ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ໃນວັນທີ 25 ທັນວາ 2023, ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ໄດ້ນໍາພາຄະນະຜູ້ແທນລາວເຂົ້າຮ່ວມກອງປະຊຸມຜູ້ນຳຂອບການຮ່ວມມືແມ່ນ້ໍາຂອງ-ແມ່ນໍ້າລ້ານຊ້າງ ຄັ້ງທີ 4 ພາຍໃຕ້ຫົວຂໍ້:​ ຮ່ວມມືກັນເພື່ອສ້າງຄູ່ຮ່ວມຊະຕາກຳ ແລະ ຄວາມທັນສະໄໝ ລະຫວ່າງປະເທດແມ່ນ້ຳຂອງ-ແມ່ນ້ຳລ້ານຊ້າງ (Join Hands on the Building of a Community of Shared Future and Modernization among Mekong-Lancang Countries) ໃນຮູບແບບກອງປະຊຸມທາງໄກ ໂດຍການເປັນປະທານຮ່ວມຂອງ ພະນະທ່ານ ລີ ສຽງ, ນາຍົກລັດຖະມົນຕີ ແຫ່ງ ສາທາລະນະລັດ ປະຊາຊົນຈີນ ແລະ ພະນະທ່ານ ມິ່ງອ່ອງລາຍ, ພົນເອກອາວຸໂສ, ນາຍົກລັດຖະມົນຕີ ສສ.ມຽນມາ ແລະ ໄດ້ມີບັນດາທ່ານນາຍົກລັດຖະມົນຕີ ຈາກບັນດາປະເທດສະມາຊິກແມ່ນໍ້າຂອງ-ແມ່ນໍ້າລ້ານຊ້າງ ເຂົ້າຮ່ວມຢ່າງພ້ອມພຽງ.
ກອງປະຊຸມຄັ້ງນີ້, ໄດ້ຕີລາຄາສູງຕໍ່ບັນດາຜົນສຳເລັດ ພາຍໃຕ້ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງໃນໄລຍະ 7 ປີຜານມາ ໂດຍສະເພາະໝາກຜົນຂອງການຈັດຕັ້ງຜັນຂະຫຍາຍຄວາມໝາຍໝັ້ນຂອງບັນດາຖະແຫຼງ ການຂອງກອງປະຊຸມຜູ້ນໍາ ແມ່ນໍ້າຂອງ-ແມ່ນໍ້າລ້ານຊ້າງ ໃນ 3 ຄັ້ງຜ່ານມາ ແລະ ແຜນປະຕິບັດງານ 5 ປີ (2018-2022) ໂດຍຜ່ານບັນດາແຜນງານ ແລະ ໂຄງການ ພາຍໃຕ້ 3 ເສົາຄໍ້າ ແລະ 5 ຂົງເຂດບູລິມະສິດ ຂອງຂອບການຮ່ວມມື ເຊິ່ງໄດ້ຮັບການຈັດຕັ້ງປະຕິບັດໃນບັນດາປະເທດແມ່ນໍ້າຂອງ ລວມທັງ ສປປ ລາວ ຢ່າງມີປະສິດທິພາບເປັນຕົ້ນແມ່ນ ບັນດາໂຄງການທີ່ໄດ້ຮັບການສະໜັບສະໜູນຈາກກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ ແລະ ໂຄງການເຫັນຜົນໄວ ໂດຍປະກອບມີ ບັນດາໂຄງການພັດທະນາພື້ນຖານໂຄງລ່າງ ແລະ ສ້າງຂີດຄວາມອາດສາມາດໃນດ້ານຕ່າງໆ ເພື່ອຮັບປະກັນໃຫ້ແກ່ການພັດທະນາແບບຍືນຍົງ. ພ້ອມນີ້, ບັນດາຜູ້ນຳກໍໄດ້ຮ່ວມກັນວາງທິດທາງການຮ່ວມມືໃນຕໍ່ໜ້າ ໂດຍເນັ້ນໃສ່ການຮ່ວມມືເພື່ອເສີມຂະຫຍາຍການ ເຊື່ອມໂຍງເສດຖະກິດ ແລະ ການເຊື່ອມຈອດພາກພື້ນ, ການຫັນເປັນທັນສະໄໝໃນທຸກຂະແໜງການ, ການພັດທະນາແບບຍືນຍົງຕາມທິດສີຂຽວ, ຍົກສູງການຮ່ວມມືດ້ານການທ່ອງທ່ຽວ, ແລກປ່ຽນວັດທະນະທຳ ແລະ ການປ້ອງກັນ-ຮັບມື ກັບສິ່ງທ້າທາຍດ້ານຄວາມໝັ້ນຄົງທີ່ບໍ່ແມ່ນການທະຫານ (Non-traditional Security Challenge). ກອງປະຊຸມ ໄດ້ຮັບຮອງເອົາເອກະສານສຳຄັນ ຈຳນວນ 03 ສະບັບ ຄື: (1). ແຜນປະຕິບັດງານຂອບການຮ່ວມມື MLC ໄລຍະ 5 ປີ (2023-2027); (2). ຖະແຫຼງການເນປີດໍຂອງກອງປະຊຸມຜູ້ນຳ MLC ຄັ້ງທີ 4 ແລະ (3). ຖະແຫຼງການວ່າດ້ວຍຂໍ້ລິເລີ່ມສ້າງແລວ ນະວັດຕະກຳຂອບການຮ່ວມມື MLC ເພື່ອເປັນທິດທາງໃນການຮ່ວມມືໃຫ້ເປັນຮູບປະທຳຂຶ້ນເທ່ືອລະບາດກ້າວໃນຕໍ່ໜ້າ.
