ກອງປະຊຸມລັດຖະມົນຕີ ອາຊຽນ ບວກ ສປ ຈີນ ວ່າດ້ວຍການຕ້ານອາຊະຍາກໍາຂ້າມຊາດ ຄັ້ງທີ 11

ກອງປະຊຸມລັດຖະມົນຕີ ອາຊຽນ ບວກ ສາທາລະນະລັດ ປະຊາຊົນ ຈີນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 11 ໄດ້ຈັດໃນວັນທີ 29 ສິງຫານີ້ ທີ່ໂຮງແຮມ ລາດຊະວົງ ວັນດາວິສຕ້າ ນະຄອນຫຼວງວຽງຈັນ ພາຍໃຕ້ການເປັນປະທານຮ່ວມຂອງ ທ່ານ ດາຕຸກ ເຊີຣີ ໄຊຟູດິນ ນາຊູຕີຢອນ ບິນ ອິດສະມາອິວ ລັດຖະມົນຕີກະຊວງພາຍໃນ ແຫ່ງ ມາເລເຊຍ ແລະ ທ່ານ ລິວ ຊົງອີ່ ຜູ້ຊ່ວຍລັດຖະມົນຕີ ກະຊວງປ້ອງ ກັນຄວາມສະຫງົບ ແຫ່ງ ສາທາລະນະລັດ ປະຊາຊົນຈີນ, ຊຶ່ງມີທ່ານເລຂາທິການໃຫຍ່ອາຊຽນ, ມີບັນດາລັດຖະມົນຕີປະເທດສະມາຊິກອາຊຽນ ແລະ ຕີມໍແລັດສະເຕ ຮັບ ຜິດຊອບວຽກງານຕ້ານອາຊະຍາກໍາຂ້າມຊາດ, ພ້ອມດ້ວຍຄະນະຜູ້ແທນເຂົ້າຮ່ວມ.

ກອງປະຊຸມຄັ້ງນີ້ ໄດ້ຢັ້ງຢືນເຖິງຜົນສໍາເລັດຂອງການຮ່ວມມືຕ້ານອາຊະຍາກໍາຂ້າມຊາດ ລະຫວ່າງອາຊຽນ ແລະ ສປ ຈີນ, ຕະຫຼອດໄລຍະຜ່ານມາເປັນຕົ້ນແມ່ນການຮ່ວມມືສະກັດກັ້ນບັນຫາຢາເສບຕິດ, ການກໍ່ການຮ້າຍ, ການຄ້າມະນຸດ, ການລັກລອບຄ້າຂາຍອາວຸດເສິກ, ອາຊະຍາກໍາທາງເສດຖະກິດ, ການຟອກເງິນ, ອາຊະຍາກໍາທາງຄອມພິວເຕີ, ການໂຈລະກໍາທາງທະເລ, ການຄ້າຂາຍສັດປ່າ ແລະ ໄມ້ຫວງຫ້າມ ແລະ ການລັກລອບນໍາຄົນເຂົ້າ-ອອກເມືອງ, ຜູ້ແທນທີ່ເຂົ້າຮ່ວມໄດ້ຍົກສູງຄວາມຮັບຜິດຊອບເຂົ້າໃນການແລກປ່ຽນຄໍາຄິດຄໍາເຫັນຢ່າງກົງໄປ-ກົງມາ ແລະ ມີລັກສະນະສ້າງສັນ ເພື່ອເຮັດໃຫ້ການພົວພັນຮ່ວມມືລະຫວ່າງອາຊຽນ ແລະ ສປ ຈີນ ໃນການສະກັດກັ້ນ ແລະ ຕ້ານອາຊະຍາກໍາຂ້າມຊາດ ໃນຕໍ່ໜ້າໃຫ້ມີປະສິດທິພາບສູງຂຶ້ນ. ກອງປະຊຸມໄດ້ຮັບຮອງເອົາຖະແຫຼງການຮ່ວມຂອງກອງປະຊຸມລັດຖະມົນຕີອາຊຽນ + ສປ ຈີນ ວ່າດ້ວຍການຕ້ານອາຊະຍາກຳຂ້າມຊາດ ຄັ້ງທີ 11 ແລະ ບົດລາຍງານຂອງກອງປະຊຸມ ເພື່ອເປັນບ່ອນອີງສໍາຄັນທີ່ຈະເຮັດໃຫ້ການພົວພັນຮ່ວມມືຕ້ານອາຊະຍາກໍາຂ້າມຊາດລະຫວ່າງອາຊຽນ ແລະ ສປ ຈີນ ມີຄວາມແໜ້ນແຟ້ນຂຶ້ນກ່ວາເກົ່າ.