ໃນວັນທີ 19 ມັງກອນ 2023, ທີ່ແຂວງ ຊຽງຂວາງ, ກົມເສດຖະກິດ, ກະຊວງການຕ່າງປະເທດ ໄດ້ຈັດກອງປະຊຸມ ‘‘ເວທີປຶກສາຫາລືແລກປ່ຽນບົດຮຽນດ້ານການສົ່ງເສີມ ແລະ ອໍານວຍຄວາມສະ ດວກດ້ານການຄ້າ ໃຫ້ແກ່ປະເທດແມ່ນໍ້າຂອງ-ແມ່ນໍ້າລ້ານຊ້າງ’’, ໂດຍການເປັນປະທານຮ່ວມຂອງທ່ານ ທອງຜ່ານ ສະ ຫວັນເພັດ, ຮອງລັດຖະມົນຕີກະຊວງການຕ່າງປະເທດ ແລະ ທ່ານ ບຸນໂຮມ ເທດທານີ, ຮອງເລຂາພັກເເຂວງ, ປະ ທານສະພາປະຊາຊົນເເຂວງຊຽງຂວາງ. ກອງປະຊຸມຄັ້ງນີ້ເປັນຫນຶ່ງໃນກິດຈະກໍາຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ເຊິ່ງມີຜູ້ຕາງໜ້າຈາກບັນດາກົມພາຍໃນກະຊວງການຕ່າງປະເທດ, ບັນດາຂະແໜງການທີ່ກ່ຽວຂ້ອງຈາກສູນກາງ ແລະ 8 ແຂວງພາກເໜືອຂອງ ສປປ ລາວ ເຂົ້າຮ່ວມຄື: ແຂວງຊຽງຂວາງ, ຫົວພັນ, ໄຊຍະບູລີ, ຫຼວງພະບາງ, ອຸດົມໄຊ, ຫຼວງນໍ້າທາ, ບໍ່ແກ້ວ ແລະ ຜົ້ງສາລີ.
ຈຸດປະສົງຂອງກອງປະຊຸມສໍາມະນາໃນຄັ້ງນີ້ ແມ່ນເພື່ອປຶກສາຫາລື ແລະ ແລກ ປ່ຽນບົດຮຽນ ທີ່ກ່ຽວຂ້ອງຕ່າງໆແນໃສ່ເພື່ອສ້າງສະພາບແວດລ້ອມທີ່ດີ່ ແລະ ວາງທິດທາງໃນການແກ້ໄຂຂໍ້ຫຍຸ້ງຍາກຕ່າງໆຂອງວຽກງານການຄ້າ ແລະ ການລົງທຶນທັງຂອງ ສປປ ລາວ ກັບພາກພື້ນ ແລະ ສາກົນເພື່ອສົ່ງເສີມການຮ່ວມມືໃນຂອບດັ່ງກ່າວ ໂດຍສະເພາະ ໃນຂອບການຮ່ວມມືກັບບັນດາປະເທດແມ່ນໍ້າຂອງ-ແມ່ນໍ້າລ້ານຊ້າງ. ພ້ອມດຽວກັນນີ້, ກອງປະຊຸມ ຍັງໄດ້ແລກປ່ຽນຂໍ້ມູນຂ່າວສານ ແຜນງານວຽກງານອໍານວຍຄວາມສະດວກທາງດ້ານການຄ້າ ເພື່ອຊອກຫາວິທີທາງແກ້ໄຂຊ່ອງວ່າງທີ່ຍັງເຮັດບໍ່ໄດ້ດີເທົ່າທີ່ຄວນ ເປັນຕົ້ນ: ຂອດການປະສານງານລະຫວ່າງຂະແໜງການພາກລັດດ້ວຍກັນ, ການປະສານງານກັບບັນດາຂະແໜງການທີ່ກ່ຽວຂ້ອງ, ການປະສານງານລະຫວ່າງຂະແໜງການຂອງລັດກັບກັບພາກທຸລະກິດ, ຫຼຸດຜ່ອນຂອດທີ່ບໍ່ຈໍາເປັນ ໃນການເຮັດທຸລະກໍາທາງການຄ້າເພື່ອເຮັດວຽກງານການຄ້າມີຄວາມສະດວກ ແລະ ວ່ອງໄວຂຶ້ນກ່ວາເກົ່າ.
ກອງປະຊຸມຄັ້ງນີ້ໄດ້ດໍາເນີນໄປດ້ວຍບັນຍາກາດອັນດີ ແລະ ສ້າງສັນ, ບັນດາວິທະຍາກອນ ແລະ ສໍາມະນາກອນຈາກຂະແໜງການກ່ຽວຂ້ອງໄດ້ມີການຂຶ້ນບັນຍາຍແລກປ່ຽນບົດຮຽນ ແລະ ປະສົບການຕົວຈິງຢ່າງຕັ້ງໜ້າກ່ຽວກັບ ການຈັດຕັ້ງປະຕິບັດວຽກງານອໍານວຍຄວາມສະດວກດ້ານການຄ້າ, ພ້ອມທັງຕີລາຄາຄືນ ຂໍ້ສະດວກ, ຂໍ້ຫຍຸ້ງຍາກ ແລະ ຂໍ້ສະເໜີໃນການແກ້ໄຂບັນຫາຄົງຄ້າງໃນການຈັດຕັ້ງປະຕິບັດວຽກງານ ດັ່ງກ່າວເພື່ອເປັນທິດທາງໃຫ້ແກ່ການຮ່ວມມືໃນຕໍ່ໜ້າ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