ກອງປະຊຸມລັດຖະມົນຕີທ່ອງທ່ຽວອາຊຽນບວກສາມ ຄັ້ງທີ 23 ພາຍໃຕ້ຫົວຂໍ້ ການທ່ອງທ່ຽວທີ່ມີຄຸນນະພາບ ແລະມີຄວາມຮັບຜິດຊອບ ເພື່ອຄວາມຍືນຍົງໃນອານາຄົດຂອງອາຊຽນ ຈັດຂື້ນຢ່າງເປັນ ໃນວັນທີ 26 ມັງກອນ 2024, ທີ່ໂຮງແຮມແລນມາກ ນະຄອນຫລວງວຽງຈັນ ພາຍໃຕ້ການເປັນປະທານຮ່ວມຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງຖະແຫລງຂ່າວ, ວັດທະນະທຳ ແລະທ່ອງທ່ຽວ ແລະ ທ່ານ ຫວາງຊາງ ອຸປະທູດຈີນປະຈໍາລາວ ມີບັນດາລັດຖະມົນຕີທ່ອງທ່ຽວປະ ເທດສະມາຊິກອາຊຽນ, ຈີນ, ຍີ່ປຸ່ນ, ສ.ເກົາຫລີ ແລະ ກອງເລຂາອາຊຽນເຂົ້າຮ່ວມ.
ທ່ານ ນາງ ສວນສະຫວັນ ວິຍະເກດ ມີຄໍາເຫັນວ່າ: ກອງປະຊຸມຄັ້ງນີ້ບັນດາຜູ້ເຂົ້າຮ່ວມໄດ້ພ້ອມກັນປຶກສາຫາລື ແລະຮັບຟັງຜົນກອງປະຊຸມເຈົ້າໜ້າທີ່ອາວຸໂສທ່ອງທ່ຽວອາຊຽນບວກສາມຄັ້ງທີ 44 ໂດຍສະເພາະຜົນການຈັດຕັ້ງປະຕິບັດແຜນປະຕິບັດງານການຮ່ວມມືດ້ານການທ່ອງທ່ຽວອາຊຽນບວກ 2021-2025 ນອກຈາກນີ້ປີ 2024 ຍັງເປັນປີທີ່ມີຄວາມໝາຍສໍາຄັນເປັນຕົ້ນແມ່ນປີແລກປ່ຽນການໄປມາຫາສູ່ຂອງປະຊາຊົນອາຊຽນ-ຈີນ ເພື່ອຊຸກຍູ້ການຮ່ວມມືຮອບດ້ານໂດຍສະເພາະວຽກງານທ່ອງທ່ຽວ ພ້ອມນີ້ຍັງເປັນປີເພື່ອຄົບຮອບ 35 ປີແຫ່ງການສ້າງຕັ້ງສາຍພົວພັນຄູ່ເຈລະຈາອາຊຽນ-ສ.ເກົາ ຫລີ. ສປປລາວ ເຫັນໄດ້ຄວາມສໍາຄັນຂອງການຮ່ວມມືດ້ານການທ່ອງທ່ຽວລະຫວ່າງອາຊຽນ ແລະອາຊຽນບວກສາມ ເພື່ອປະກອບສ່ວນເຂົ້າໃນການຈັດຕັ້ງຜັນຂະຫຍາຍວິໃສທັດປະຊາຄົມອາຊຽນ 2025 ແລະແຜນແມ່ບົດປະຊາຄົມເສດຖະກິດອາຊຽນ 2025 ລວມທັງແຜນງານການຮ່ວມມືອາ ຊຽນບວກສາມ 2023-2027, ສະນັ້ນຫວັງວ່າກອງປະຊຸມໃນມື້ນີ້ຈະໄດ້ປຶກສາຫາລື ແລະ ແລກ ປ່ຽນຄໍາຄິດຄໍາເຫັນຊື່ງກັນ ແລະກັນຢ່າງສ້າງສັນ ແລະກົງໄປກົງມາເພື່ອເພີ່ມທະວີການຮ່ວມມືໃນຂົງ ເຂດວຽກງານອາຊຽນບວກສາມໃຫ້ມີປະສິດທິພາບ ແລະປະສິດທິຜົນຍີ່ງໆຂື້ນ.
