ໃນລະຫວ່າງວັນທີ 6-8 ທັນວາ 2022, ທີ່ໂຮງແຮມພູລແມນ ຫຼວງພະບາງ, ທ່ານ ຄຳເຈນ ວົງໂພສີ, ລັດຖະມົນຕີ ກະຊວງແຜນການ ແລະ ການລົງທຶນ ຕາງໜ້າໃຫ້ແກ່ ລັດຖະບານ ແຫ່ງ ສປປ ລາວ ໄດ້ເປັນປະທານ ແລະ ນຳພາຄະນະຜູ້ແທນຝ່າຍລາວ ເຂົ້າຮ່ວມກອງປະຊຸມ ລັດຖະມົນຕີ ອະນຸພາກພື້ນແມ່ນ້ຳຂອງຄັ້ງທີ 25 ໂດຍການເປັນເຈົ້າພາບຂອງ ສປປ ລາວ ເຊີ່ງກອງປະຊຸມດັ່ງກ່າວ ແມ່ນຈັດຂື້ນໃນທຸກໆປີ ເຊີ່ງຈະໝູນວຽນການເປັນເຈົ້າພາບ ຕາມຕົວອັກສອນ ຂອງ 6 ປະເທດອະນຸພາກພື້ນແມ່ນໍ້າຂອງ. ກອງປະຊຸມຄັ້ງນີ້ ໄດ້ຈັດຂຶ້ນໃນຮູບແບບເຊິ່ງໜ້າ ທີ່ແຂວງຫຼວງພະບາງ ພາຍໃຕ້ຫົວຂໍ້: “ເລັ່ງລັດການຟື້ນຟູທາງດ້ານເສດຖະກິດ ເພື່ອເສີມຂະຫຍາຍຄວາມສຳເລັດ 30 ປີ ຂອງອະນຸພາກພື້ນແມ່ນ້ຳຂອງ ໃຫ້ເປັນການພັດ ທະນາແບບມີສ່ວນຮ່ວມ ແລະ ຍືນຍົງຍິ່ງຂຶ້ນ – Accelerating Economic Recovery to Enlarge the 30 years of GMS achievement with a more Inclusive and Sustainable Development”. ຜູ້ເຂົ້າຮ່ວມກອງປະ ຊຸມດັ່ງກ່າວປະກອບມີຄະນະລັດຖະ ມົນຕີ/ຮອງລັດຖະມົນຕີ, ເຈົ້າໜ້າທີ່ອາວຸໂສ ແລະ ຜູ້ແທນ ຈາກ 6 ປະເທດ ຄື: ສປ.ຈີນ, ຣາຊະອານາຈັກກຳປູເຈຍ, ສປປ ລາວ, ມຽນມາ, ສສ.ຫວຽດນາມ ແລະ ຣາຊະອານາຈັກໄທ ແລະ ທະນາຄານພັດທະນາອາຊີເຊິ່ງເປັນຄູ່ຮ່ວມຍຸດທະ ສາດ ເຂົ້າຮ່ວມ.
ໃນກອງປະຊຸມດັ່ງກ່າວ, ໄດ້ມີການລາຍ ງານຜົນສໍາເລັດໃນການຈັດຕັ້ງປະຕິບັດແຜນງານການຮ່ວມມືທາງດ້ານເສດ ຖະກິດອະນຸພາກພື້ນແມ່ນໍ້າຂອງ ໃນໄລຍະ 01 ປີທີ່ຜ່ານມາ (2021-2022) ແລະ ຈະໄດ້ຮັບຮອງເອົາບັນດາເອກະສານທີ່ສໍາຄັນ ຄື:
1) ຍຸດທະສາດບົດບາດຍິງ-ຊາຍ ອະນຸພາກພື້ນແມ່ນໍ້າຂອງ 2030;
2) ຂອບການຕິດຕາມຜົນສໍາເລັດຂອງຍຸດທະສາດການຮ່ວມມືໃນຂົງເຂດອະນຸພາກພື້ນແມ່ນ້ຳຂອງ 2030;
3) ຂອບການລົງທຶນໃນຂົງເຂດອະນຸພາກພື້ນແມ່ນ້ຳຂອງ 2025;
4) ຖະແຫຼງການຮ່ວມ ລັດຖະມົນຕີ ອະນຸພາກພື້ນແມ່ນໍ້າຂອງ ຄັ້ງທີ 25 (Joint Statement Declaration).
