ໃນຕອນຄໍ່າຂອງວັນທີ 3 ຕຸລາ 2022, ທີ່ ໂຮງແຮມແລນມາກ, ໄດ້ມີກອງປະຊຸມພົບປະ ລະຫວ່າງ ບັນດາກະຊວງກ່ຽວຂ້ອງຂອງ ສປປ ລາວ ແລະ ສ. ກູບາ, ໂດຍການເປັນປະທານຮ່ວມຂອງສະຫາຍ ຄໍາເຈນ ວົງໂພສີ, ລັດຖະມົນຕີກະຊວງແຜນການ ແລະ ການລົງທຶນ ແຫ່ງ ສປປ ລາວ ແລະ ສະຫາຍ Rodrigo Malmierca Díaz , ລັດຖະມົນຕີການຄ້າ ແລະ ການລົງທຶນຕ່າງປະເທດ ແຫ່ງ ສ. ກູບາ, ພ້ອມນີ້ຍັງມີບັນດາສະຫາຍລັດຖະມົນຕີ, ຮອງລັດຖະມົນຕີ ແລະ ພາກສ່ວນກ່ຽວຂ້ອງຂອງສອງຝ່າຍ ເຂົ້າຮ່ວມ. ການພົບປະຄັ້ງນີ້ ຈັດຂຶ້ນໃນທ່າມກາງບັນຍາກາດອັນດີທີ່ເຕັມໄປດ້ວຍໄມຕິຈິດມິດຕະພາບ ແລະ ມີຄວາມໝາຍສໍາຄັນປະຫວັດສາດໃນໂອກາດທີ່ສະຫາຍ ມານູເອັນ ມາເຣໂຣ ກຣູຊ໌ (Manuel Marrero Cruz), ນາຍົກລັດຖະມົນຕີ ແຫ່ງ ສາທາລະນະລັດ ກູບາ ພ້ອມດ້ວຍຄະນະເດີນທາງມາຢ້ຽມຢາມ ສປປ ລາວ ຢ່າງເປັນທາງການໃນວັນທີ 02-04 ຕຸລາ 2022.
ໃນໂອກາດນີ້, ສອງຝ່າຍ ໄດ້ປຶກສາຫາລື ແລະ ແລກປ່ຽນຄໍາຄິດເຫັນນໍາກັນ ຢ່າງກົງໄປກົງມາ ໃນຫຼາຍຂົງເຂດການຮ່ວມມືຂອງສອງປະເທດ ເປັນຕົ້ນວຽກງານການຮ່ວມມືໃນຂົງເຂດການຄ້າ, ການລົງທຶນ, ການສຶກສາ ແລະ ກິລາ, ກະສິກາ-ປ່າໄມ້ ແລະ ຂົງເຂດກ່ຽວຂ້ອງອື່ນໆ. ການພົບປະ ລະຫວ່າງ ກະຊວງກ່ຽວຂ້ອງ ລາວ-ກູບາ ໃນຄັ້ງນີ້ ແມ່ນຜັນຂະຫຍາຍຜົນຂອງການພົບປະ ລະຫວ່າງ ສອງນາຍົກລັດຖະມົນຕີ ລາວ-ກູບາ ໃນວັນທີ 2 ຕຸລາ 2022 ຜ່ານມາ, ສິ່ງສໍາຄັນແມ່ນລົງເລິກແລກປ່ຽນບົດຮຽນຕົວຈິງ ແລະ ວິທີການຈັດຕັ້ງປະຕິບັດທິດຊີ້ນໍາຕ່າງໆ ເພື່ອຈັດຕັ້ງປະຕິບັດ ແລະ ຜັນຂະຫຍາຍບັນດາເນື້ອໃນຈິດໃຈ ທີ່ສອງຝ່າຍໄດ້ຕົກລົງຮ່ວມກັນແລ້ວນັ້ນໃຫ້ເກີດດອກອອກຜົນຕົວຈິງຍິ່ງຂຶ້ນ ເພື່ອນໍາເອົາຜົນປະໂຫຍດຕົວຈິງມາສູ່ ສອງພັກ, ສອງລັດ ແລະ ປະຊາຊົນສອງຊາດ ລາວ-ກູບາ. ນອກຈາກນັ້ນ, ການພົບປະຄັ້ງນີ້ ຍັງເປັນໂອກາດອັນດີໃຫ້ແກ່ພາກສ່ວນກ່ຽວຂ້ອງຂອງສອງປະເທດ ສືບຕໍ່ເສີມຂະຫຍາຍການຮ່ວມມືສອງຝ່າຍ, ຊຶ່ງຍັງມີບາງຈຸດຈະຕ້ອງໄດ້ປັບປຸງໃຫ້ສອດຄ່ອງຕາມສະພາບຕົວຈິງ ແລະ ປຶກສາຫາລືທິດທາງການຮ່ວມມືໃນຕໍ່ໜ້າ ໃຫ້ນັບມື້ມີຄວາມເຂັ້ມແຂງ ແລະໄດ້ຮັບການເສີມຂະຫຍາຍເຂົ້າສູ່ລວງເລິກເປັນກ້າວໆ.
