ສະຫງວນລິຂະສິດ © ສະຖານີ ວິທະຍຸກະຈາຍສຽງແຫ່ງຊາດລາວ

ວິທະຍຸກະຈາຍສຽງແຫ່ງຊາດລາວ

Lao National Radio

ຊົມເຊີຍ ວັນສ້າງຕັ້ງວິທະຍຸກະຈາຍສຽງແຫ່ງຊາດລາວ ຄົບຮອບ 60 ປີ
(13 ສິງຫາ 1960-13 ສິງຫາ 2020) ຢ່າງສຸດໃຈ

ກອງປະຊຸມລັດຖະບານເປີດກ້ວາງ ຄັ້ງທີ 2 ປີ 2019 ໄຂຂື້ນຢ່າງເປັນທາງການໃນ​ວັນທີ​19 ທັນວາ​ 2019

ກອງປະຊຸມລັດຖະບານເປີດກ້ວາງ ຄັ້ງທີ 2 ປີ 2019 ໄຂຂື້ນຢ່າງເປັນທາງການໃນ​ວັນທີ​19 ທັນວາ​ 2019, ທີ່ຫໍປະ​ຊຸມແຫ່ງຊາດ ນະຄອນຫລວງວຽງຈັນ ພາຍໃຕ້ການເປັນປະທານຂອງທ່ານ ທອງລຸນ ສີສຸລິດ, ນາຍົກລັດຖະມົນຕີ
ໂດຍທ່ານຊີ້ໃຫ້ເຫັນວ່າ: ກອງປະຊຸມລັດຖະບານເປີດກວ້າງ​ ຄັ້ງນີ້ ດໍາເນີນໃນຊ່ວງເວລາທີ່ສະພາບການຂອງພາກພື້ນ ແລະ ສາກົນ ສືບຕໍ່ມີຄວາມສັບສົນ ແລະ ມີຜົນກະທົບຕໍ່ປະເທດເຮົາ. ສໍາລັບຢູ່ປະເທດເຮົາເຖິງວ່າການຈັດຕັ້ງປະ​ຕິບັດແຜນພັດທະນາເສດຖະກິດ-ສັງຄົມ ຈະມີຄວາມຄືບໜ້າ ແລະ ສາມາດບັນລຸໄດ້ຫລາຍຄາດໝາຍ, ແຕ່ພວກເຮົາກໍ່ຍັງມີຄວາມສ່ຽງທີ່ອາດຈະບໍ່ບັນລຸບາງຄາດຂອງເສດ​ຖະກິດມະຫາພາກໃນປີ 2019.​ ກອງປະຊຸມຄົບຄະນະຂອງຄະນະບໍລິຫານງານສູນກາງພັກ ຄັ້ງທີ 9ແລະ ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ VIII ກໍ່ໄດ້ຕີລາຄາການຈັດຕັ້ງປະຕິບັດວຽກງານຂອງລັດຖະ​ບານ ໃນໄລຍະ 6 ເດືອນ ທ້າຍປີ ແລະ ໄດ້ກໍານົດທິດທາງຈຸດສຸມໃນປີ 2020, ພວກເຮົາຕ້ອງພ້ອມກັນຜັນຂະຫຍາຍມະຕິກອງປະຊຸມສູນກາງ ແລະ ກອງປະຊຸມສະໄໝສາມັນຂອງສະພາແຫ່ງຊາດ ເພື່ອຮັບປະກັນໃຫ້ລັດຖະບານສາ​ມາດບັນລຸຄາດໝາຍຂອງແຜນພັດທະນາເສດ​ຖະກິດ-ສັງຄົມ ແຫ່ງຊາດ 2019.
ກອງປະຊຸມໃນມື້ນີ້ຈະໄດ້ຄົ້ນຄວ້າ ແລະ ພິຈາລະນາ 6 ຫົວຂໍ້ສໍາຄັນຄື: ເຜີຍແຜ່ການ ຈັດຕັ້ງປະຕິບັດມະຕິຂອງກອງປະ​ຊຸມສະ​ໄໝ​ສາ​ມັນ ເທື່ອ​ທີ 8 ຂອງສະພາແຫ່ງຊາດ ຊຸດ​ທີ 8 ແລະ ດຳລັດຂອງນາຍົກລັດຖະມົນຕີ ວ່າດ້ວຍການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ ແລະ ແຜນງົບປະມານແຫ່ງລັດ ປະຈໍາປີ 2020; ການສົ່ງເສີມການຜະລິດເປັນສິນຄ້າ, ການ ຄໍ້າປະກັນສະ​ບຽງອາຫານ, ການຊົມໃຊ້ຜະລິດຕະພັນທີ່ຜະລິດພາຍໃນ ແລະ ການຄ້ມຄອງການນໍາເຂົ້າສິນຄ້າອຸປະໂພກ-ບໍລິໂພກ; ລາຍງານສະພາບການແກ້ໄຂໄພພິບັດທາງທໍາມະຊາດ ໃນຂອບເຂດທົ່ວປະ ເທດ ປີ 2019 ແລະ ມາດຕະການຮັບມືໃນຕໍ່ໜ້າ; ສະຫຼຸບລາຍງານຜົນການກວດກາບັນດາໂຄງ​ການເຊົ່າສຳປະທານທີ່ດິນ; ລາຍງານຄວາມຄືບໜ້າການສົ່ງເສີມຈຸນ​ລະ​ວິ​ສາ​ຫະ​ກິ, ວິ​ສາ​ຫະ​ກິດ​ຂະ​ໜາດ​ນ້ອຍແລະຂະ​ໜາດກາງ, ຮ່າງຂໍ້ຕົກລົງຂອງນາຍົກລັດຖະມົນຕີວ່າດ້ວຍການປັບປຸງການບໍລິການລົງທຶນປະຕູດຽວ; ໂອກາດນີ້ທ່ານ ທອງລຸນ ສີສຸລິດ ໄດ້ເນັ້ນໜັກໃຫ້ພາກສ່ວນກ່ຽວ​ຂ້ອງລົງເລິກບັນຫາສໍາຄັນເພື່ອໃຫ້ກອງປະຊຸມຄົ້ນຄວ້າ ແລະ ພິຈາລະນາ ເພື່ອເຮັດໃຫ້ກອງປະຊຸມດໍາເນີນໄປຢ່າງມີປະສິດທິຜົນສູງ.

ຂ່າວ,ພາບ: ຈັນທະສອນ ສີຫານາດ