ນອກຈາກນັ້ນ, ຍັງມີເອກະສານຈຳນວນຫນຶ່ງເພື່ອໃຫ້ປະເທດສະມາຊິກຮັບຊາບເຊັ່ນ: 1) ການລິເລີ່ມການຮ່ວມມືທາງດ້ານເສດຖະກິດແບບດິຈິຕອລ ໃນຂົງເຂດອະນຸພາກພື້ນແມ່ນ້ຳຂອງ; 2) ການເພີ່ມທະວີການມີສ່ວນຮ່ວມຂອງບັນດາຄູ່ຮ່ວມພັດທະນາ ເຂົ້າໃນການພັດທະນາເສດຖະກິດ-ສັງຄົມ ໃນຂົງເຂດອະນຸພາກພື້ນແມ່ນ້ຳຂອງ; 3) ການລິເລີ່ມສ້າງຕັ້ງຄະນະສະເພາະກິດທາງດ້ານການຄ້າ ແລະ ການລົງທຶນ, ການເຄື່ອນຍ້າຍແຮງງານ, ແລະ ການລິເລີ່ມສ້າງຕັ້ງເຄືອຂ່າຍທາງດ້ານຄວາມຮູ້ ໃນຂົງເຂດອະນຸພາກພື້ນແມ່ນ້ຳຂອງ; ແລະ 4) ບັນດາກິດຈະກຳ ໃນການສະເຫຼີມສະຫຼອງຄົບຮອບ 30 ປີ ການພົວພັນຮ່ວມມືລະຫວ່າງບັນດາປະເທດສະມາຊິກອະນຸພາກພື້ນແມ່ນ້ຳຂອງ ແລະ ທະນາຄານພັດທະນາອາຊີ ເຊິ່ງເປັນຄູ່ຮ່ວມຍຸດ ທະສາດຫຼັກ ໃນການສະໜັບສະໜູນຊ່ວຍເຫຼືອ ທາງດ້ານການພັດທະນາລະບົບເສດຖະກິດ ແລະ ສັງຄົມ ຂອງ ສປປ ລາວ ແລະ ບັນດາປະເທດສະມາຊິກອະນຸພາກພື້ນແມ່ນ້ຳຂອງ.
ກອງປະຊຸມໃນຄັ້ງນີ້ ຖືເປັນກອງປະຊຸມແບບຊ້ອງໜ້າຄັ້ງທຳອິດຂອງບັນດາຜູ້ມີສ່ວນຮ່ວມໃນຂົງເຂດ GMS ນັບຕັ້ງແຕ່ການແຜ່ລະບາດຂອງພະຍາດ covid-19. ກອງປະຊຸມແບບຊ້ອງໜ້ານີ້ ຍັງເປັນການຊຸກຍູ້ໃຫ້ມີການເພີ່ມທະວີການມີສ່ວນ ຮ່ວມ ແລະ ການຮ່ວມມືຫຼາຍຂຶ້ນໃນການປຶກສາຫາລືກ່ຽວກັບການພັດທະນາ ແລະ ສິ່ງທ້າທາຍຂອງຂົງເຂດອະນຸພາກພື້ນແມ່ນ້ຳຂອງ, ແລະ ການສະເຫຼີມສະຫຼອງຄົບຮອບ 30 ປີຂອງແຜນງານຮ່ວມມື GMS. ໃນການເຂົ້າຮ່ວມກອງປະຊຸມໃນຄັ້ງນີ້, ທ່ານ ຄຳເຈນ ວົງໂພສີ, ລັດຖະ ມົນຕີ ກະຊວງແຜນການ ແລະ ການລົງທຶນ ໃນນາມ ລັດຖະມົນຕີ ອະນຸພາກພື້ນແມ່ນ້ຳຂອງ ຂອງ ສປປ ລາວ ໄດ້ມີຄຳເຫັນ ແລະ ຕີລາຄາສູງຕໍ່ຜົນສໍາເລັດໃນການຈັດຕັ້ງປະຕິບັດແຜນງານການຮ່ວມມືທາງດ້ານເສດຖະ ກິດອະນຸພາກພື້ນແມ່ນໍ້າຂອງໃນໄລຍະ 1 ປີ ທີ່ຜ່ານມາ.
