ໃນວັນທີ 30 ສິງຫາ 2024, ທີ່ ນະຄອນຫຼວງວຽງຈັນ, ສປປ ລາວ ໃນນາມປະທານອາຊຽນໃນປີ 2024 ແລະ ໄທ ໃນນາມປະເທດປະສານງານຂອງອາຊຽນ ກ່ຽວກັບການຮ່ວມມືການພັດ ທະນາແບບຍືນຍົງ ໄດ້ຮ່ວມກັນເປັນເຈົ້າພາບຈັດກອງປະຊຸມປຶກ ສາຫາລືແນວຄວາມຄິດອາຊຽນ ວ່າດ້ວຍ ອິນໂດ-ປາຊິຟິກ: ເພື່ອກ້າວໄປສູ່ເປົ້າໝາຍການພັດທະນາແບບຍືນຍົງຂອງ ສປຊ 2030. ກອງປະຊຸມປຶກສາຫາລືຄັ້ງນີ້ ມີຄະນະຜູ້ແທນຈາກປະ ເທດທີ່ເຂົ້າຮ່ວມກອງປະຊຸມສຸດຍອດອາຊີຕາເວັນອອກ (EAS), ປະເທດຄູ່ຮ່ວມຂະແໜງການອາຊຽນ, ກອງເລຂາອາຊຽນ, ອົງ ການຈັດຕັ້ງສາກົນ ແລະ ບັນດາກະຊວງຂະແໜງການທີ່ກ່ຽວຂ້ອງຂອງ ສປປ ລາວ ເຂົ້າຮ່ວມ ປະມານ 150 ກວ່າທ່ານ.
ທ່ານ ສະເຫຼີມໄຊ ກົມມະສິດ, ຮອງນາຍົກລັດຖະມົນຕີ, ລັດ ຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ໃຫ້ກຽດກ່າວເປິດກອງປະຊຸມປຶກສາຫາລືຄັ້ງນີ້ ໂດຍໄດ້ສະແດງຄວາມຊົມ ເຊີຍຕໍ່ຂໍ້ລິເລີ່ມໃນການຈັດກອງປະຊຸມປຶກສາຫາລື, ຊື່ງເປັນໂອ ກາດອັນດີໃຫ້ແກ່ບັນດາຜູ້ເຂົ້າຮ່ວມໄດ້ແລກປ່ຽນບົດຮຽນ, ປະ ສົບການ ແລະ ຄຳຄິດຄຳເຫັນຕ່າງໆ ລວມທັງ ຂໍ້ຫຍຸ້ງຍາກ ແລະ ສິ່ງທ້າທາຍໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງຂອງ ສປຊ 2030 ໃນໄລຍະຜ່ານມາ ເພື່ອຖອດຖອນບົດຮຽນ ແລະ ຫາວິທີທາງສຶບຕໍ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງໃຫ້ບັນລຸຕາມຄາດໝາຍ ເພື່ອປະກອບສ່ວນສ້າງຄວາມເຂັ້ມແຂງ ແລະ ຄວາມສົມບູນພູນສຸກຂອງພາກ ພື້ນ.
ທ່ານ ຮອງນາຍົກລັດຖະມົນຕີ ຍັງໄດ້ກ່າວວ່າ ກອງປະຊຸມປຶກ ສາຫາລືຄັ້ງນີ້ ແມ່ນເພື່ອຜັນຂະຫຍາຍຄໍາຂວັນການເປັນປະທານອາຊຽນຂອງ ສປປ ລາວ 2024 “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງອາຊຽນ” ກໍຄືການຈັດຕັ້ງປະຕິບັດບູລິມະສິດການເປັນປະທານອາຊຽນ ແນໃສ່ເຮັດໃຫ້ອາຊຽນ ມີການເຊື່ອມໂຍງ-ເຊື່ອມຈອດກັນຫຼາຍຂຶ້ນ ແລະ ມີຄວາມເຂັ້ມແຂງ ກໍຄືການປະກອບສ່ວນໃນຄວາມພະຍາຍາມຂອງບັນດາປະເທດສະມາ ຊິກອາຊຽນ ໃນການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ 2030 ຂອງຕົນ.
ພ້ອມນີ້, ທ່ານ ນາງ ເອກສິຣິ ປິນຕາຣຸຈິ, ເຈົ້າໜ້າທີ່ອາວຸໂສອາ ຊຽນຂອງໄທ ໄດ້ຮ່ວມກ່າວເປີດກອງປະຊຸມປຶກສາຫາລື ແລະ ທ່ານ ກາວ ກິມ ຮຸນ, ເລຂາທິການໃຫຍ່ອາຊຽນ ກໍໄດ້ສົ່ງບົດຄຳເຫັນຊົມເຊີຍຂໍ້ລິເລີ່ມການຈັດກອງປະຊຸມປຶກສາຫາລືດັ່ງກ່າວນີ້.
ກອງປະຊຸມປຶກສາຫາລືຄັ້ງນີ້ ໄດ້ປຶກສາຫາລື ແລະ ແລກປ່ຽນບົດຮຽນ ໃນ 3 ຫົວຂໍ້ສຳຄັນ ຄື: 1). ການເຊື່ອມໂຍງ-ເຊື່ອມຈອດ ເພື່ອກ້າວໄປສູ່ອາຊຽນສີຂຽວ 2045; 2). ຄວາມເຂັ້ມແຂງຕໍ່ສະພາບດິນຟ້າອາກາດ ແລະ 3). ການຜະລິດ ແລະ ການບໍລິໂພກສີຂຽວ. ບັນດາຜູ້ເຂົ້າຮ່ວມໄດ້ປຶກສາຫາລື ແລະ ແລກປ່ຽນບົດຮຽນ ກ່ຽວກັບ ການພັດທະນາແບບຍືນຍົງໃນໄລຍະຜ່ານມາໃນຂົງເຂດການພັດທະນາສີຂຽວ; ການຈັດຕັ້ງປະຕິບັດການຟື້ນຟູສະພາບດິນຟ້າອາກາດ ແລະ ການຊອກຫາແນວທາງໃນຕໍ່ໜ້າ ເພື່ອເພິ່ມທະວີການຮ່ວມມືຂອງອາຊຽນ ແລະ ວິທີການທີ່ຈຳເປັນໃນການປັບຕົວເຂົ້າກັບສະພາບການປ່ຽນແປງດິນຟ້າອາກາດໃນພາກພື້ນ; ແລະ ຍຸດທະສາດ ແລະ ແຜນປະຕິ ບັດງານທີ່ດີໃນການສົ່ງເສີມການຜະລິດ ແລະ ການບໍລິໂພກສີຂຽວ ເພື່ອເປັນບົດຮຽນໃຫ້ແກ່ຜູ້ເຂົ້າຮ່ວມສຶບຕໍ່ຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ສປຊ 2030 ໃຫ້ບັນລຸຕາມແຜນການ.