ໃນໂອກາດດັ່ງກ່າວ, ພະນະທ່ານ ສອນໄຊ ສີພັນດອນ, ນາຍົກລັດຖະມົນຕີ ແຫ່ງ ສປປ ລາວ ກໍໄດ້ສະແດງຄວາມຊົມເຊີຍຕໍ່ຜົນສຳເລັດຂອງການປະຕິບັດໜ້າທີ່ໃນການເປັນປະທານຮ່ວມຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຂອງ ສປ ຈີນ ແລະ ສສ.ມຽນມາ ໃນໄລຍະຊຸມປີຜ່ານມາ. ພ້ອມດຽວກັນ, ກໍໄດ້ສະແດງຄວາມຂອບໃຈ ສປ ຈີນ ທີ່ໄດ້ປະກອບສ່ວນຊ່ວຍເຫຼືອດ້ານທຶນຮອນ ຈຳນວນ 300 ລ້ານໂດລາສະຫະລັດ ເຂົ້າໃນກອງທຶນພິເສດແມ່ນໍ້າຂອງ-ແມ່ນໍ້າລ້ານຊ້າງ, ລວມທັງ ບັນດາທຶນຝຶກອົບຮົມ ແລະ ທຶນການສຶກສາຈຳນວນຫຼາຍ. ສປປ ລາວ ໄດ້ຕີລາຄາສູງຕໍ່ໝາກຜົນຂອງການຮ່ວມມືດັ່ງກ່າວ ແລະ ໄດ້ສະເໜີທັດສະນະ ເພື່ອຮັດແໜ້ນ ແລະ ເພີ່ມທະວີການຮ່ວມມື ເຂົ້າໃນການຮ່ວມກັນສ້າງສະພາບແວດລ້ອມແຫ່ງສັນຕິພາບ, ສະຖຽນລະພາບ ແລະ ຄວາມຈະເລີນຮຸ່ງເຮືອງໃນພາກພື້ນແມ່ນໍ້າຂອງ-ແມ່ນໍ້າລ້ານຊ້າງ.
ຂອບການຮ່ວມມືແມ່ນໍ້າຂອງ-ແມນໍ້າລ້ານຊ້າງ ໄດ້ຮັບການສ້າງຕັ້ງຂຶ້ນ ໃນວັນທີ 23 ມີນາ 2016 ໂດຍມີປະເທດສະມາຊິກທັງໝົດ 6 ປະເທດ ຄື: ກຳປູເຈຍ, ສປປ ລາວ, ສສ. ມຽນມາ, ໄທ, ຫວຽດນາມ ແລະ ສປ ຈີນ ເຊິ່ງມີເປົ້າໝາຍເພື່ອສືບຕໍ່ຮັກສາສັນຕິພາບ ແລະ ສະຖຽນລະພາບ, ພັດທະນາເປັນປະເທດເພື່ອນບ້ານທີ່ດີ, ດຳເນີນການຮ່ວມມືຢ່າງເປັນຮູບປະທຳ ແລະ ສົ່ງເສີມການພັດທະນາແບບຍືນຍົງ ໃຫ້ມີຜົນປະໂຫຍດຮ່ວມກັນ ແລະ ສ່ອງແສງໃຫ້ເຫັນຄວາມມຸ່ງມາດປາດຖະໜາຂອງບັນດາປະເທດໃນອານຸພາກພື້ນ.
ກອງປະຊຸມຄັ້ງນີ້, ຍັງໄດ້ມີການມອບ-ຮັບໜ້າທີ່ການເປັນປະທານຮ່ວມຂອງຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ຈາກ ສສ.ມຽນມາ ໃຫ້ແກ່ ຣາຊະອານາຈັກໄທ ເພື່ອເປັນປະທານຮ່ວມກັບ ສປ ຈີນ ໃນຕໍ່ໜ້າ.
ຂ່າວ;ພາບ: ກົມການຂ່າວ ກະຊວງການຕ່າງປະເທດ