ທ່ານລັດຖະມົນຕີ ຍັງໄດ້ເນັ້ນໜັກໃສ່ບັນຫາອັນຮີບດ່ວນທີ່ບັນດາປະເທດອະນຸພາກພື້ນແມ່ນໍ້າຂອງ ຈະຕ້ອງໄດ້ມີການຮ່ວມມືກັນຢ່າງສະນິດແໜ້ນ ເພື່ອແກ້ໄຂບັນຫາຮ່ວມກັນ ນັ້ນກໍ່ຄື ການແກ້ໄຂສະພາບທາງດ້ານເສດຖະກິດພາຍຫຼັງການແຜ່ລະບາດຂອງພະຍາດ covid-19. ການພະຍາຍາມບັນລຸພື້ນຖານໃຫມ່ສໍາລັບແຜນງານ GMS ເນື່ອງຈາກວ່າມີການພິຈາ ລະນາຜົນໄດ້ຮັບ ແລະ ຂໍ້ສະເຫນີແນະຂອງການສຶກສາ “ການມີສ່ວນຮ່ວມຂອງຄູ່ຮ່ວມພັດທະນາຢ່າງເລິກເຊິ່ງໃນແຜນງານ GMS”. ທ່ານ ລັດຖະມົນຕີ ໄດ້ຮຽກຮ້ອງໃຫ້ສືບຕໍ່ປັບປຸງກົນໄກເພື່ອຊຸກຍູ້ການມີສ່ວນຮ່ວມຂອງຄູ່ຮ່ວມງານ ໃຫ້ຫຼາຍໆຂື້ນເລື້ອຍໆ ເພື່ອລະດົມການຊ່ວຍເຫຼືອທາງດ້ານວິຊາການ ແລະ ແຫຼ່ງທຶນ ເຂົ້າໃນບັນດາໂຄງການທີ່ນອນໃນຂອບການລົງທຶນພາກພື້ນ 2025 ແລະ ຕ້ອງຮັບປະກັນໄດ້ວ່າໂຄງການເຫຼົ່ານັ້ນ ຕ້ອງເປັນໂຄງການບູລິມະສິດ ແລະ ເສີມສ້າງຜົນປະໂຫຍດໃຫ້ແກ່ບັນດາປະເທດສະມາຊິກ ໂດຍສະເພາະນໍາເອົາຜົນປະ ໂຫຍດທີ່ແທ້ຈິງໄປສູ່ປະຊາຊົນ ແລະ ບົນພື້ນຖານການພັດທະນາທີ່ຍືນຍົງ ເພື່ອເຮັດໃຫ້ການຈັດຕັ້ງປະຕິບັດແຜນງານ GMS 2030 ໃຫ້ມີປະສິດທິຜົນຍິ່ງຂື້ນ. ນອກນັ້ນ, ທ່ານຍັງໄດ້ຮຽກຮ້ອງໃຫ້ມີການປະສານສົມທົບ ແລະ ຮ່ວມມືກັນຂອງບັນດານັກຄົ້ນຄ້ວາ ແລະ ການແລກປ່ຽນທາງດ້ານຄວາມຮູ້ຂອງປະເທດສະມາຊິກອະນຸພາກພື້ນແມ່ນໍ້າຂອງໃນໄລຍະສັ້ນ ແລະ ໄລຍະຍາວ ພ້ອມທັງການລິເລີ່ມການຮ່ວມມືດ້ານການອຳນວຍຄວາມສະດວກທາງດ້ານການຄ້າ ແລະ ການລົງທຶນເພື່ອເລືອກເຝັ້ນເອົາວິທີການ ແລະ ທິດທາງທີເໝາະສົມ ໃນການກະຕຸ້ນເສດຖະກິດ ແລະ ສັງຄົມ ໃຫ້ມີປະສິດທິດພາບ ແລະ ມີປະສິດທິຜົນ ໃຫ້ແກ່ລັດຖະບານຂອງບັນດາປະເທດສະ ມາຊິກ.
