ກອງປະຊຸມປຶກສາຫາລື ຄັ້ງທີ 3 ເພື່ອຜ່ານຖະແຫຼງການຂອງຜູ້ນໍາອາຊຽນ ກ່ຽວກັບຄວາມປອດໄພ ແລະ ຄວາມໝັ້ນຄົງດ້ານຊີວະພາບ ໄດ້ຈັດຂຶ້ນໃນລະຫວ່າງວັນທີ 4-5 ມິຖຸນາ ນີ້ ທີ່ ວັງວຽງ ແຂວງວຽງຈັນ ໂດຍການເປັນປະທານຂອງ ທ່ານ ພອນປະດິດ ສັງໄຊຍະລາດ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ສປປ ລາວ, ມີຜູ້ຕາງໜ້າຈາກບັນດາປະເທດສະມາຊິກອາຊຽນ, ເຈົ້າໜ້າທີ່ອາວຸໂສດ້ານສາທາລະນະສຸກ ອາຊຽນ (SOMHD), ເຈົ້າໜ້າທີ່ຮັບຜິດຊອບດ້ານຄວາມປອດໄພ ແລະ ຄວາມໝັ້ນຄົງດ້ານຊີວະພາບ, ຄູ່ຮ່ວມພັດທະນາສາກົນ ກ່ຽວຂ້ອງເຂົ້າຮ່ວມ.
ກອງປະຊຸມດັ່ງກ່າວນີ້, ໄດ້ຜ່ານການຈັດຕັ້ງມາແລ້ວ 2 ຄັ້ງ ຖືໄດ້ວ່າໄດ້ຮັບໝາກຜົນຕາມເປົ້າໝາຍທີ່ຕັ້ງໄວ້, ກອງປະຊຸມຄັ້ງນີ້, ເປັນຄັ້ງທີ 3 ຫຼື ຄັ້ງສຸດທ້າຍທີ່ຈະມີການປຶກສາຫາລື ຜ່ານຖະແຫຼງການດັ່ງກ່າວ ທີ່ມີຄວາມສໍາຄັນຫຼາຍ ເນື່ອງຈາກເປັນບາດກ້າວທີ່ສຳຄັນໃນການເສີມສ້າງຄວາມປອດໄພ ດ້ານສຸຂະພາບ ແລະ ຄວາມສາມາດຟື້ນຟູໃນພາກພື້ນອາຊຽນ. ຫຼັງຈາກຖະແຫຼງການສະບັບນີ້ຖືກຮັບຮອງແຜນງານຫຼຸດຜ່ອນໄພຂົ່ມຂູ່ ດ້ານຊີວະພາບ ຈະແນໃສ່ປົກປ້ອງສຸຂະພາບຂອງປະຊາຊົນ ຢ່າງມີປະສິດທິພາບ ແລະ ເໝາະສົມ ໂດຍຜ່ານການຮ່ວມມື ແລະ ການວາງແຜນຍຸດທະສາດຮ່ວມກັນ. ພ້ອມນັ້ນ, ກອງປະຊຸມຄັ້ງນີ້, ຍັງໄດ້ມີການປຶກສາຫາລືວາງແຜນ, ສ້າງແຜນງານຈັດຕັ້ງປະຕິບັດກິດຈະກໍາຕ່າງໆທີ່ກ່ຽວຂ້ອງ ໂດຍແຜນງານດັ່ງກ່າວ ທີ່ນອນໃນຂະແໜງການສຸຂະພາບຂອງສະມາຄົມອາຊຽນ ແລະ ຈະຈັດຢູ່ໃນແຜນຍຸດທະສາດສາທາລະນະສຸກ ສະມາຄົມອາຊຽນ 2026–2030. ໃນນັ້ນ, ການສ້າງຖະແຫຼງການທີ່ມີການຮ່ວມມືຫຼາຍໜ່ວຍງານ ຈະຊ່ວຍໃຫ້ແຜນຍຸດທະສາດມີຫຼາຍຂະແໜງການເຂົ້າຮ່ວມໃນການປ້ອງກັນ, ກວດກາ ແລະ ໂຕ້ຕອບຕໍ່ໄພຂົ່ມຂູ່ດ້ານຊີວະພາບໃນອະນາຄົດ.
(ຂ່າວ: ວັນເພັງ, ຂໍ້ມູນ, ພາບ: ສູນສະຖິຕິ ແລະ ຂ່າວສານສາທາລະນະສຸກ)
