ກອງປະຊຸມລັດຖະມົນຕີອາຊຽນ + 3 ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 14

ວັນທີ 29 ສິງຫາ 2024 ທີ່ນະຄອນຫຼວງວຽງຈັນ ສປປ ລາວ, ໄດຈັດກອງປະຊຸມລັດຖະມົນຕີອາຊຽນ +3 ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 14 ໄດ້ຈັດຂື້ນ, ພາຍໃຕ້ການເປັນປະທານຂອງ ທ່ານ ພົນເອກ ວິໄລ ຫຼ້າຄໍາຟອງ ກຳມະການກົມການເມືອງສູນກາງພັກ ຮອງນາຍົກລັດຖະມົນຕີ ລັດຖະມົນຕີກະຊວງປ້ອງກັນຄວາມສະຫງົບ, ມີ ທ່ານ ດຣ ກາວ ກິມ ຮຸນ ເລ ຂາທິການໃຫຍ່ອາຊຽນ, ມີລັດຖະມົນຕີບັນດາປະເທດສະມາຊິກອາຊຽນ, ຕີມໍ ເລສເຕ ທີ່ຮັບຜິດຊອບວຽກງານຕ້ານອາຊະຍາກໍາຂ້າມຊາດ, ລັດຖະມົນຕີບັນດາປະເທດບວກ 3 ຄື: ສາທາລະນະ ລັດ ປະຊາຊົນຈີນ, ຢີ່ປຸ່່ນ ແລະ ສາທາລະນະລັດ ເກົາຫຼີ ທີ່ຮັບ ຜິດຊອບວຽກງານຕ້ານອາຊະຍາກໍາຂ້າມຊາດ ພ້ອມດ້ວຍຄະນະຜູ້ແທນເຂົ້າຮ່ວມ.

ກອງປະຊຸມໃນຄັ້ງນີ້ຄະນະຜູ້ແທນໄດ້ພ້ອມກັນຕີລາຄາຄືນຜົນຂອງການຮ່ວມມືໃນການຕ້ານອາຊະຍາກໍາຂ້າມຊາດລະຫວ່າງປະເທດອາຊຽນ+3.ໃນນີ້ ໄດ້ຮັບຟັງການລາຍງານຜົນຂອງກອງປະຊຸມທີ່ຜ່ານມາພາຍໃຕ້ຂອບກອງປະຊຸມລັດຖະມົນຕີອາຊຽນ +3 ວ່າດ້ວຍການຕ້ານອາຊະຍາກໍາຂ້າມຊາດ, ຜົນຂອງກອງປະ ຊຸມຫົວໜ້າເຈົ້າໜ້າທີ່ອາວຸໂສອາຊຽນ +3 ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 21, ຜົນຂອງກອງປະຊຸມຫົວໜ້າກົມຕໍາຫຼວດກວດຄົນເຂົ້າ-ອອກເມືອງ ແລະ ຫົວໜ້າພະແນກກົງສຸນ ກະຊວງການຕ່າງປະເທດອາຊຽນ+3 ຄັ້ງທີ 3, ຜົນຂອງກອງປະຊຸມເຈົ້າໜ້າທີ່ອາວຸໂສອາຊຽນ+3 ເພື່ອກະກຽມໃຫ້ແກ່ກອງປະຊຸມລັດຖະມົນຕີອາຊຽນ +3 ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 14. ພ້ອມນີ້, ຄະນະຜູ້ແທນໄດ້ແລກປ່ຽນທັດ ສະນະກ່ຽວກັບການຮ່ວມມືລະຫວ່າງອາຊຽນ +3 ກ່ຽວກັບອົງປະກອບທີ່ພົວພັນເຖິງການຕ້ານອາຊະຍາກໍາຂ້າມຊາດ ແລະ ບັນຫາອື່ນໆທີ່ກ່ຽວຂ້ອງ.

ກອງປະຊຸມໄດ້ຮັບຮອງເອົາຖະແຫຼງການຮ່ວມຂອງກອງປະ ຊຸມລັດຖະມົນຕີອາຊຽນ +3 ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 14 ແລະ ພິຈາລະນາບົດລາຍງານຜົນຂອງກອງປະ ຊຸມດັ່ງກ່າວ ຊຶ່ງຈະກາຍເປັນພື້ນຖານອັນສໍາຄັນໃນການເສີມ ຂະຫຍາຍການຮ່ວມມື ລະຫວ່າງອາຊຽນ +3 ເພື່ອຕ້ານອາຊະຍາກຳຂ້າມຊາດໃນຕໍ່ໜ້າ ໃຫ້ມີປະສິດທິຜົນສູງຂຶ້ນ.