ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມພົບປະພະນັກງານບຳນານ ແລະ ພະນັກງານຫຼັກແຫຼ່ງຂອງກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ.

ກອງປະຊຸມພົບປະແລກປ່ຽນບົດຮຽນປະສົບການພະນັກງານປະຕິວັດອາວຸໂສບໍານານ ແລະ ພະນັກງານຫຼັກແຫຼ່ງໃນການກໍ່ສ້າງພະນັກງານສືບທອດ ແລະ ລະບົບກົງຈັກການຈັດຕັ້ງຕ່າງໆໃນຂົງເຂດວຽກງານຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ຈັດຂຶ້ນໃນຕອນບ່າຍ ວັນທີ 09 ຕຸລາ 2020 ທີ່ ຫໍວັດທະນະທໍາແຫ່ງຊາດ ນະຄອນຫຼວງວຽງຈັນ. ໂດຍການເປັນປະທານຂອງ ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ, ມີບັນດາຮອງລັດຖະມົນຕີ, ພະນັກງານອາວຸໂສບໍານານ, ພະນັກງານຫຼັກແຫຼ່ງຂອງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ແລະ ແຂກຮັບເຊີນເຂົ້າຮ່ວມ.
ທ່ານ ກິແກ້ວ ໄຂຄໍາພິທູນ ລັດຖະມົນຕີກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ມີຄໍາເຫັນວ່າ: ພະນັກງານສືບທອດແມ່ນມີບົດບາດສໍາຄັນ ໃນການກໍ່ສ້າງພັກ ຍ້ອນແນວນັ້ນ ພັກຍາມໃດກໍ່ໄດ້ເອົາໃຈໃສ່ ບໍາລຸງກໍ່ສ້າງພະນັກງານ ລວມທັງພະນັກງານສືບທອດຢ່າງສະເໝີຕົ້ນສະເໝີປາຍ ໂດຍສະເພາະ ການເຊື່ອມຊຶມກໍາແໜ້ນທັດສະນະຂອງພັກກ່ຽວກັບວຽກງານພະນັກງານ ແລະ ພະນັກງານສືບທອດ ເພາະວ່າ ພັກຖືເອົາພະນັກງານເປັນກົກສາມາດຕັດສິນຜົນໄດ້ຜົນເສຍຂອງຂອດການປະຕິບັດແນວທາງນະໂຍບາຍຂອງພັກຢູ່ໃນວຽກງານຍົກສູງບົດບາດການນໍາພາຂອງພັກ.
ໃນກອງປະຊຸມຄັ້ງນີ້, ບັນດາຜູ້ເຂົ້າຮ່ວມ ໂດຍສະເພາະ ພະນັກງານປະຕິວັດອາວຸໂສບໍານານຈໍານວນໜຶ່ງໄດ້ຜັດປ່ຽນກັນປະກອບຄໍາເຫັນທີ່ມີລັກສະນະສ້າງສັນ ໂດຍໄດ້ທົບທວນຄືນບາງວຽກງານທີ່ສໍາຄັນທີ່ເປັນຜົນງານອັນດີ ແລະ ສະເໜີແນະນຳກ່ຽວກັບການກໍ່ສ້າງພະນັກງານສືບທອດ ລວມທັງປັບປຸງໂຄງສ້າງການຈັດຕັ້ງໃນອະນາຄົດໃຫ້ຮັບປະກັນໄດ້ພາລະກໍາປະຕິວັດໃນຕໍ່ໜ້າ ເຊິ່ງແມ່ນປັດໄຈຕັດສິນທຸກວຽກງານຈຶ່ງຕ້ອງການບຸກຄະລາກອນທີ່ມີຄວາມຮູ້ຄວາມສາມາດ ແລະ ມີຄວາມກ້າວໜ້າທັນຍຸກສະໄໝ.ໂອກາດດຽວກັນນີ້, ປະທານກອງປະຊຸມຍັງໄດ້ມີຄໍາເຫັນໂອ້ລົມພ້ອມທັງໃຫ້ທິດຊີ້ນໍາແກ່ພະນັກງານສືບທອດຈົ່ງນໍາເອົາບົດຮຽນ ແລະ ປະສົບການດັ່ງກ່າວທີ່ເປັນປະໂຫຍດມາຈັດຕັ້ງຜັນຂະຫຍາຍ ແລະ ພັດທະນາເຂົ້າໃນວຽກງານຕົວຈິງຂອງຕົນໃຫ້ມີປະສິດທິຜົນກວ່າເກົ່າ.

  

ຂ່າວ: ບັນລັງທອງ ກຽງຄຳຊົນນີ