ກອງປະຊຸມພົບປະສອງຝ່າຍ ປະຈໍາປີ 2022 ລະຫວ່າງກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ຈັດຂຶ້ນໃນວັນທີ 24 ສິງຫາ 2022 ທີ່ນະຄອນຫຼວງວຽງຈັນ ສປປ ລາວ, ເປັນປະທານໂດຍ ສະຫາຍ ພົນເອກ ວິໄລ ຫຼ້າຄໍາຟອງ ກໍາມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ສະຫາຍ ພົນເອກ ສຈ.ປອ ໂຕ ເລິມ ກໍາມະການກົມການເມືອງສູນກາງພັກຄອມມູນິດຫວຽດນາມ ລັດຖະມົນຕີກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ, ມີຄະນະນໍາຂັ້ນສູງ, ພະນັກງານກ່ຽວຂ້ອງ ສອງກະຊວງປ້ອງກັນຄວາມສະຫງົບ ເຂົ້າຮ່ວມ.
ສະຫາຍ ພົນເອກ ວິໄລ ຫຼ້າຄຳຟອງ ກ່າວຄຳເຫັນຕໍ່ກອງປະຊຸມວ່າ: ກອງປະຊຸມພົບປະສອງຝ່າຍ ລະຫວ່າງ ກະຊວງປ້ອງກັນຄວາມສະຫງົບ ແຫ່ງ ສປປ ລາວ ແລະ ກະຊວງປ້ອງກັນຄວາມສະຫງົບ ແຫ່ງ ສສ ຫວຽດນາມ ຄັ້ງນີ້ ຈະເປັນຂີດໝາຍໃໝ່ໃນການສືບຕໍ່ຈັດຕັ້ງຜັນຂະຫຍາຍເນື້ອໃນສັນຍາການຮ່ວມມືຮອບດ້ານຕ່າງໆລະຫວ່າງສອງພັກ, ສອງລັດຖະບານ ໂດຍສະເພາະແມ່ນລະຫວ່າງສອງກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງປ້ອງກັນຄວາມສະຫງົບ ສສ ຫວຽດນາມ ໃນການຮ່ວມກັນຜັນຂະຫຍາຍສັນຍາຮ່ວມມືປະຈໍາປີ, ຮ່ວມກັນເສີມສ້າງມູນເຊື້ອສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານໃຫ້ນັບມື້ແໜ້ນແຟ້ນ ແລະ ກ້າວສູ່ລວງເລິກຍິ່ງຂຶ້ນ.
ຄຽງຄູ່ກັນນີ້, ກອງປະຊຸມພົບປະສອງຝ່າຍຄັ້ງນີ້, ແມ່ນຈັດຂຶ້ນໃນບັນຍາກາດທີ່ສອງຊາດ ລາວ-ຫວຽດນາມ ພວມສຸມໃສ່ຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນ ປະຕິວັດລາວ ແລະ ມະຕິກອງປະຊຸມໃຫຍ່ ຄັ້ງທີ XIII ຂອງພັກຄອມມູນິດ ສສ ຫວຽດນາມ ແລະ ປີນີ້ຍັງແມ່ນປີທີ່ມີຄວາມໝາຍສໍາຄັນ ເພາະຢູ່ໃນປີທີ່ສອງພັກ, ສອງລັດ, ປະຊາຊົນສອງຊາດລາວ-ຫວຽດນາມ ໄດ້ຈັດຕັ້ງຂະບວນກ ານເພື່ອຂໍ່ານັບຮັບຕ້ອນ ແລະ ສະເຫຼີມສະຫຼອງວັນປະວັດສາດ ສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະ ວັນເຊັນສົນທິ ສັນຍາມິດຕະພາບ ຄົບຮອບ 45 ປີ.
