ກອງປະຊຸມລັດຖະມົນຕີ ສຶກສາອາຊຽນ ກ່ຽວກັບການກຽມຄວາມພ້ອມຕໍ່ສະພາບການປຽ່ນແປງຂອງດິນຟ້າອາກາດ ຕັ້ງແຕ່ເຍົາໄວ

ກອງປະຊຸມລັດຖະມົນຕີ ສຶກສາອາຊຽນ ກ່ຽວກັບການກຽມຄວາມພ້ອມຕໍ່ສະພາບການປຽ່ນແປງຂອງດິນຟ້າອາກາດ ຕັ້ງແຕ່ເຍົາໄວ: ການສຶກສາກ່ອນໄວຮຽນ ເພື່ອຄວາມຍືນຍົງໃນອານາຄົດຈັດຂຶ້ນໃນຕອນເຊົ້າມື້ນີ້ທີ່ ໂຮງແຮມແລນມາກ ນະຄອນຫຼວງວຽງຈັນ ໂດຍການເປັນປະທານຂອງທ່ານ ພຸດ ສີມມາລາວົງ ລັດຖະມົນຕີກະຊວງສືກສາທິການ ແລະ ກິລາ ມີທ່ານ ກາວ ຄິມ ຮຸນ ເລຂາທິການອາຊຽນ, ພ້ອມດ້ວຍບັນດາລັດຖະມົນຕີສຶກສາອາຊຽນ, ຕີມໍເລສເຕ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ພຸດ ສິມມາລາວົງ ກ່າວວ່າ: ກອງປະຊຸມຄັ້ງນີ້ ເປັນເວທີການແລກປ່ຽນບົດຮຽນພ້ອມກັນເບິ່ງບັນຫາ, ວາງແນວທາງໃນການປັບປຸງ ແລະ ຂະຫຍາຍເຂົ້າສູ່ຄຸນນະພາບ ຕໍ່ກັບການສຶກສາເດັກກ່ອນໄວຮຽນ ນັບແຕ່ການເປັນປະທານອາຊຽນ ໃນປີ 2012 ຂອງ ສປປ ລາວ, ການຮ່ວມມືອາຊຽນ ພວກເຮົາໄດ້ຮັບຜົນສໍາເລັດເປັນກ້າວໆ ໂດຍສະເພາະວຽກງານການສຶກສາ ກໍຄືການດູແລ ແລະ ການສຶກສາເດັກກ່ອນໄວຮຽນ. ໃນນີ້ ໄດ້ປະຕິບັດ ແລະ ສືບຕໍ່ຕາມຄໍາໝາຍໝັ້ນ ໃນການຈັດຕັ້ງປະຕິບັດຖະແຫລງການຜູ້ນໍາອາຊຽນ ວ່າດ້ວຍການດູແລ ແລະ ການສຶກສາເດັກກ່ອນໄວຮຽນ ທີ່ໄດ້ຮັບຮອງໃນເດືອນ ກໍລະກົດ 2023 ທີ່ ນະຄອນຫລວງຈາກາຕາ, ປະເທດອິນໂດເນເຊຍ. ນອກຈາກນີ້ ສປປ ລາວ ຍັງໄດ້ເຂົ້າຮ່ວມຮັບຮອງບັນດາຖະແຫລງການອື່ນໆ ທີ່ໄດ້ຮັບຮອງຮ່ວມກັນຂອງບັນດາປະເທດອາຊີຕາເວັນອອກສຽ່ງໃຕ້ ກຽ່ວກັບການດູ ແລ ແລະ ການສຶກສາເດັກກ່ອນໄວຮຽນ.

ພ້ອມນີ້, ໄດ້ຮ່ວມມືກັນ ແລະ ຈະສືບຕໍ່ຮ່ວມມືກັນ ເພື່ອກ້າວໄປຂ້າງໜ້າພ້ອມກັນ ຕາມວິໄສທັດຂອງປະຊາຄົມອາຊຽນ 2025 ແລະ ແຜນການຮ່ວມມືສຶກສາອາຊຽນ 2021-2025 ແລະ ຕ້ອງສືບຕໍ່ເຮັດວຽກຮ່ວມກັນຢ່າງໃກ້ຊິດ ເພື່ອສ້າງຄວາມເຂັ້ມແຂງ ແລະ ຄວາມສົມບູນພູນສຸກໃຫ້ແກ່ປະຊາຄົມຂອງພວກເຮົາ. ນອກຈາກນີ້ ການປຽ່ນແປງຂອງດິນຟ້າອາດກາດ ຍັງເປັນບັນຫາທີ່ສໍາຄັນ ທີ່ກະທົບຕໍ່ການພັດທະນາທາງດ້ານການສຶກສາ. ສິ່ງເຫລົ່ານີ້ ຊີ້ໃຫ້ເຫັນເຖິງຄວາມຈໍາເປັນສໍາລັບການຍົກລະດັບຄວາມພ້ອມ ແລະ ການຮ່ວມມືທີ່ສົມບູນແບບເພື່ອແກ້ໄຂການປ່ຽນແປງໃນອະນາຄົດໃນດ້ານຕ່າງໆ.

ທ່ານ ພຸດ ສິມມາລາວົງ ກ່າວຕື່ມວ່າ: ຜົນໄດ້ຮັບຂອງກອງປະຊຸມຄັ້ງນີ້ ແມ່ນບັນດາລັດຖະມົນຕີສືກສາຂອງບັນດາປະເທດອາຊຽນ ໄດ້ຮ່ວມກັນຄິດຫາມາດຕະການຕ່າງໆ ເພື່ອເຮັດໃຫ້ວຽກງານການສຶກສາກ່ອນໄວຮຽນ ໃນເຂດອາຊຽນ ກໍຄືພາກພື້ນອາຊີຕາເວັນອອກສ່ຽງໃຕ້ ໃຫ້ດີຂຶ້ນ, ແກ້ໄຂໄດ້ບັນຫາສິ່ງທ້າທາຍຕ່າງໆ ຕໍ່ກັບການສຶກສາກ່ອນໄວຮຽນ, ເຊິ່ງຫົວຂໍ້ໃນກອງປະຊຸມຄັ້ງນີ້, ແມ່ນກ່ຽວເຖິງເລື່ອງຜົນກະທົບຂອງການປ່ຽນແປງດິນຟ້າອາກາດ ຕໍ່ການສຶກສາກ່ອນໄວຮຽນ ເພື່ອພ້ອມກັນຫຼຸດຜ່ອນຜົນກະທົບ ຕໍ່ກັບການສຶກສາກ່ອນໄວຮຽນໃຫ້ນ້ອຍລົງ ເພື່ອພັດທະນາການສຶກສາກ່ອນໄວຮຽນໃນພາກພື້ນອາຊີຕາເວັນອອກສ່ຽງໃຕ້ ໂດຍສະເພາະແມ່ນບັນດາປະເທດອາຊຽນ.

ຂ່າວ: ດວງສະຫວັນ ຂັນທະວົງສາ