ວິທະຍຸກະຈາຍສຽງແຫ່ງຊາດລາວ

Lao National Radio

ຕັ້ງໜ້າຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກ ເຂົ້າສູ່ຊີວິດຈິງ
ກອງປະຊຸມລັດຖະມົນຕີທ່ອງທ່ຽວອາຊຽນຄັ້ງທີ 27 ຈັດຂຶ້ນໃນວັນທີ 25 ມັງກອນ 2024 ທີ່ໂຮງແຮມແລນມາກ ແມ່ຂອງລີເວີໄຊ ນະຄອນຫຼວງວຽງຈັນ, ໂດຍການເປັນປະທານຂອງທ່ານ ນາງ ສວນສະຫວັນ ວິຍະເກດ ລັດຖະມົນຕີກະຊວງ ຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ມີບັນດາລັດຖະມົນຕີທ່ອງທ່ຽວອາຊຽນ ແລະ ເລຂາທິການໃຫຍ່ອາຊຽນເຂົ້າຮ່ວມ.
ກອງປະຊຸມໄດ້ປຶກສາຫາລື ແລະ ຮັບຟັງການລາຍງານຜົນຂອງກອງປະຊຸມເຈົ້າ ໜ້າທີ່ອາວຸໂສທ່ອງທ່ຽວອາຊຽນ ໂດຍສະເພາະແມ່ນຜົນຂອງການຈັດຕັ້ງແຜນຍຸດ ທະສາດການທ່ອງທ່ຽວອາຊຽນ 2016-2025 ລວມທັງການລາຍງານຈາກບັນດາອົງການຈັດຕັ້ງສາກົນ, ບັນດາອົງການທີ່ກ່ຽວຂ້ອງກັບອາຊຽນ ແລະ ພາກສ່ວນພາຍນອກອື່ນໆ ໃນການຈັດຕັ້ງກິດຈະກຳທີ່ສະໜັບສະໜູນໃຫ້ແກ່ການທ່ອງທ່ຽວອາຊຽນໃນໄລຍະຜ່ານມາ ແລະ ແຜນການໃນຕໍ່ໜ້າ, ການທ່ອງທ່ຽວເປັນພາຫະນະຫຼັກທີ່ສຳຄັນໃນການຂັບເຄື່ອນການຂະຫຍາຍຕົວຂອງເສດຖະກິດ, ການພັດທະນາແບບຍືນຍົງ ແລະ ຊຸກຍູ້ການພົວພັນຮ່ວມມືທີ່ແໜ້ນແຟ້ນກໍເພື່ອເຊື່ອມໂຍງເສດຖະກິດໃຫ້ມີຄວາມກົມກຽວ, ນໍາໃຊ້ນະວັດຕະກໍາໃຫ້ມີຄວາມຫຼາກຫຼາຍ, ການຊຸກຍູ້ສົ່ງເສີມການເຊື່ອມຈອດ ແລະ ການໄປມາຫາສູ່ຂອງປະຊາຊົນ ຊຶ່ງບໍ່ໄດ້ມີການຮ່ວມມືສະເພາະແຕ່ບັນດາປະເທດສະມາຊິກອາຊຽນເທົ່ານັ້ນ, ແຕ່ຍັງມີການຮ່ວມມືກັບຫຼາຍປະເທດໃນພາກພື້ນຕື່ມອີກ ແລະເພື່ອເປັນການປະກອບສ່ວນເຂົ້າໃນການຈັດຕັ້ງປະຕິບັດແຜນຍຸດທະສາດທ່ອງທ່ຽວອາຊຽນ 2016-2025, ແຜນແມ່ບົດເສດຖະກິດອາຊຽນ 2025 ແລະ ວິໄສທັດປະຊາຄົມອາຊຽນ 2025 ໃຫ້ປະກົດຜົນເປັນຈິງຕາມເປົ້າໝາຍລວມຂອງອາຊຽນ.