ກໍາລັງປ້ອງກັນຄວາມສະຫງົບປະຊາຊົນລາວເວລາໃດກໍຕີລາຄາສູງຕໍ່ຜົນງານ ແລະ ໄຊຊະນະຂອງກໍາລັງຕໍາຫຼວດປະ ຊາຊົນຫວຽດນາມ ໃນການສືບຕໍ່ພາລະ ກິດປົກປັກຮັກສາ ແລະ ສ້າງສາພັດທະນາປະເທດຊາດ, ປະກອບສ່ວນຮັບປະກັນສະຖຽນລະພາບທາງດ້ານການເມືອງ ແລະ ຄວາມເປັນລະບຽບຮຽບຮ້ອຍທາງດ້ານສັງຄົມ ເຊິ່ງເຮັດໃຫ້ເສດຖະກິດຂະ ຫຍາຍຕົວຢ່າງຕໍ່ເນື່ອງ, ບົດບາດອິດທິພົນຂອງ ສສ ຫວຽດນາມ ເປັນຕົ້ນແມ່ນຂອງກໍາລັງປ້ອງກັນຄວາມສະຫງົບຫວຽດນາມ ນັບມື້ໂດດເດັ່ນຂຶ້ນໃນເວທີພາກພື້ນ ແລະ ສາກົນ.
ສໍາລັບການປະຕິບັດແຜນການຮ່ວມມືປະຈໍາປີ 2022 ລະຫວ່າງກະຊວງປ້ອງກັນຄວາມສະຫງົບ ສປປ ລາວ ແລະ ກະຊວງປ້ອງກັນຄວາມສະຫງົບ ສສ ຫວຽດນາມ ແມ່ນຈະສືບຕໍ່ຮ່ວມມືກັນຕາມຂົງເຂດວຽກງານທີ່ໄດ້ພົວພັນຮ່ວມມືກັນຜ່ານມາ ໂດຍສະເພາະແມ່ນການປະສານສົມທົບ, ສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນການຮັບປະກັນຄວາມສະຫງົບ, ຄວາມເປັນລະບຽບຮຽບຮ້ອບຂອງບັນດາເຫດການການເມືອງ, ການຕ່າງປະເທດ ເຊັ່ນ: ເພີ່ມທະວີການຮ່ວມມືປະສານສົມທົບກັນໃຫ້ແໜ້ນແຟ້ນໃນການຕ້ານບັນດາອາຊະຍາກໍາ; ສືບຕໍ່ປະສານສົມທົບຕອບຕ້ານ ການເຄື່ອນໄຫວຂອງກຸ່ມຄົນບໍ່ດີ, ອິດທິກໍາລັງປໍລະປັກທີ່ໃສ່ຮ້າຍປ້າຍສີ, ແບ່ງແຍກຄວາມສາມັກຄີລະຫວ່າງສອງປະເທດເຮົາ; ສືບຕໍ່ວຽກງານກໍ່ສ້າງກໍາລັງກະຊວງປ້ອງກັນຄວາມສະຫງົບ ສປປ ລາວໃຫ້ກາຍເປັນກໍາລັງທີ່ເຂັ້ມແຂງ; ສືບຕໍ່ຫາລືເນື້ອໃນສົນທິສັນຍາ ວ່າດ້ວຍການປົກປ້ອງ ແລະ ຮັກສາຂໍ້ມູນສຳຄັນ, ຊຸກຍູ້ປະສານກັບພາກສ່ວນກ່ຽວຂ້ອງ ເພື່ອໄດ້ລົງນາມສົນທິສັນຍາວ່າດ້ວຍການໂອນຕົວຜູ້ຮ້າຍຂ້າມແດນ ລະຫວ່າງ ສປປ ລາວ ແລະ ສສ ຫວຽດນາມ; ສືບຕໍ່ຈັດຕັ້ງປະຕິບັດໂຄງການກໍ່ສ້າງຫ້ອງການປະສານງານ ປກສ ບ້ານ, ໂຄງການກໍ່ສ້າງວິທະຍາຄານການເມືອງປ້ອງກັນຄວາມສະຫງົບ ປະຊາຊົນລາວ ແລະ ໂຄງການກໍ່ສ້າງສູນຂໍ້ມູນພົນລະເມືອງ; ສືບຕໍ່ປະສານສົມທົບກົມກຽວກັບແຜນການເຄື່ອນໄຫວກິດຈະກໍາປີສາມັກຄີມິດ ຕະພາບ ລາວ-ຫວຽດນາມໃຫ້ເຕີບໃຫຍ່ຂຶ້ນໄປເລື່ອຍໆ.
ຂ່າວ : ພູເງິນ
ພາບ : ອະພິນຍາ
Loading...