ກອງປະຊຸມ ລັດຖະມົນຕີ ອະນຸພາກພື້ນແມ່ນ້ຳຂອງ ມີເປົ້າໝາຍຫຼັກແມ່ນ ເພື່ອຮັດແໜ້ນ ແລະ ຜັນຂະຫຍາຍການຮ່ວມມືທາງດ້ານເສດຖະກິດໃນຂົງເຂດອະນຸພາກພື້ນແມ່ນໍ້າຂອງ ແລະ ກໍານົດທິດທາງແຜນວຽກການພັດທະນາຂອງອະນຸພາກພື້ນແມ່ນໍ້າຂອງ ໃຫ້ມີຄວາມແທດເໝາະ ແລະ ຕອບສະໜອງໄດ້ຄວາມຕ້ອງການໃນການພັດທະນາ ແລະ ການເຊື່ອມໂຍງທາງດ້ານເສດຖຖະກິດ- ສັງຄົມ ຂອງບັນດາປະເທດສາມາຊິກອະນຸພາກພື້ນແມ່ນ້ຳຂອງ ໂດຍໄດ້ສຸມໃສ່ 03 ເສົາຄ້ຳຫຼັກຄື: “1). ຊຸມຊົນ: ສົ່ງເສີມການພັດທະນາຊຸມຊົນອະນຸພາກພື້ນແມ່ນໍ້າຂອງໃຫ້ເປັນຊຸມຊົນທີ່ມີສຸຂະພາບ ແລະ ສິ່ງແວດລ້ອມທີ່ຍືນຍົງ ເພື່ອຄວາມເປັນຢູ່ທີ່ດີຂອງ ປະຊາຊົນ; 2). ການເຊື່ອມຈອດ: ສົ່ງເສີມການເຊື່ອມຈອດພາຍໃນອະນຸພາກພື້ນແມ່ນໍ້າຂອງ ແລະ ພາກພື້ນອາຊີ ໃນດ້ານການຂົນສົ່ງ ແລະ ພະລັງງານ; 3). ຄວາມອາດສາມາດໃນການແຂ່ງຂັນ: ສ້າງຄວາມເຂັ້ມແຂງ ໃຫ້ແກ່ ປະ ເທດສະມາຊິກ ເພື່ອຮັບປະກັນທາງດ້ານການພັດທະນາເສດຖະ ກິດ- ສັງຄົມ ໃຫ້ທຽບທັນ ແລະ ເຊື່ອມໂຍງ ກັບພາກພື້ນອື່ນໆໃນນັ້ນ, ກ່ອນກອງປະຊຸມ ລັດຖະມົນຕີ ອະນຸພາກພື້ນແມ່ນນ້ຳຂອງ ແມ່ນໄດ້ມີການດຳເນີນບັນດາກອງປະຊຸມປິ່ນອ້ອມທີ່ສຳຄັນຄື: ກອງປະຊຸມເຈົ້າ ໜ້າທີ່ອາວຸໂສ ອະນຸພາກພື້ນແມ່ນນ້ຳຂອງ ຈຸດປະສົງຫຼັກແມ່ນເພື່ອປຶກສາຫາລືກ່ຽວກັບບັນດາແຜນວຽກ ແລະ ການຈັດຕັ້ງປະຕິບັດບັນດາຍຸດທະສາດຕ່າງໆໃນກອບການຮ່ວມມມືທາງດ້ານເສດ ຖະກິດໃນຂົງເຂດພາກພື້ນ ແລະ ສາກົນ, ແລະ ກອງປະຊຸມຄູ່ຮ່ວມພັດທະນາ ອະນຸພາກພື້ນແມ່ນນ້ຳຂອງ ເຊິ່ງມີຈຸດປະສົງແມ່ນເພື່ອເສີມສ້າງ ແລະ ຍົກສູງການມີສ່ວນຮ່ວມຂອງບັນດາຄູ່ຮ່ວມພັດທະນາ ແລະ ຄູ່ຮ່ວມຍຸດທະສາດຂອງ ຂົງເຂດອະນຸພາກພື້ນແມ່ນນ້ຳຂອງ ເພື່ອສົ່ງເສີມການຮ່ວມມື ແລະ ດຶງດູດການລົງທຶນຂອງຄູ່ຮ່ວມພັດທະນາໃນຂົງເຂດເສດ ຖະກິດ ແລະ ສັງຄົມ ໃຫ້ໄດ້ຮັບໝາກຜົນຍິ່ງຂຶ້ນ. ນອກຈາກນັ້ນ, ທ່ານ ຄຳເຈນ ວົງໂພສີ, ລັດຖະມົນຕີກະຊວງແຜນການ ແລະ ການລົງທຶນ ໄດ້ນຳພາຄະນະລັດ ຖະມົນຕີ ແລະ ຜູ້ແທນ ຈາກ 6 ປະເທດສະມາຊິກ ໄປຢ້ຽມຢາມພາກສະໜາມ ກໍ່ຄື ໂຄງການຊ່ວຍເຫຼືອຂອງທະນາຄານພັດທະນາອາຊີ ໃນເຂດຕາດກວາງຊີ ແລະ ຮັບຟັງການບັນຍາຍຄວາມເປັນມາຂອງໂຄງການ ທີ່ໃຫ້ການຊ່ວຍເຫຼືອໃນການພັດທະນາຕາດດັ່ງກ່າວ.