ກອງປະຊຸມຄັ້ງນີ້ຜູ້ແທນທີ່ເຂົ້າຮ່ວມຍັງໄດ້ແລກປ່ຽນຄຳຄິດຄຳເຫັນ ແລະ ຂໍ້ມູນຂ່າວສານກ່ຽວກັບຄວາມຄືບໜ້າຂອງຂະແໜງການທ່ອງທ່ຽວຂອງຕົນໃນ 1 ປີຜ່ານມາ ພ້ອມທັງຕີລາຄາຄືນການຈັດຕັ້ງປະຕິບັດ 24 ກິດຈະກຳຂອງແຜນງານການຮ່ວມມືດ້ານການທ່ອງທ່ຽວອາຊຽນບວກສາມ ຫລືAPT 2021-2025 , ກອງປະຊຸມໄດ້ສະແດງຄວາມຂອບໃຈຕໍ່ບັນດາປະເທດສະມາຊິກອາຊຽນທີ່ໄດ້ປະ ກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດບັນດາກິດຈະກຳ ເພື່ອຊຸກຍູ້ການຮ່ວມມືດ້ານການ ທ່ອງທ່ຽວອາຊຽນບວກສາມໃຫ້ບັນລຸຕາມຄາດໝາຍທີ່ວາງໄວ້. ກອງປະຊຸມໄດ້ປຶກສາຫາລືກ່ຽວກັບແຜນການຮ່ວມມືດ້ານການທ່ອງທ່ຽວ APT ສະບັບໃໝ່ຫຼັງປີ 2025 ເພື່ອຮັບຮອງເອົາໃນກອງປະ ຊຸມລັດຖະມົນຕີທ່ອງທ່ຽວອາຊຽນບວກສາມ ຄັ້ງທີ 25 ໃນປີ 2026 ແລະ ມອບໝາຍໃຫ້ເຈົ້າໜ້າທີ່ອາວຸໂສທ່ອງທ່ຽວອາຊຽນບວກສາມກວດກາຄືນການຈັດຕັ້ງປະຕິບັດແຜນການຮ່ວມມືດ້ານການທ່ອງ ທ່ຽວ APT ໄລຍະ 2021-2025 ແລະ ກຳນົດບູລິມະສິດຫຼັງປີ 2025 ໃຫ້ສອດຄ່ອງກັບແຜນຍຸດທະສາດການທ່ອງທ່ຽວອາຊຽນຫລັງປີ 2025. ກອງປະຊຸມໄດ້ເນັ້ນໜັກເຖິງຄວາມສຳຄັນຂອງການຍົກລະດັບສີມືແຮງງານ ແລະ ຍົກລະດັບແຮງງານດ້ານການທ່ອງທ່ຽວ ແລະ ສະໜອງເຄື່ອງມືອັນລ້ຳຄ່າ ລວມທັງເຕັກໂນໂລຊີດີຈີຕອນ ເພື່ອໃຫ້ສາມາດປັບຕົວເຂົ້າກັບວິທີການດຳເນີນທຸລະກິດໃໝ່ຂອງຂະ ແໜງການທ່ອງທ່ຽວ. ກອງປະຊຸມໄດ້ສະແດງຄວາມຂອບໃຈຕໍ່ປະເທດບວກສາມທີ່ຈະສືບຕໍ່ໃຫ້ຄໍາໝັ້ນສັນຍາໃນການພັດທະນາທັກສະ ແລະຄວາມຮູ້ຄວາມສາມາດຂອງຜູ້ຊ່ຽວຊານດ້ານການທ່ອງທ່ຽວອາຊຽນ ໂດຍຜ່ານໂຄງການຝຶກອົບຮົມ ແລະ ກິດຈະກໍາຕ່າງໆ, ກອງປະຊຸມໄດ້ສະແດງຄວາມຂອບໃຈຕໍ່ຈີນທີ່ໄດ້ໃຫ້ການສະໜັບສະໜູນໃນການເຄື່ອນໄຫວຮ່ວມມືດ້ານການທ່ອງທ່ຽວອາຊຽນ-ຈີນ. ໂດຍສະເພາະໃນປີ 2023 ຜ່ານມາ, ຈີນໄດ້ຈັດ 3 ກິດຈະກຳຄື: ງານວາງສະແດງການທ່ອງທ່ຽວຈີນ-ອາຊຽນ, ງານວາງສະແດງການທ່ອງທ່ຽວສາກົນຈີນ, ແລະໂຄງການອົບຮົມບຸກຄະລາກອນການທ່ອງທ່ຽວຈີນ-ອາຊຽນ. ກອງປະຊຸມໄດ້ຮັບຄວາມຍິນດີທີ່ຈະເປີດຕົວເວັບໄຊທ່ອງທ່ຽວອາຊີຕາເວັນອອກສ່ຽງໃຕ້ສໍາລັບຕະຫຼາດຈີນເປັນຂໍ້ລິເລີ່ມພາຍໃຕ້ແຜນແມ່ບົດກ່ຽວກັບການເຊື່ອມຕໍ່ອາຊຽນ (MPAC) 2025 ເພື່ອດຶງດູດນັກທ່ອງທ່ຽວຈີນທີ່ມີທ່າແຮງ ໂດຍການສະຫນອງຂໍ້ມູນຂ່າວສານທີ່ຄົບຖ້ວນສົມບູນແລະທັນສະໄຫມກ່ຽວກັບທາງເລືອກການທ່ອງທ່ຽວທີ່ຫຼາກຫຼາຍທີ່ມີຢູ່ໃນປະເທດອາຊຽນ ແນໃສ່ຊຸກຍູ້ການເຕີບໂຕດ້ານເສດຖະກິດ, ເພີ່ມທະວີການເຊື່ອມຕໍ່ລະຫວ່າງປະຊາຊົນກັບຈີນ, ເພີ່ມທະວີຄວາມເຂົ້າໃຈເຊິ່ງກັນແລະກັນລະຫວ່າງອາຊຽນ ແລະຈີນ ໂດຍຜ່ານການຊຸກຍູ້ການຮ່ວມມືລະຫວ່າງອາຊຽນກັບຈີນຕື່ມອີກ.
