຜັນ​ຂະ​ຫຍາຍ ສົນ​ທິ​ສັນ​ຍາ​ທີ່​ກ່​ຽວ​ຂ້ອງ​ກັບ​ຄວາມ​ກ້າວ​ໜ້າ​ຂອງ​ແມ່​ຍິງ ແລະ ການ​ສົ່ງ​ເສີມ​ຄວາມ​ສະ​ເໝີ​ພາບ​ລະ​ຫວ່າງ​ຍິງ – ຊາຍ ເຂົ້າ​ໃນ​ນະ​ໂຍ​ບາຍ​ແຫ່ງ​ຊາດ​ຂອງ​ຕົນ, ລວມ​ທັງ​ກົດ​ໝາຍ​ຄວາມ​ສະ​ເໝີ​ພາບ​ລະ​ຫວ່າງຍິງ-ຊາຍ ທີ່​ໄດ້​ຖືກ​ຮັບ​ຮອງ​ໃໝ່ ແລະ ຍຸດ​ທະ​ສາດ​ແຫ່ງ​ຊາດ​ກ່ຽວ​ກັບ​ຄວາມ​ສະ​ເໝີ​ພາບລະ​ຫວ່າງ​ຍິງ​-ຊາຍ.

ໃນ​ຕອນ​ທ້າຍ​ຂອງກອງ​ປະ​ຊຸມ​ທ່ານປະທານ​ກອງ​ປະຊຸມ​ ຍັງ​ໄດ້ຮຽກ​ຮ້ອງ​ມາ​ໃຫ້​ຜູ້​ເຂົ້າ​ຮ່ວມ ຍົກສູງຄວາມຮັບຜິດຊອບຂອງຕົນ, ເປັນເຈົ້າການຕິດຕາມ, ກຳແໜ້ນເນື້ອໃນບັນດາເອກະສານ, ເຊີດຊູນ້ຳໃຈຮັບຜິດຊອບຂອງຕົນ, ສຸມທຸກສະຕິປັນຍາ ໃນການຄົ້ນຄວ້າປຶກສາຫາລື, ແລກປ່ຽນບົດຮຽນຈາກພຶດຕິກຳຕົວຈິງທີ່ຜ່ານມາໃຊ້ເວລາທີ່ມີໃຫ້ເປັນປະໂຫຍດສູງສຸດ ແລະ ຕັ້ງໜ້າເອົາໃຈໃສ່ປະກອບຄວາມຄິດຄວາມເຫັນຢ່າງກົງໄປກົງມາ ເພື່ອໃຫ້ໄດ້​ຮ່າງແຜນ​ດຳ​ເນີນ​ງານ​ແຫ່ງ​ຊາດ​ເພື່ອ​ຄວາມ​ສະ​ເໝີ​ພາບ​ຍິງ-ຊາຍ 5 ປີ​ຄັ້ງ​ທີ IV (2021-2025) ທີ່ມີຂໍ້ມູນ ແລະ ເນື້ອໃນຄົບຖ້ວນ​ສົມ​ບູນ ກະທັດຮັດ ເປັນ​ຕົ້ນ​ແມ່ນ​ບັນ​ດາ​ທິດ​ທາງ ແລະ ຕົວ​ຊີ້ບອກ​ຕ່າງໆໃຫ້​ມີ​ຄວາມ​ຊັດ​ເຈນ​ເປັນ​ເອ​ກະ​ພາບ ແລະ ​ສາ​ມາດ​ຈັດ​ຕັ້ງ​ຜັນ​ຂະ​ຫຍາຍ​ເຂົ້າ​ສູ່​ໜ້າ​ວຽກ​ຕົວ​ຈິງ​​ຂອງ​ແຕ່​ລະ​ຂະ​ແໜງ​ການໄດ້​ຢ່າງ​ມີ​ປະ​ສິດ​ທິ​ພາບ ແລະ ປະ​ສິດ​ທິ​ຜົນ. ເຊິ່ງ​ແຜນ​ດັ່ງ​ກ່າວນີ້​ແມ່ນ​ພວກ​ເຮົາຈະ​ໄດ້​ນຳ​​ເຂົ້າ​ຜ່ານ​ໃນ​ກອງ​ປະ​ຊມ​ຄົບ​ຄະ​ນະ ຄ​ຊກມດ ໃນ​ວັນ​ທີ 24 ມິ​ຖຸ​ນາ 2020 ທີ່​ຈະ​ມາ​ເຖິງນີ້.