ກອງປະຊຸມໄດ້ສະແດງຄວາມຂອບໃຈຕໍ່ປະເທດຍີ່ປຸ່ນທີ່ໄດ້ຈັດກອງປະຊຸມປຶກສາຫາລືພິເສດຂອງລັດຖະມົນຕີການທ່ອງທ່ຽວອາຊຽນ-ຍີ່ປຸ່ນໃນເດືອນ ຕຸລາ 2023 ແລະ ການສະໜັບສະໜູນວຽກງານການຮ່ວມມືດ້ານການທ່ອງທ່ຽວລະຫວ່າງປະເທດສະມາຊິກອາຊຽນ-ຍີ່ປຸ່ນ. ກອງປະຊຸມຍັງໄດ້ຊຸກຍູ້ໃຫ້ອາຊຽນ ແລະ ຍີ່ປຸ່ນ ເພີ່ມທະວີການຮ່ວມມືໃນຂົງເຂດທ່ອງທ່ຽວຕື່ມອີກ ແລະ ປະຕິບັດຂໍ້ລິເລີ່ມ ເພື່ອຊຸກຍູ້ການທ່ອງທ່ຽວແບບຍືນຍົງ ລວມທັງການແລກປ່ຽນການປະຕິບັດທີ່ດີທີ່ສຸດ ແລະຊຸກຍູ້ການແລກປ່ຽນເຊິ່ງກັນ ແລະ ກັນ ໂດຍອີງຕາມຖະແຫຼງການຮ່ວມທີ່ໄດ້ຮັບການຮັບຮອງເອົາໃນກອງປະ ຊຸມສົນທະນາພິເສດ, ກອງປະຊຸມໄດ້ສະແດງຄວາມຂອບໃຈຕໍ່ສ. ເກົາຫຼີ ທີ່ໄດ້ສືບຕໍ່ໃຫ້ການສະໜັບສະໜູນໃນການເຄື່ອນໄຫວຮ່ວມມືດ້ານການທ່ອງທ່ຽວ ອາຊຽນ-ສ.ເກົາຫຼີ ໂດຍຜ່ານໂຄງການລິເລີ່ມການຮ່ວມມືຂອງ ສ.ເກົາຫຼີ ເພື່ອການທ່ອງທ່ຽວແບບຍືນຍົງ (KOPIST) ລວມທັງເວທີປາໄສນະໂຍ ບາຍລະດັບສູງ ແລະ ລະດັບວິຊາການ ທີ່ຈັດຂຶ້ນໃນເດືອນເມສາ 2023 ຜ່ານມາ ນອກຈາກນັ້ນ, ກອງປະຊຸມຍັງໄດ້ສະແດງຄວາມຂອບໃຈຕໍ່ ສ.ເກົາຫຼີ ທີ່ໄດ້ເພີ່ມທະວີການຮ່ວມມືດ້ານການທ່ອງທ່ຽວໃນພາກພື້ນ ໂດຍຜ່ານໂຄງການຝຶກອົບຮົມຜູ້ບໍລິຫານອາຊີ-ປາຊີຟິກ ຄັ້ງທີ 17 ຂອງອົງການ UNWTO ໃນເດືອນພະຈິກ 2023 ກອງປະຊຸມຍັງໄດ້ຊຸກຍູ້ໃຫ້ອາຊຽນ ແລະ ສ.ເກົາຫຼີ ປຶກສາຫາລື ແລະເພີ່ມທະວີການຮ່ວມມືກັບ ສ. ເກົາຫລີ ໂດຍສຸມໃສ່ກິດຈະກໍາເພື່ອສະຫນັບສະຫນູນການທ່ອງທ່ຽວແບບຍືນຍົງ.
ຂ່າວ : ຈັນທະສອນ ສີຫານາດ
